Utshovসর্গ 92
92.1
ততস্তাং রজনীং ব্যুষ্য ভরতঃ সপরিচ্ছদঃ ।
কৃতাতিথ্যো ভরদ্বাজং কামাদভিজগাম হ ॥ ২.৯২.১॥
92.2
তমৃষিঃ পুরুষব্যাঘ্রং প্রাঞ্জলিং প্রেক্ষ্য চাগতম্ ।
হুতাগ্নিহোত্রো ভরতং ভরদ্বাজো ঽভ্যভাষত ॥ ২.৯২.২॥
92.3
কচ্চিদত্র সুখা রাত্রিস্তবাস্মদ্বিষয়ে গতা ।
সমগ্রস্তে জনঃ কচ্চিদাতিথ্যে শংস মে ঽনঘ ॥ ২.৯২.৩॥
92.4
তমুবাচাঞ্জলিং কৃত্বা ভরতো ঽভিপ্রণম্য চ ।
আশ্রমাদভিনিষ্ক্রান্তমৃষিমুত্তমতেজসম্ ॥ ২.৯২.৪॥
92.5
সুখোষিতো ঽস্মি ভগবন্ সমগ্রবলবাহনঃ ।
তর্পিতঃ সর্বকামৈশ্চ সামাত্যো বলবত্ত্বয়া ॥ ২.৯২.৫॥
92.6
অপেতক্লমসন্তাপাঃ সুভিক্ষাঃ সুপ্রতিশ্রয়াঃ ।
অপি প্রেষ্যানুপাদায় সর্বে স্ম সুসুখোষিতাঃ ॥ ২.৯২.৬॥
92.7
আমন্ত্রয়ে ঽহং ভগবন্ কামং ত্বামৃষিসত্তম ।
সমীপং প্রস্থিতং ভ্রাতুর্মৈত্রেণেক্ষস্ব চক্ষুষা ॥ ২.৯২.৭॥
92.8
আশ্রমং তস্য ধর্মজ্ঞ ধার্মিকস্য মহাত্মনঃ ।
আচক্ষ্ব কতমো মার্গঃ কিয়ানিতি চ শংস মে ॥ ২.৯২.৮॥
92.9
ইতি পৃষ্টস্তু ভরতং ভ্রাতৃদর্শনলালসম্ ।
প্রত্যুবাচ মহাতেজা ভরদ্বাজো মহাতপাঃ ॥ ২.৯২.৯॥
92.10
ভরতার্দ্ধতৃতীয়েষু যোজনেষ্বজনে বনে ।
চিত্রকূটো গিরিস্তত্র রম্যনির্দরকাননঃ ॥ ২.৯২.১০॥
92.11
উত্তরং পার্শ্বমাসাদ্য তস্য মন্দাকিনী নদী ।
পুষ্িপতদ্রুমসঞ্ছন্না রম্যপুষ্পিতকাননা ॥ ২.৯২.১১॥
92.12
অনন্তরং তত্সরিতশ্চিত্রকূটশ্চ পর্বতঃ ।
তয়োঃ পর্ণকুটী তাত তত্র তৌ বসতো ধ্রুবম্ ॥ ২.৯২.১২॥
92.13
দক্ষিণেনৈব মার্গেণ সব্যদক্ষিণমেব বা ।
গজবাজিরথাকীর্ণাং বাহিনীং বাহিনীপতে ।বাহয়স্ব মহাভাগ ততো দ্রক্ষ্যসি রাঘবম্ ॥ ২.৯২.১৩॥
92.14
প্রয়াণমিতি তচ্ছ্রুত্বা রাজরাজস্য যোষিতঃ ।
হিত্বা যানানি যানার্হা ব্রাহ্মণং পর্য্যবারয়ন্ ॥ ২.৯২.১৪॥
92.15
বেপমানা কৃশা দীনা সহ দেব্যা সুমিত্রয়া ।
কৌসল্যা তত্র জগ্রাহ করাভ্যাং চরণৌ মুনেঃ ॥ ২.৯২.১৫॥
92.16
অসমৃদ্ধেন কামেন সর্বলোকস্য গর্হিতা ।
কৈকেয়ী তস্য জগ্রাহ চরণৌ সব্যপত্রপা ॥ ২.৯২.১৬॥
92.17
তং প্রদক্ষিণমাগম্য ভগবন্তং মহামুনিম্ ।
অদূরাদ্ভরতস্যৈব তস্থৌ দীনমনাস্তদা ॥ ২.৯২.১৭॥
92.18
ততঃ পপ্রচ্ছ ভরতং ভরদ্বাজো দৃঢব্রতঃ ।
বিশেষং জ্ঞাতুমিচ্ছামি মাতঽণাং তব রাঘব ॥ ২.৯২.১৮॥
92.19
এবমুক্তস্তু ভরতো ভরদ্বাজেন ধার্মিকঃ ।
উবাচ প্রাঞ্জলির্ভূত্বা বাক্যং বচনকোবিদঃ ॥ ২.৯২.১৯॥
92.20
যামিমাং ভগবন্ দীনাং শোকানশনকর্শিতাম্ ।
