Utshovসর্গ 91
91.1
কৃতবুদ্ধিং নিবাসায় তত্রৈব স মুনিস্তদা ।
ভরতং কৈকয়ীপুত্রমাতিথ্যেন ন্যমন্ত্রয়ৎ ॥ ২.৯১.১॥
91.2
অব্রবীদ্ভরতস্ত্বেনং নন্বিদং ভবতা কৃতম্ ।
পাদ্যমর্ঘ্যং তথাতিথ্যং বনে যদুপপদ্যতে ॥ ২.৯১.২॥
91.3
অথোবাচ ভরদ্বাজো ভরতং প্রহসন্নিব ।
জানে ত্বাং প্রীতিসংয়ুক্তং তুষ্যেস্ত্বং যেন কেনচিৎ ॥ ২.৯১.৩॥
91.4
সেনায়াস্তু তবৈতস্যাঃ কর্তুমিচ্ছামি ভোজনম্ ।
মম প্রীতির্যথারূপা ত্বমর্হো মনুজাধিপ ॥ ২.৯১.৪॥
91.5
কিমর্থং চাপি নিক্ষিপ্য দূরে বলমিহাগতঃ ।
কস্মান্নেহোপয়াতোসি সবলঃ পুরুষর্ষভ ॥ ২.৯১.৫॥
91.6
ভরতঃ প্রত্যুবাচেদং প্রাঞ্জলিস্তং তপোধনম্ ।
সসৈন্যো নোপয়াতো ঽস্মি ভগবন্ ভগবদ্ভয়াৎ ॥ ২.৯১.৬॥
91.7
রাজ্ঞা চ ভগবন্ নিত্যং রাজপুত্রেণ বা সদা ।
যত্নতঃ পরিহর্ত্তব্যা বিষয়েষু তপস্বিনঃ ॥ ২.৯১.৭॥
91.8
বাজিমুখ্যা মনুষ্যাশ্চ মত্তাশ্চ বরবারণাঃ ।
প্রচ্ছাদ্য ভগবন্ ভূমিং মহতীমনুয়ান্তি মাম্ ॥ ২.৯১.৮॥
91.9
তে বৃক্ষানুদকং ভূমিমাশ্রমেষূটজাংস্তথা ।
ন হিংস্যুরিতি তেনাহমেক এব সমাগতঃ ॥ ২.৯১.৯॥
91.10
আনীয়তামিতঃ সেনেত্যাজ্ঞপ্তঃ পরমর্ষিণা ।
ততস্তু চক্রে ভরতঃ সেনায়াঃ সমুপাগমম্ ॥ ২.৯১.১০॥
91.11
অগ্নিশালাং প্রবিশ্যাথ পীত্বাপঃ পরিমৃজ্য চ ।
আতিথ্যস্য ক্রিয়াহেতোর্বিশ্বকর্মাণমাহ্বয়ৎ ॥ ২.৯১.১১॥
91.12
আহ্বয়ে বিশ্বকর্মাণমহং ত্বষ্টারমেব চ ।
আতিথ্যং কর্তুমিচ্ছামি তত্র মে সংবিধীয়তাম্ ॥ ২.৯১.১২॥
91.13
আহ্বয়ে লোকপালাংস্ত্রীন্ দেবান্ শক্রমুখাংস্তথা ।
আতিথ্যং কর্তুমিচ্ছামি তত্র মে সংবিধীয়তাম্ ॥ ২.৯১.১৩॥
91.14
প্রাক্স্রোতসশ্চ যা নদ্যঃ প্রত্যক্স্রোতস এব চ ।
পৃথিব্যামন্তরিক্ষে চ সমায়ান্ত্বদ্য সর্বশঃ ॥ ২.৯১.১৪॥
91.15
অন্যাঃ স্রবন্তু মৈরেয়ং সুরামন্যাঃ সুনিষ্ঠিতাম্ ।
অপরাশ্চোদকং শীতমিক্ষুকাণ্ডরসোপমম্ ॥ ২.৯১.১৫॥
91.16
আহ্বয়ে দেবগন্ধর্বান্ বিশ্বাবসুহহাহুহূন্ ।
তথৈবাপ্সরসো দেবীর্গন্ধর্ব্বীশ্চাপি সর্বশঃ ॥ ২.৯১.১৬॥
91.17
ঘৃতাচীমথ বিশ্বাচীং মিশ্রকেশীমলম্বুসাম্ ।
নাগদন্তাং চ হেমাং চ হিমামদ্রিকৃতস্থলাম্ ॥ ২.৯১.১৭॥
91.18
শক্রং যাশ্চোপতিষ্ঠন্তি ব্রহ্মাণং যাশ্চ যোষিতঃ ।
