Utshovসর্গ 93
93.1
তয়া মহত্যা যায়িন্যা ধ্বজিন্যা বনবাসিনঃ ।
অর্দ্দিতা যূথপা মত্তাঃ সয়ূথাঃ সম্প্রদুদ্রুবুঃ ॥ ২.৯৩.১॥
93.2
ঋক্ষাঃ পৃষতসঙ্ঘাশ্চ রুরবশ্চ সমতন্তঃ ।
দৃশ্যন্তে বনরাজীষু গিরিষ্বপি নদীষু চ ॥ ২.৯৩.২॥
93.3
স সম্প্রতস্থে ধর্মাত্মা প্রীতো দশরথাত্মজঃ ।
বৃতো মহত্যা নাদিন্যা সেনয়া চতুরঙ্গয়া ॥ ২.৯৩.৩॥
93.4
সাগরৌঘনিভা সেনা ভরতস্য মহাত্মনঃ ।
মহীং সঞ্ছাদয়ামাস প্রাবৃষি দ্যামিবাম্বুদঃ ॥ ২.৯৩.৪॥
93.5
চিরকালমিত্যনেন কদাচিল্লক্ষ্যত ইতি গম্যতে ॥ ২.৯৩.৫॥
93.6
স যাত্বা দূরমধ্বানং সুপরিশ্রান্তবাহনঃ ।
উবাচ ভরতঃ শ্রীমান্ বসিষ্ঠং মন্ত্রিণাং বরম্ ॥ ২.৯৩.৬॥
93.7
যাদৃশং লক্ষ্যতে রূপং যথা চৈব শ্রুতং ময়া ।
ব্যক্তং প্রাপ্তাঃ স্ম তং দেশং ভরদ্বাজো যমব্রবীৎ ॥ ২.৯৩.৭॥
93.8
অয়ং গিরিশ্চিত্রকূট ইয়ং মন্দাকিনী নদী ।
এতৎ প্রকাশতে দূরান্নীলমেঘনিভং বনম্ ॥ ২.৯৩.৮॥
93.9
গিরেঃ সানূনি রম্যাণি চিত্রকূটস্য সম্প্রতি ।
বারণৈরবমৃদ্যন্তে মামকৈঃ পর্বতোপমৈঃ ॥ ২.৯৩.৯॥
93.10
মুঞ্চন্তি কুসুমান্যেতে নগাঃ পর্বতসানুষু ।
নীলা ইবাতপাপায়ে তোয়ং তোয়ধরা ঘনাঃ ॥ ২.৯৩.১০॥
93.11
কিন্নরাচরিতং দেশং পশ্য শত্রুঘ্ন পর্বতম্ ।
মৃগৈঃ সমন্তাদাকীর্ণং মকরৈরিব সাগরম্ ॥ ২.৯৩.১১॥
93.12
এতে মৃগগণা ভান্তি শীঘ্রবেগাঃ প্রচোদিতাঃ ।
বায়ুপ্রবিদ্ধা শরদি মেঘরাজিরিবাম্বরে ॥ ২.৯৩.১২॥
93.13
কুর্বন্তি কুসুমাপীডান্ শিরস্সু সুরভীনমী ।
মেঘপ্রকাশৈঃ ফলকৈর্দাক্ষিণাত্যা যথা নরাঃ ॥ ২.৯৩.১৩॥
93.14
নিষ্কূজমিব ভূত্বেদং বনং ঘোরপ্রদর্শনম্ ।
অয়োধ্যেব জনাকীর্ণা সম্প্রতি প্রতিভাতি মা ॥ ২.৯৩.১৪॥
93.15
খুরৈরুদীরিতো রেণুর্দিবং প্রচ্ছাদ্য তিষ্ঠতি ।
তং বহত্যনিলঃ শীঘ্রং কুর্বন্নিব মম প্রিয়ম্ ॥ ২.৯৩.১৫॥
93.16
স্যন্দনাংস্তুরগোপেতান্ সূতমুখ্যৈরধিষ্ঠিতান্ ।
এতান্ সম্পততঃ শীঘ্রং পশ্য শত্রুঘ্ন কাননে ॥ ২.৯৩.১৬॥
93.17
এতান্ বিত্রাসিতান্ পশ্য বর্হিণঃ প্রিয়দর্শনান্ ।
এতমাবিশতঃ শীঘ্রমধিবাসং পতত্িত্রণঃ ॥ ২.৯৩.১৭॥
93.18
অতিমাত্রময়ং দেশো মনোজ্ঞঃ প্রতিভাতি মা ।
তাপসানাং নিবাসো ঽয়ং ব্যক্তং স্বর্গপথো যথা ॥ ২.৯৩.১৮॥
93.19
মৃগা মৃগীভিঃ সহিতা বহবঃ পৃষতা বনে ।
মনোজ্ঞরূপা লক্ষ্যন্তে কুসুমৈরিব চিত্রিতাঃ ॥ ২.৯৩.১৯॥
93.20
সাধুসৈন্যাঃ প্রতিষ্ঠন্তাং বিচিন্বন্তু চ কাননে ।
যথা তৌ পুরুষব্যাঘ্রৌ দৃশ্যেতে রামলক্ষ্মণৌ ॥ ২.৯৩.২০॥
93.21
ভরতস্য বচঃ শ্রুত্বা পুরুষাঃ শস্ত্রপাণয়ঃ ।
বিবিশুস্তদ্বনং শূরা ধূমং চ দদৃশুস্ততঃ ॥ ২.৯৩.২১॥
93.22
তে সমালোক্য ধূমাগ্রমূচুর্ভরতমাগতাঃ ।
নামনুষ্যে ভবত্যাগ্নির্ব্যক্তমত্রৈব রাঘবৌ ॥ ২.৯৩.২২॥
93.23
অথ নাত্র নরব্যাঘ্রৌ রাজপুত্রৌ পরন্তপৌ ।
মন্যে রামোপমাঃ সন্তি ব্যক্তমত্র তপস্বিনঃ ॥ ২.৯৩.২৩॥
93.24
তচ্ছ্রুত্বা ভরতস্তেষাং বচনং সাধুসম্মতম্ ।
সৈন্যানুবাচ সর্বাংস্তানমিত্রবলমর্দনঃ ॥ ২.৯৩.২৪॥
93.25
যত্তা ভবন্তস্তিষ্ঠন্তু নেতো গন্তব্যমগ্রতঃ ।
অহমেব গমিষ্যামি সুমন্ত্রো গুরুরেব চ ॥ ২.৯৩.২৫॥
93.26
এবমুক্তাস্ততঃ সর্বে তত্র তস্থুঃ সমন্ততঃ ।
ভরতো যত্র ধূমাগ্রং তত্র দৃষ্টিং সমাদধাৎ ॥ ২.৯৩.২৬॥
93.27
ব্যবস্থিতা যা ভরতেন সা চমূর্নিরীক্ষমাণাপি চ ধূমমগ্রতঃ ।
বভূব হৃষ্টা নচিরেণ জানতী প্রিয়স্য রামস্য সমাগমং তদা ॥ ২.৯৩.২৭ ॥