পিতুর্হি মহিষীং দেবীং দেবতামিব পশ্যসি ॥ ২.৯২.২০॥
92.21
এষা তং পুরুষব্যাঘ্রং সিংহবিক্রান্তগামিনম্ ।
কৌসল্যা সুষুবে রামং ধাতারমদিতির্যথা ॥ ২.৯২.২১॥
92.22
অস্যাবামভুজং শ্লিষ্টা যৈষা তিষ্ঠতি দুর্মনাঃ ।
কর্ণিকারস্য শাখেব শীর্ণপুষ্পা বনান্তরে ॥ ২.৯২.২২॥
92.23
এতস্যাস্তু সুতৌ দেব্যাঃ কুমারৌ দেববর্ণিনৌ ।
উভৌ লক্ষ্মণশত্রুঘ্নৌ বীরৌ সত্যপরাক্রমৌ ॥ ২.৯২.২৩॥
92.24
যস্যাঃ কৃতে নরব্যাঘ্রৌ জীবনাশমিতো গতৌ ।
রাজপুত্রবিহীনশ্চ স্বর্গং দশরথো গতঃ ॥ ২.৯২.২৪॥
92.25
ক্রোধনামকৃতপ্রজ্ঞাং দৃপ্তাং সুভগমানিনীম্ ।
ঐশ্বর্যকামাং কৈকেয়ীমনার্য্যামার্যরূপিণীম্ ॥ ২.৯২.২৫॥
92.26
মমৈতাং মাতরং বিদ্ধি নৃশংসাং পাপনিশ্চয়াম্ ।
যতো মূলং হি পশ্যামি ব্যসনং মহদাত্মনঃ ॥ ২.৯২.২৬॥
92.27
ইত্যুক্ত্বা নরশার্দূলো বাষ্পগদ্গদয়া গিরা ।
স নিশশ্বাস তাম্রাক্ষো নাগঃ ক্রুদ্ধ ইব শ্বসন্ ॥ ২.৯২.২৭॥
92.28
ভরদ্বাজো মহর্ষিস্তং ব্রুবন্তং ভরতং তথা ।
প্রত্যুবাচ মহাবুদ্ধিরিদং বচনমর্থবৎ ॥ ২.৯২.২৮॥
92.29
ন দোষেণাবগন্তব্যা কৈকেয়ী ভরত ত্বয়া ।
রামপ্রব্রাজনং হ্যেতৎ সুখোদর্কং ভবিষ্যতি ॥ ২.৯২.২৯॥
92.30
দেবানাং দানবানাং চ ঋষীণাং ভাবিতাত্মনাম্ ।
হিতমেব ভবিষ্যদ্ধি রামপ্রব্রাজনাদিহ ॥ ২.৯২.৩০॥
92.31
অভিবাদ্য তু সংসিদ্ধঃ কৃত্বা চৈনং প্রদক্ষিণম্ ।
আমন্ত্র্য ভরতঃ সেন্যং যুজ্যতামিত্যচোদয়ৎ ॥ ২.৯২.৩১॥
92.32
ততো বাজিরথান্ যুক্ত্বা দিব্যান্ হেমপরিষ্কৃতান্ ।
অধ্যারোহৎ প্রয়াণার্থী বহূন্ বহুবিধো জনঃ ॥ ২.৯২.৩২॥
92.33
গজকন্যা গজাশ্চৈব হেমকক্ষ্যাঃ পতাকিনঃ ।
জীমূতা ইব ঘর্মান্তে সঘোষাঃ সম্প্রতস্থিরে ॥ ২.৯২.৩৩॥
92.34
বিবিধান্যপি যানানি মহান্তি চ লঘূনি চ ।
প্রয়য়ুঃ সুমহার্হাণি পাদৈরেব পদাতয়ঃ ॥ ২.৯২.৩৪॥
92.35
অথ যানপ্রবেকৈস্তু কৌসল্যাপ্রমুখাঃ স্ত্রিয়ঃ ।
রামদর্শনকাংক্ষিণ্যঃ প্রয়য়ুর্মুদিতাস্তদা ॥ ২.৯২.৩৫॥
92.36
চন্দ্রার্কতরুণাভাসাং নিয়ুক্তাং শিবিকাং শুভাম্ ।
আস্থায় প্রয়য়ৌ শ্রীমান্ ভরতঃ সপরিচ্ছদঃ ॥ ২.৯২.৩৬॥
92.37
সা প্রয়াতা মহাসেনা গজবাজিরথাকুলা ।
দক্ষিণাং দিশমাবৃত্য মহামেঘ ইবোত্থিতঃ ॥ ২.৯২.৩৭॥
92.38
বনানি তু ব্যতিক্রম্য জুষ্টানি মৃগপক্ষিভিঃ ।
গঙ্গায়াঃ পরবেলায়াং গিরিষ্বপি নদীষু চ ॥ ২.৯২.৩৮॥
92.39
সা সম্প্রহৃষ্টদ্বিজবাজিয়োধা বিত্রাসয়ন্তী মৃগপক্ষিসঙ্ঘান্ ।
মহদ্বনং তত্প্রতিগাহমানা ররাজ সেনা ভরতস্য তত্র ॥ ২.৯২.৩৯ ॥