Utshovসর্গ 33
33.1
রাবণগ্রহণং তত্তু বায়ুগ্রহণসন্নিভম্ ।
ততঃ পুলস্ত্যঃ শুশ্রাব কথিতং দিবি দৈবতৈঃ ।। ৭.৩৩.১ ॥
33.2
ততঃ পুত্রকৃতস্নেহাত্কম্প্যমানো মহাধৃতিঃ ।
মাহিষ্মতীপতিং দ্রষ্টুমাজগাম মহানৃষিঃ ।। ৭.৩৩.২ ॥
33.3
স বায়ুমার্গমাস্থায় বায়ুতুল্যগতির্দ্বিজঃ ।
পুরীং মাহিষ্মতীং প্রাপ্তো মনঃসম্পাতবিক্রমঃ ।। ৭.৩৩.৩ ॥
33.4
সো ঽমরাবতিসঙ্কাশাং হৃষ্টপুষ্টজনাকুলাম্ ।
প্রবিবেশ পুরীং ব্রহ্মা ইন্দ্রস্যেবামরাবতীম্ ।। ৭.৩৩.৪ ॥
33.5
পাদচারমিবাদিত্যং নিষ্পতন্তং সুদুর্দশম্ ।
ততস্তে প্রত্যভিজ্ঞায় অর্জুনায় নিবেদয়ন্ ।। ৭.৩৩.৫ ॥
33.6
পুলস্ত্য ইতি বিজ্ঞায় বচনাদ্ধৈহয়াধিপঃ ।
শিরস্যঞ্জলিমাধায় প্রত্যুদ্গচ্ছত্তপস্বিনম্ ।। ৭.৩৩.৬ ॥
33.7
পুরোহিতো ঽস্য গৃহ্যার্ঘ্যং মধুপর্কং তথৈব চ ।
পুরস্তাত্প্রয়য়ৌ রাজ্ঞঃ শক্রস্যেব বৃহস্পতিঃ ।। ৭.৩৩.৭ ॥
33.8
ততস্তমৃষিমায়ান্তমুদ্যন্তমিব ভাস্করম্ ।
অর্জুনো দৃশ্য সম্ভ্রান্তো ববন্দেন্দ্র ইবেশ্বরম্ ।। ৭.৩৩.৮ ॥
33.9
স তস্য মধুপর্কং গাং পাদ্যমর্ঘ্যং নিবেদ্য চ ।
পুলস্ত্যমাহ রাজেন্দ্রো হর্ষগদ্গদয়া গিরা ।। ৭.৩৩.৯ ॥
33.10
অদ্যৈবমমরাবত্যা তুল্যা মাহিষ্মতী কৃতা ।
অদ্যাহং তু দ্বিজেন্দ্র ত্বাং যস্মাত্পশ্যামি দুর্দশম্ ।। ৭.৩৩.১০ ॥
33.11
অদ্য মে কুশলং দেব অদ্য মে কুশলং ব্রতম্ ।
অদ্য মে সফলং জন্ম অদ্য মে সফলং তপঃ ।যস্মাদ্দেবগণৈর্বন্দ্যৌ বন্দে ঽহং চরণৌ তব ।। ৭.৩৩.১১ ॥
33.12
ইদং রাজ্যমিমে পুত্রা ইমে দারা ইমে বয়ম্ ।
ব্রহ্মন্কিং কুর্মি কিং কার্যমাজ্ঞাপয়তু নো ভবান্ ।। ৭.৩৩.১২ ॥
33.13
তং ধর্মে ঽগ্নিষু পুত্রেষু শিবং পৃষ্ট্বা চ পার্থিবম্ ।
পুলস্ত্যোবাচ রাজানং হৈহয়ানাং তথা ঽর্জুনম্ ।। ৭.৩৩.১৩ ॥
33.14
নরেন্দ্রাম্বুজপত্রাক্ষ পূর্ণচন্দ্রনিভানন ।
অতুলং তে বলং যেন দশগ্রীবস্ত্বয়া জিতঃ ।। ৭.৩৩.১৪ ॥
33.15
ভয়াদ্যস্যোপতিষ্ঠেতাং নিষ্পন্দৌ সাগরানিলৌ ।
সো ঽয়ং মৃধে ত্বয়া বদ্ধঃ পৌত্রো মে রণদুর্জয়ঃ ।। ৭.৩৩.১৫ ॥
33.16
পুত্রকস্য যশঃ পীতং নাম বিশ্রাবিতং ত্বয়া ।
মদ্বাক্যাদ্যাচ্যমানো ঽদ্য মুঞ্চ বত্সং দশাননম্ ।। ৭.৩৩.১৬ ॥
33.17
পুলস্ত্যাজ্ঞাং প্রগৃহ্যোচে ন কিঞ্চন বচো ঽর্জুনঃ ।
মুমোচ বৈ পার্থিবেন্দ্রো রাক্ষসেন্দ্রং প্রহৃষ্টবৎ ।। ৭.৩৩.১৭ ॥
33.18
স তং প্রমুচ্য ত্রিদশারিমর্জুনঃ প্রপূজ্য দিব্যাভরণস্রগম্বরৈঃ ।
অহিংসকং সখ্যমুপেত্য সাগ্নিকং প্রণম্য তং ব্রহ্মসুতং গৃহং যয়ৌ ।। ৭.৩৩.১৮ ॥
33.19
পুলস্ত্যেনাপি সন্ত্যক্তো রাক্ষসেন্দ্রঃ প্রতাপবান্ ।
পরিষ্বক্তঃ কৃতাতিথ্যো লজ্জমানো বিনির্জিতঃ ।। ৭.৩৩.১৯ ॥
33.20
পিতামহসুতশ্চাপি পুলস্ত্যো মুনিপুঙ্গবঃ ।
মোচয়িত্বা দশগ্রীবং ব্রহ্মলোকং জগাম হ ।। ৭.৩৩.২০ ॥
33.21
এবং স রাবণঃ প্রাপ্তঃ কার্তবীর্যাত্প্রধর্ষণম্ ।
পুলস্ত্যবচনাচ্চাপি পুনর্মুক্তো মহাবলঃ ।। ৭.৩৩.২১ ॥
33.22
এবং বলিভ্যো বলিনঃ সন্তি রাঘবনন্দন ।
নাবজ্ঞা হি পরে কার্যা য ইচ্ছেৎ প্রিয়মাত্মনঃ ।। ৭.৩৩.২২ ॥
33.23
ততঃ স রাজা পিশিতাশনানাং সহস্রবাহোরুপলভ্য মৈত্রীম্ ।
পুনর্নৃপাণাং কদনং চকার চচার সর্বাং পৃথিবীং চ দর্পাৎ ।। ৭.৩৩.২৩ ।।