সর্গ 95

95.1

অথ শৈলাদ্বিনিষ্ক্রম্য মৈথিলীং কোসলেশ্বরঃ ।
অদর্শয়চ্ছুভজলাং রম্যাং মন্দাকিনীং নদীম্ ॥ ২.৯৫.১॥

অব্রবীচ্চ বরারোহাং চারুচন্দ্রনিভাননাম্ ।
বিদেহরাজস্য সুতাং রামো রাজীবলোচনঃ ॥ ২.৯৫.২॥

বিচিত্রপুলিনাং রম্যাং হংসসারসসেবিতাম্ ।
কমলৈরুপসম্পন্নাং পশ্য মন্দাকিনীং নদীম্ ॥ ২.৯৫.৩॥

নানাবিধৈস্তীররুহৈর্বৃতাং পুষ্পফলদ্রুমৈঃ ।
রাজন্তীং রাজরাজস্য নলিনীমিব সর্বতঃ ॥ ২.৯৫.৪॥

মৃগয়ূথনিপীতানি কলুষাম্ভাংসি সাম্প্রতম্ ।
তীর্থানি রমণীয়ানি রতিং সঞ্জনয়ন্তি মে ॥ ২.৯৫.৫॥

জটাজিনধরাঃ কালে বল্কলোত্তরবাসসঃ ।
ঋষয়স্ত্ববগাহন্তে নদীং মন্দাকিনীং প্রিয়ে ॥ ২.৯৫.৬॥

আদিত্যমুপতিষ্ঠন্তে নিয়মাদূর্দ্ধ্ববাহবঃ ।
এতে পরে বিশালাক্ষি মুনয়ঃ সংশিতব্রতাঃ ॥ ২.৯৫.৭॥

মারুতোদ্ধূতশিখরৈঃ প্রনৃত্ত ইব পর্বতঃ ।
পাদপৈঃ পত্ত্রপুষ্পাণি সৃজদ্ভিরভিতো নদীম্ ॥ ২.৯৫.৮॥

ক্বচিন্মণিনিকাশোদাং ক্বচিত্পুলিনশালিনীম্ ।
ক্বচিত্সিদ্ধজনাকীর্ণাং পশ্য মন্দাকিনীং নদীম্ ॥ ২.৯৫.৯॥

নির্দ্ধূতান্ বায়ুনা পশ্য বিততান্ পুষ্পসঞ্চয়ান্ ।
পোপ্লূয়মানানপরান্ পশ্য ত্বং জলমধ্যগান্ ॥ ২.৯৫.১০॥

তাংশ্চাতিবল্গুবচসো রথাঙ্গাহ্বয়না দ্বিজাঃ ।
অধিরোহন্তি কল্যাণি বিকূজন্তঃ শুভা গিরঃ ॥ ২.৯৫.১১॥

দর্শনং চিত্র কূটস্য মন্দাকিন্যাশ্চ শোভনে ।
অধিকং পুরবাসাচ্চ মন্যে চ তব দর্শনাৎ ॥ ২.৯৫.১২॥

বিধূতকলুষৈঃ সিদ্ধৈস্তপোদমশমান্বিতৈঃ ।
নিত্যবিক্ষোভিতজলাং বিগাহস্ব ময়া সহ ॥ ২.৯৫.১৩॥

সখীবচ্চ বিগাহস্ব সীতে মন্দাকিনীং নদীম্ ।
কমলান্যবমজ্জন্তী পুষ্করাণি চ ভামিনি ॥ ২.৯৫.১৪॥

ত্বং পৌরজনবদ্ব্যালানয়োধ্যামিব পর্বতম্ ।
মন্যস্ব বনিতে নিত্যং সরয়ূবদিমাং নদীম্ ॥ ২.৯৫.১৫॥

লক্ষ্মণশ্চাপি ধর্মাত্মা মন্নিদেশে ব্যবস্থিতঃ ।
ত্বং চানুকূলা বৈদেহি প্রীতিং জনয়থো মম ॥ ২.৯৫.১৬॥

উপস্পৃশংস্ত্রিষবণং মধুমূলফলাশনঃ ।
নায়োধ্যায়ৈ ন রাজ্যায় স্পৃহয়ে ঽদ্য ত্বয়া সহ ॥ ২.৯৫.১৭॥

ইমাং হি রম্যাং মৃগয়ূথশালিনীং নিপীততোয়াং গজসিংহবানরৈঃ ।
সুপুষ্পিতৈঃ পুষ্পধরৈরলঙ্কৃতাং ন সো ঽস্তি যঃ স্যাদগতক্লমঃ সুখী ॥ ২.৯৫.১৮॥

ইতীব রামো বহুসঙ্গতং বচঃ প্রিয়াসহায়ঃ সরিতং প্রতি ব্রুবন্ ।
চচার রম্যং নয়নাঞ্জনপ্রভং স চিত্রকূটং রঘুবংশবর্দ্ধনঃ ॥ ২.৯৫.১৯ ॥