UtshovSarga 95
95.1
अथ शैलाद्विनिष्क्रम्य मैथिलीं कोसलेश्वरः ।
अदर्शयच्छुभजलां रम्यां मन्दाकिनीं नदीम् ॥ २.९५.१॥
Atha shailadvinishkramya maithilim kosaleshvarah
Adarshayachchhubhajalam ramyam mandakinim nadim
95.2
अब्रवीच्च वरारोहां चारुचन्द्रनिभाननाम् ।
विदेहराजस्य सुतां रामो राजीवलोचनः ॥ २.९५.२॥
Abravichcha vararoham charuchandranibhananam
Videharajasya sutam ramo rajivalochanah
95.3
विचित्रपुलिनां रम्यां हंससारससेविताम् ।
कमलैरुपसम्पन्नां पश्य मन्दाकिनीं नदीम् ॥ २.९५.३॥
Vichitrapulinam ramyam hansasarasasevitam
Kamalairupasampannam pashya mandakinim nadim
95.4
नानाविधैस्तीररुहैर्वृतां पुष्पफलद्रुमैः ।
राजन्तीं राजराजस्य नलिनीमिव सर्वतः ॥ २.९५.४॥
Nanavidhaistiraruhairvritam pushpaphaladrumaih
Rajantim rajarajasya nalinimiva sarvatah
95.5
मृगयूथनिपीतानि कलुषाम्भांसि साम्प्रतम् ।
तीर्थानि रमणीयानि रतिं सञ्जनयन्ति मे ॥ २.९५.५॥
Mrigayuthanipitani kalushambhansi sampratam
Tirthani ramaniyani ratim sanjanayanti me
95.6
जटाजिनधराः काले वल्कलोत्तरवाससः ।
ऋषयस्त्ववगाहन्ते नदीं मन्दाकिनीं प्रिये ॥ २.९५.६॥
Jatajinadharah kale valkalottaravasasah
Rishayastvavagahante nadim mandakinim priye
95.7
आदित्यमुपतिष्ठन्ते नियमादूर्द्ध्वबाहवः ।
एते परे विशालाक्षि मुनयः संशितव्रताः ॥ २.९५.७॥
Adityamupatishthante niyamadurddhvabahavah
Ete pare vishalakshi munayah sanshitavratah
95.8
मारुतोद्धूतशिखरैः प्रनृत्त इव पर्वतः ।
पादपैः पत्त्रपुष्पाणि सृजद्भिरभितो नदीम् ॥ २.९५.८॥
Marutoddhutashikharaih pranritta iva parvatah
Padapaih pattrapushpani srijadbhirabhito nadim
95.9
क्वचिन्मणिनिकाशोदां क्वचित्पुलिनशालिनीम् ।
क्वचित्सिद्धजनाकीर्णां पश्य मन्दाकिनीं नदीम् ॥ २.९५.९॥
Kvachinmaninikashodam kvachitpulinashalinim
Kvachitsiddhajanakirnam pashya mandakinim nadim
95.10
निर्द्धूतान् वायुना पश्य विततान् पुष्पसञ्चयान् ।
पोप्लूयमानानपरान् पश्य त्वं जलमध्यगान् ॥ २.९५.१०॥
Nirddhutan vayuna pashya vitatan pushpasanchayan
Popluyamananaparan pashya tvam jalamadhyagan
95.11
तांश्चातिवल्गुवचसो रथाङ्गाह्वयना द्विजाः ।
अधिरोहन्ति कल्याणि विकूजन्तः शुभा गिरः ॥ २.९५.११॥
Tanshchativalguvachaso rathangahvayana dvijah
Adhirohanti kalyani vikujantah shubha girah
95.12
दर्शनं चित्र कूटस्य मन्दाकिन्याश्च शोभने ।
अधिकं पुरवासाच्च मन्ये च तव दर्शनात् ॥ २.९५.१२॥
Darshanam chitra kutasya mandakinyashcha shobhane
Adhikam puravasachcha manye cha tava darshanat
95.13
विधूतकलुषैः सिद्धैस्तपोदमशमान्वितैः ।
नित्यविक्षोभितजलां विगाहस्व मया सह ॥ २.९५.१३॥
Vidhutakalushaih siddhaistapodamashamanvitaih
Nityavikshobhitajalam vigahasva maya saha
95.14
सखीवच्च विगाहस्व सीते मन्दाकिनीं नदीम् ।
कमलान्यवमज्जन्ती पुष्कराणि च भामिनि ॥ २.९५.१४॥
Sakhivachcha vigahasva site mandakinim nadim
Kamalanyavamajjanti pushkarani cha bhamini
95.15
त्वं पौरजनवद्व्यालानयोध्यामिव पर्वतम् ।
मन्यस्व वनिते नित्यं सरयूवदिमां नदीम् ॥ २.९५.१५॥
Tvam paurajanavadvyalanayodhyamiva parvatam
Manyasva vanite nityam sarayuvadimam nadim
95.16
लक्ष्मणश्चापि धर्मात्मा मन्निदेशे व्यवस्थितः ।
त्वं चानुकूला वैदेहि प्रीतिं जनयथो मम ॥ २.९५.१६॥
Lakshmanashchapi dharmatma mannideshe vyavasthitah
Tvam chanukula vaidehi pritim janayatho mama
95.17
उपस्पृशंस्त्रिषवणं मधुमूलफलाशनः ।
नायोध्यायै न राज्याय स्पृहये ऽद्य त्वया सह ॥ २.९५.१७॥
Upasprishanstrishavanam madhumulaphalashanah
Nayodhyayai na rajyaya sprihaye dya tvaya saha
95.18
इमां हि रम्यां मृगयूथशालिनीं निपीततोयां गजसिंहवानरैः ।
सुपुष्पितैः पुष्पधरैरलङ्कृतां न सो ऽस्ति यः स्यादगतक्लमः सुखी ॥ २.९५.१८॥
Imam hi ramyam mrigayuthashalinim nipitatoyam gajasinhavanaraih
Supushpitaih pushpadharairalankritam na so sti yah syadagataklamah sukhi
95.19
इतीव रामो बहुसङ्गतं वचः प्रियासहायः सरितं प्रति ब्रुवन् ।
चचार रम्यं नयनाञ्जनप्रभं स चित्रकूटं रघुवंशवर्द्धनः ॥ २.९५.१९ ॥
Itiva ramo bahusangatam vachah priyasahayah saritam prati bruvan
Chachara ramyam nayananjanaprabham sa chitrakutam raghuvanshavarddhanah