সর্বাস্তুম্বুরুণা সার্দ্ধমাহ্বয়ে সপরিচ্ছদাঃ ॥ ২.৯১.১৮॥
91.19
বনং কুরুষু যদ্দিব্যং বাসোভূষণপত্ত্রবৎ ।
দিব্যনারীফলং শশ্বত্তত্কৌবেরমিহৈতু চ ॥ ২.৯১.১৯॥
91.20
ইহ মে ভগবান্ সোমো বিধত্তামন্নমুত্তমম্ ।
ভক্ষ্যং ভোজ্যং চ চোষ্যং চ লেহ্যং চ বিবিধং বহু ॥ ২.৯১.২০॥
91.21
বিচিত্রাণি চ মাল্যানি পাদপপ্রচ্যুতানি চ ।
সুরাদীনি চ পেয়ানি মাংসানি বিবিধানি চ ॥ ২.৯১.২১॥
91.22
এবং সমাধিনা যুক্তস্তেজসা ঽপ্রতিমেন চ ।
শীক্ষাস্বরসমায়ুক্তং তপসা চাব্রবীন্মুনিঃ ॥ ২.৯১.২২॥
91.23
মনসা ধ্যায়তস্তস্য প্রাঙ্মুখস্য কৃতাঞ্জলেঃ ।
আজগ্মুস্তানি সর্বাণি দৈবতানি পৃথক্পৃথক্ ॥ ২.৯১.২৩॥
91.24
মলয়ং দর্দুরং চৈব ততঃ স্বেদনুদঽ ঽনিলঃ ।
উপস্পৃশ্য ববৌ যুক্ত্যা সুপ্রিয়াত্মা সুখঃ শিবঃ ॥ ২.৯১.২৪॥
91.25
ততোভ্যবর্তন্ত ঘনা দিব্যাঃ কুসুমবৃষ্টয়ঃ ।
দিব্যদুন্দুভিঘোষশ্চ দিক্ষু সর্বাসু শুশ্রুবে ॥ ২.৯১.২৫॥
91.26
প্রববুশ্চোত্তমা বাতাননৃতুশ্চাপ্সরোগণাঃ ।
প্রজগুর্দেবগন্ধর্বা বীণাঃ প্রমুমুচুঃ স্বরান্ ॥ ২.৯১.২৬॥
91.27
স শব্দো দ্যাং চ ভূমিং চ প্রাণিনাং শ্রবণানি চ ।
বিবেশোচ্চারিতঃ শ্লক্ষ্ণঃ সমো লয়গুণান্বিতঃ ॥ ২.৯১.২৭॥
91.28
তস্মিন্নুপরতে শব্দে দিব্যে শ্রোতৃ(ত্র)সুখে নৃণাম্ ।
দদর্শ ভারতং সৈন্যং বিধানং বিশ্বকর্মণঃ ॥ ২.৯১.২৮॥
91.29
বভূব হি সমা ভূমিঃ সমন্তাত্পঞ্চয়োজনা ।
শাদ্বলৈর্বহুভিশ্ছন্না নীলবৈডূর্য্যসন্নিভৈঃ ॥ ২.৯১.২৯॥
91.30
তস্মিন্ বিল্বাঃ কপিত্থাশ্চ পনসা বীজপূরকাঃ ।
আমলক্যো বভূবুশ্চ চূতাশ্চ ফলভূষণাঃ ॥ ২.৯১.৩০॥
91.31
উত্তরেভ্যঃ কুরুভ্যশ্চ বনং দিব্যোপভোগবৎ ।
আজগাম নদী দিব্যা তীজৈর্বহুভির্বৃতা ॥ ২.৯১.৩১॥
91.32
চতুঃশালানি শুভ্রাণি শালাশ্চ গজবাজিনাম্ ।
হর্ম্যপ্রাসাদসম্বাধাস্তোরণানি শুভানি চ ॥ ২.৯১.৩২॥
91.33
সিতমেঘনিভং চাপি রাজবেশ্মসু তোরণম্ ।
দিব্যমাল্যকৃতাকারং দিব্যগন্ধসমুক্ষিতম্ ॥ ২.৯১.৩৩॥
91.34
চতুরশ্রমসম্বাধং শয়নাসনয়ানবৎ ।
দিব্যৈঃ সর্বরসৈর্যুক্তং দিব্যভোজনবস্ত্রবৎ ।উপকল্পিতসর্বান্নং ধৌতনির্মলভাজনম্ ॥ ২.৯১.৩৪॥
91.35
ক্লৃপ্তসর্বাসনং শ্রীমৎ স্বাস্তীর্ণশয়নোত্তমম্ ।
