Utshovসর্গ 42
42.1
ততস্তে রাক্ষসাস্তত্র গত্বা রাবণমন্দিরম্ ।
ন্যবেদয়ন্ পুরীং রুদ্ধাং রামেণ সহ বানরৈঃ ।। ৬.৪২.১ ।।।।
42.2
রুদ্ধাং তু নগরীং শ্রুত্বা জাতক্রোধো নিশাচরঃ ।
বিধানং দ্বিগুণং কৃত্বা প্রাসাদং সো ঽধ্যরোহত ।। ৬.৪২.২ ।।।।
42.3
স দদর্শাবৃতাং লঙ্কাং সশৈলবনকাননাম্ ।
অসঙ্খ্যেয়ৈর্হরিগণৈঃ সর্বতো যুদ্ধকাঙ্ক্ষিভিঃ ।। ৬.৪২.৩ ।।।।
42.4
স দৃষ্ট্বা বানরৈঃ সর্বাং বসুধাং কবলীকৃতাম্ ।
কথং ক্ষপয়িতব্যাঃ স্যুরিতি চিন্তাপরো ঽভবৎ ।। ৬.৪২.৪ ।।।।
42.5
স চিন্তয়িত্বা সুচিরং ধৈর্যমালম্ব্য রাবণঃ ।
রাঘবং হরিয়ূথাংশ্চ দদর্শায়তলোচনঃ ।। ৬.৪২.৫ ।।।।
42.6
রাঘবঃ সহ সৈন্যেন মুদিতো নাম পুপ্লুবে ।
লঙ্কাং দদর্শ গুপ্তাং বৈ সর্বতো রাক্ষসৈর্বৃতাম্ ।। ৬.৪২.৬ ।।।।
42.7
দৃষ্ট্বা দাশরথির্লঙ্কাং চিত্রধ্বজপতাকিনীম্ ।
জগাম সহসা সীতাং দূয়মানেন চেতসা ।। ৬.৪২.৭ ।।।।
42.8
অত্র সা মৃগশাবাক্ষী মত্কৃতে জনকাত্মজা ।
পীড্যতে শোকসন্তপ্তা কৃশা স্থণ্ডিলশায়িনী ।। ৬.৪২.৮ ।।।।
42.9
পীড্যমানাং স ধর্মাত্মা বৈদেহীমনুচিন্তয়ন্ ।
ক্ষিপ্রমাজ্ঞাপয়ামাস বানরান্ দ্বিষতাং বধে ।। ৬.৪২.৯ ।।।।
42.10
এবমুক্তে তু বচনে রামেণাক্লিষ্টকর্মণা ।
সঙ্ঘর্ষমাণাঃ প্লবগাঃ সিংহনাদৈরনাদয়ন্ ।। ৬.৪২.১০ ।।।।
42.11
শিখরৈর্বিকিরামৈনাং লঙ্কাং মুষ্টিভিরেব বা ।
ইতি স্ম দধিরে সর্বে মনাংসি হরিয়ূথপাঃ ।। ৬.৪২.১১ ।।।।
42.12
উদ্যম্য গিরিশৃঙ্গাণি শিখরাণি মহান্তি চ ।
তরূংশ্চোত্পাট্য বিবিধাংস্তিষ্ঠন্তি হরিয়ূথপাঃ ।। ৬.৪২.১২ ।।।।
42.13
প্রেক্ষতো রাক্ষসেন্দ্রস্য তান্যনীকানি ভাগশঃ ।
রাঘবপ্রিয়কামার্থং লঙ্কামারুরুহুস্তদা ।। ৬.৪২.১৩ ।।।।
42.14
তে তাম্রবক্ত্রা হেমাভা রামার্থে ত্যক্তজীবিতাঃ ।
লঙ্কামেবাভ্যবর্তন্ত সালতালশিলায়ুধাঃ ।। ৬.৪২.১৪ ।।।।
42.15
তে দ্রুমৈঃ পর্বতাগ্রৈশ্চ মুষ্টিভিশ্চ প্লবঙ্গমাঃ ।
প্রাকারাগ্রাণ্যরণ্যানি মমন্থুস্তোরণানি চ ।। ৬.৪২.১৫ ।।।।
42.16
পরিখাঃ পূরয়ন্তি স্ম প্রসন্নসলিলায়ুতাঃ ।
