Utshovসর্গ 94
94.1
দীর্ঘকালোষিতস্তস্মিন্ গিরৌ গিরিবনপ্রিয়ঃ ।
বৈদেহ্যাঃ প্রিয়মাকাংক্ষন্ স্বং চ চিত্তং বিলোভয়ন্ ॥ ২.৯৪.১॥
94.2
অথ দাশরথিশ্চিত্রং চিত্রকূটমদর্শয়ৎ ।
ভার্য্যামমরসঙ্কাশঃ শচীমিব পুরন্দরঃ ॥ ২.৯৪.২॥
94.3
ন রাজ্যাদ্ভ্রংশনং ভদ্রে ন সুহৃদ্ভির্বিনাভবঃ ।
মনো মে বাধতে দৃষ্ট্বা রমণীয়মিমং গিরিম্ ॥ ২.৯৪.৩॥
94.4
পশ্যেমমচলং ভদ্রে নানাদ্বিজগণায়ুতম্ ।
শিখরৈঃ খমিবোদ্বিদ্ধৈর্দ্ধাতুমদ্ভির্বিভূষিতম্ ॥ ২.৯৪.৪॥
94.5
কেচিদ্রজতসঙ্কাশাঃ কেচিৎ ক্ষতজসন্নিভাঃ ।
পীতমাঞ্জিষ্ঠবর্ণাশ্চ কেচিন্মণিবরপ্রভাঃ ॥ ২.৯৪.৫॥
94.6
পুষ্পার্ককেতকাভাশ্চ কেচিজ্জ্যোতীরসপ্রভাঃ ।
বিরাজন্তে ঽচলেন্দ্রস্য দেশা ধাতুবিভূষিতাঃ ॥ ২.৯৪.৬॥
94.7
নানামৃগগণদ্বীপিতরক্ষ্বৃক্ষগণৈর্বৃতঃ ।
অদুষ্টৈর্ভাত্যয়ং শৈলো বহুপক্ষিসমায়ুতঃ ॥ ২.৯৪.৭॥
94.8
আম্রজম্ব্বসনৈর্লোধ্রৈঃ প্রিয়ালৈঃ পনসৈর্ধবৈঃ ।
অঙ্কোলৈর্ভব্যতিনিশৈর্বিল্বতিন্দুকবেণুভিঃ ॥ ২.৯৪.৮॥
94.9
কাশ্মর্যরিষ্টবরুণৈর্মধূকৈস্তিলকৈস্তথা ।
বদর্য্যামলকৈর্নীপৈর্বেত্রধন্বনবীজকৈঃ ॥ ২.৯৪.৯॥
94.10
পুষ্পবদ্ভিঃ ফলোপেতৈশ্ছায়াবদ্ভির্মনোরমৈঃ ।
এবমাদিভিরাকীর্ণঃ শ্রিয়ং পুষ্যত্যয়ং গিরিঃ ॥ ২.৯৪.১০॥
94.11
শৈলপ্রস্থেষু রম্যেষু পশ্যেমান্ রোমহর্ষণান্ ।
কিন্নরান্ দ্বন্দ্বশো ভদ্রে রমমাণান্ মনস্বিনঃ ॥ ২.৯৪.১১॥
94.12
শাখাবসক্তান্ খঙ্গাংশ্চ প্রবরাণ্যম্বরাণি চ ।
পশ্চ বিদ্যাধরস্ত্রীণাং ক্রীডোদ্দেশান্ মনোরমান্ ॥ ২.৯৪.১২॥
94.13
জলপ্রপাতৈরুদ্ভেদৈর্নিষ্যন্দৈশ্চ ক্বচিৎ ক্বচিৎ ।
স্রবদ্ভির্ভাত্যয়ং শৈলঃ স্রবন্মদ ইব দ্বিপঃ ॥ ২.৯৪.১৩॥
94.14
গুহাসমীরণো গন্ধান্ নানাপুষ্পভবান্ বহন্ ।
ঘ্রাণতর্প্পণমভ্যেত্য কং নরং ন প্রহর্ষয়েৎ ॥ ২.৯৪.১৪॥
94.15
যদীহ শরদো ঽনেকাস্ত্বয়া সার্দ্ধমনিন্দিতে ।
লক্ষ্মণেন চ বত্স্যামি ন মাং শোকঃ প্রধক্ষ্যতি ॥ ২.৯৪.১৫॥
94.16
বহুপুষ্পফলে রম্যে নানাদ্বিজগণায়ুতে ।
বিচিত্রশিখরে হ্যস্মিন্ রতবানস্মি ভামিনি ॥ ২.৯৪.১৬॥
94.17
অনেন বনবাসেন ময়া প্রাপ্তং ফলদ্বয়ম্ ।
পিতুশ্চানৃণতা ধর্মে ভরতস্য প্রিয়ং তথা ॥ ২.৯৪.১৭॥
94.18
বৈদেহি রমসে কচ্চিচ্চিত্রকূটে ময়া সহ ।
পশ্যন্তী বিবিধান্ ভাবান্ মনোবাক্কায়সংয়তান্ ॥ ২.৯৪.১৮॥
94.19
ইদমেবামৃতং প্রাহূ রাজ্ঞি রাজর্ষয়ঃ পরে ।
বনবাসং ভবার্থায় প্রেত্য মে প্রপিতামহাঃ ॥ ২.৯৪.১৯॥
94.20
শিলাঃ শৈলস্য শোভন্তে বিশালাঃ শতশো ঽভিতঃ ।
বহুলা বহুলৈর্বর্ণৈর্নীলপীতসিতারুণৈঃ ॥ ২.৯৪.২০॥
94.21
নিশি ভান্ত্যচলেন্দ্রস্য হুতাশনশিখা ইব ।
ওষধ্যঃ স্বপ্রভালক্ষ্যা ভ্রাজমানাঃ সহস্রশঃ ॥ ২.৯৪.২১॥
94.22
কেচিৎ ক্ষয়নিভা দেশাঃ কেচিদুদ্যানসন্নিভাঃ ।
কেচিদেকশিলা ভান্তি পর্বতস্যাস্য ভামিনি ॥ ২.৯৪.২২॥
94.23
ভিত্ত্বেব বসুধাং ভাতি চিত্রকূটঃ সমুত্থিতঃ ।
চিত্রকূটস্য কূটো ঽসৌ দৃশ্যতে সর্বতঃ শুভঃ ॥ ২.৯৪.২৩॥
94.24
কুষ্ঠপুন্নাগস্থগরভূর্জপত্রোত্তরচ্ছদান্ ।
কামিনাং স্বাস্তরান্ পশ্য কুশেশয়দলায়ুতান্ ॥ ২.৯৪.২৪॥
94.25
মৃদিতাশ্চাপবিদ্ধাশ্চ দৃশ্যন্তে কমলস্রজঃ ।
কামিভির্বনিতে পশ্য ফলানি বিবিধানি চ ॥ ২.৯৪.২৫॥
94.26
বস্বৌকসারাং নলিনীমত্যেতীবোত্তরান্ কুরূন্ ।
পর্বতশ্চিত্রকূটো ঽসৌ বহুমূলফলোদকঃ ॥ ২.৯৪.২৬॥
94.27
ইমং তু কালং বনিতে বিজহ্রিবাংস্ত্বয়া চ সীতে সহ লক্ষ্মণেন চ ।
রতিং প্রপত্স্যে কুলধর্মবর্দ্ধনীং সতাং পথি স্বৈর্নিয়মৈঃ পরৈঃ স্থিতঃ ॥ ২.৯৪.২৭ ॥