পাংসুভিঃ পর্বতাগ্রৈশ্চ তৃণৈঃ কাষ্ঠৈশ্চ বানরাঃ ।। ৬.৪২.১৬ ।।।।
42.17
ততঃ সহস্রয়ূথাশ্চ কোটীয়ূথাশ্চ বানরাঃ ।
কোটীশতয়ুতাশ্চান্যে লঙ্কামারুরুহুস্তদা ।। ৬.৪২.১৭ ।।।।
42.18
কাঞ্চনানি প্রমৃদ্নন্তস্তোরণানি প্লবঙ্গমাঃ ।
কৈলাসশিখরাভাণি গোপুরাণি প্রমথ্য চ ।। ৬.৪২.১৮ ।।।।
42.19
আপ্লবন্তঃ প্লবন্তশ্চ গর্জন্তশ্চ প্লবঙ্গমাঃ ।
লঙ্কাং তামভিধাবন্তি মহাবারণসন্নিভাঃ ।। ৬.৪২.১৯ ।।।।
42.20
জয়ত্যতিবলো রামো লক্ষ্মণশ্চ মহাবলঃ ।
রাজা জয়তি সুগ্রীবো রাঘবেণাভিপালিতঃ ।। ৬.৪২.২০ ।।।।
42.21
ইত্যেবং ঘোষয়ন্তশ্চ গর্জন্তশ্চ প্লবঙ্গমাঃ ।
অভ্যধাবন্ত লঙ্কায়াঃ প্রাকারং কামরূপিণঃ ।। ৬.৪২.২১ ।।।।
42.22
বীরবাহুঃ সুবাহুশ্চ নলশ্চ বনগোচরঃ ।
নিপীড্যোপনিবিষ্টাস্তে প্রাকারং হরিয়ূথপাঃ ।এতস্মিন্নন্তরে চক্রুঃ স্কন্ধাবারনিবেশনম্ ।। ৬.৪২.২২ ।।।।
42.23
পূর্বদ্বারং তু কুমুদঃ কোটীভির্দশভির্বৃতঃ ।
আবৃত্য বলবাংস্তস্থৌ হরিভির্জিতকাশিভিঃ ।। ৬.৪২.২৩ ।।।।
42.24
সাহায্যার্থং তু তস্যৈব নিবিষ্টঃ প্রঘসো হরিঃ ।
পনসশ্চ মহাবাহুর্বানরৈর্বহুভির্বৃতঃ ।। ৬.৪২.২৪ ।।।।
42.25
দক্ষিণং দ্বারমাগম্য বীরঃ শতবলিঃ কপিঃ ।
আবৃত্য বলবাংস্তস্থৌ বিংশত্যা কোটিভির্বৃতঃ ।। ৬.৪২.২৫ ।।।।
42.26
সুষেণঃ পশ্চিমদ্বারং গতস্তারাপিতা হরিঃ ।
আবৃত্য বলবাংস্তস্থৌ ষষ্টিকোটিভিরাবৃতঃ ।। ৬.৪২.২৬ ।।।।
42.27
উত্তরং দ্বারমাসাদ্য রামঃ সৌমিত্রিণা সহ ।
আবৃত্য বলবাংস্তস্থৌ সুগ্রীবশ্চ হরীশ্বরঃ ।। ৬.৪২.২৭ ।।।।
42.28
গোলাঙ্গূলো মহাকায়ো গবাক্ষো ভীমদর্শনঃ ।
বৃতঃ কোট্যা মহাবীর্যস্তস্থৌ রামস্য পার্শ্বতঃ ।। ৬.৪২.২৮ ।।।।
42.29
ঋক্ষাণাং ভীমবেগানাং ধূম্রঃ শত্রুনিবর্হণঃ ।
বৃতঃ কোট্যা মহাবীর্যস্তস্থো রামস্য পার্শ্বতঃ ।। ৬.৪২.২৯ ।।।।
42.30
সন্নদ্ধস্তু মহাবীর্যো গদাপাণির্বিভীষণঃ ।
বৃতো যত্তৈস্তু সচিবৈস্তস্থৌ তত্র মহাবলঃ ।। ৬.৪২.৩০ ।।।।
42.31
গজো গবাক্ষো গবয়ঃ শরভো গন্ধমাদনঃ ।
সমন্তাৎ পরিধাবন্তো ররক্ষুর্হরিবাহিনীম্ ।। ৬.৪২.৩১ ।।।।
42.32
ততঃ কোপপরীতাত্মা রাবণো রাক্ষসেশ্বরঃ ।
নির্যাণং সর্বসৈন্যানাং দ্রুতমাজ্ঞাপয়ত্তদা ।। ৬.৪২.৩২ ।।।।
42.33
এতচ্ছুত্বা ততো বাক্যং রাবণস্য মুখোদ্গতম্ ।
সহসা ভীমনির্ঘোষমুদ্ঘুষ্টং রজনীচরৈঃ ।। ৬.৪২.৩৩ ।।।।
42.34
ততঃ প্রচোদিতা ভের্যশ্চন্দ্রপাণ্ডরপুষ্করাঃ ।
হেমকোণাহতা ভীমা রাক্ষসানাং সমন্ততঃ ।। ৬.৪২.৩৪ ।।।।
42.35
বিনেদুশ্চ মহাঘোষাঃ শঙ্খাঃ শতসহস্রশঃ ।
রাক্ষসানাং সুঘোরাণাং মুখমারুতপূরিতাঃ ।। ৬.৪২.৩৫ ।।।।
42.36
তে বভুঃ শুভনীলাঙ্গাঃ সশঙ্কা রজনীচরাঃ ।
বিদ্যুন্মণ্ডলসন্নদ্ধাঃ সবলাকা ইবাম্বুদাঃ ।। ৬.৪২.৩৬ ।।।।
42.37
নিষ্পতন্তি ততঃ সৈন্যা হৃষ্টা রাবণচোদিতাঃ ।
সময়ে পূর্যমাণস্য বেগা ইব মহোদধেঃ ।। ৬.৪২.৩৭ ।।।।
42.38
ততো বানরসৈন্যেন মুক্তো নাদঃ সমন্ততঃ ।
মলয়ঃ পূরিতো যেন স সানুপ্রস্থকন্দরঃ ।। ৬.৪২.৩৮ ।।।।
42.39
শঙ্খদুন্দুভিসঙ্ঘুষ্টঃ সিংহনাদস্তরস্বিনাম্ ।
পৃথিবীং চান্তরিক্ষং চ সাগরং চৈব নাদয়ন্ ।। ৬.৪২.৩৯ ।।।।
42.40
গজানাং বৃংহিতৈঃ সার্ধং হয়ানাং হেষিতৈরপি ।
রথানাং নেমিঘোষৈশ্চ রক্ষসাং বদনস্বনঃ ।। ৬.৪২.৪০ ।।।।
42.41
এতস্মিন্নন্তরে ঘোরঃ সঙ্গ্রামঃ সমবর্তত ।
রক্ষসাং বানরাণাং চ যথা দেবাসুরে পুরা ।। ৬.৪২.৪১ ।।।।
42.42
তে গদাভিঃ প্রদীপ্তাভিঃ শক্তিশূলপরশ্বধৈঃ ।
নিজঘ্নুর্বানরান্ ঘোরাঃ কথয়ন্তঃ স্ববিক্রমান্ ।। ৬.৪২.৪২ ।।।।
42.43
রাজা জয়তি সুগ্রীব ইতি শব্দো মহানভূৎ ।
। ৬.৪২.৪৩ ।।।।
42.44
রাজন্ জয় জয়েত্যুক্ত্বা স্বস্বনামকথান্ততঃ ।
তথা বৃক্ষৈর্মহাকায়াঃ পর্বতাগ্রৈশ্চ বানরাঃ ।নিজঘ্নুস্তানি রক্ষাংসি নখৈর্দন্তৈশ্চ বেগিতাঃ ।। ৬.৪২.৪৪ ।।।।
42.45
রাক্ষসাস্ত্বপরে ভীমাঃ প্রাকারস্থা মহীগতান্ ।
ভিন্দিপালৈশ্চ খড্গৈশ্চ শূলৈশ্চৈব ব্যদারয়ন্ ।। ৬.৪২.৪৫ ।।।।
42.46
বানরাশ্চাপি সঙ্ক্রুদ্ধাঃ প্রাকারস্থান্ মহীগতাঃ ।
রাক্ষসান্ পাতয়ামাসুঃ সমাপ্লুত্য প্লবঙ্গমাঃ ।। ৬.৪২.৪৬ ।।।।
42.47
স সম্প্রহারস্তুমুলো মাংসশোণিতকর্দমঃ ।
রক্ষসাং বানরাণাং চ সম্বভূবাদ্ভুতোপমঃ ।। ৬.৪২.৪৭ ।।