প্রবিবেশ মহাবাহুরনুজ্ঞাতো মহর্ষিণা ।বেশ্ম তদ্রত্নসম্পূর্ণং ভরতঃ কেকয়ীসুতঃ ॥ ২.৯১.৩৫॥
91.36
অনুজগ্মুশ্চ তং সর্বে মন্ত্রিণঃ সপুরোহিতাঃ ।
বভূবুশ্চ মুদা যুক্তা দৃষ্ট্বা তং বেশ্মসংবিধিম্ ॥ ২.৯১.৩৬॥
91.37
তত্র রাজাসনং দিব্যং ব্যজনং ছত্রমেব চ ।
ভরতো মন্ত্রিভিঃ সার্দ্ধমভ্যবর্ত্তত রাজবৎ ॥ ২.৯১.৩৭॥
91.38
আসনং পূজয়ামাস রামায়াভিপ্রণম্য চ ।
বালব্যজনমাদায় ন্যষীদৎ সচিবাসনে ॥ ২.৯১.৩৮॥
91.39
আনুপূর্ব্যানিষেদুশ্চ সর্বে মন্ত্রিপুরোহিতাঃ ।
ততঃ সেনাপতিঃ পশ্চাৎ প্রশাস্তা চ নিষেদতুঃ ॥ ২.৯১.৩৯॥
91.40
ততস্তত্র মুহূর্ত্তেন নদ্যঃ পায়সকর্দমাঃ ।
উপাতিষ্ঠন্ত ভরতং ভরদ্বাজস্য শাসনাৎ ॥ ২.৯১.৪০॥
91.41
তাসামুভয়তঃকূলং পাণ্ডুমৃত্তিকলেপনাঃ ।
রম্যাশ্চাবসথা দিব্যা ব্রহ্মণস্তু প্রসাদজাঃ ॥ ২.৯১.৪১॥
91.42
তেনৈব চ মুহূর্ত্তেন দিব্যাভরণভূষিতাঃ ।
আগুর্বিংশতিসাহস্রা ব্রহ্মণা প্রহিতাঃ স্ত্রিয়ঃ ॥ ২.৯১.৪২॥
91.43
সুবর্ণমণিমুক্তেন প্রবালেন চ শোভিতাঃ ।
আগুর্বিংশতিসাহস্রাঃ কুবেরপ্রহিতাঃ স্ত্রিয়ঃ ॥ ২.৯১.৪৩॥
91.44
যাভির্গৃহীতপুরুষঃ সোন্মাদ ইব লক্ষ্যতে ।
আগুর্বিংশতিসাহস্রা নন্দনাদপ্সরোগণাঃ ॥ ২.৯১.৪৪॥
91.45
নারদস্তুম্বুরুর্গোপঃ প্রবরাঃ সূর্য্যবর্চসঃ ।
এতে গন্ধর্বরাজানো ভরতস্যাগ্রতো জগুঃ ॥ ২.৯১.৪৫॥
91.46
অলম্বুসা মিশ্রকেশী পুণ্ডরীকাথ বামনা ।
উপানৃত্যংস্তু ভরত ভরদ্বাজস্য শাসনাৎ ॥ ২.৯১.৪৬॥
91.47
যানি মাল্যানি দেবেষু যানি চৈত্ররথে বনে ।
প্রয়াগে তান্যদৃশ্যন্ত ভরদ্বাজস্য তেজসা ॥ ২.৯১.৪৭॥
91.48
বিল্বা মার্দঙ্গিকা আসন্ শম্যাগ্রাহা বিভীতকাঃ ।
অশ্বত্থানর্ত্তকাশ্চাসন্ ভরদ্বাজস্য শাসনাৎ ॥ ২.৯১.৪৮॥
91.49
ততঃ সরলতালাশ্চ তিলকা নক্তমালকাঃ ।
প্রহৃষ্টাস্তত্র সম্পেতুঃ কুব্জা ভূত্বাথ বামনাঃ ॥ ২.৯১.৪৯॥
91.50
শিংশুপামলকীজম্ব্বো যাশ্চান্যাঃ কাননেষু তাঃ ।
মালতী মল্লিকা জাতির্যাশ্চান্যাঃ কাননে লতাঃ ॥ ২.৯১.৫০॥
91.51
প্রমদাবিগ্রহং কৃত্বা ভরদ্বাজাশ্রমে ঽবদন্ ।
সুরাঃ সুরাপাঃ পিবত পায়সং চ বুভুক্ষিতাঃ ।মাংসানি চ সুমেধ্যানি ভক্ষ্যন্তাং যাবদিচ্ছথ ॥ ২.৯১.৫১॥
91.52
উচ্ছাদ্য স্নাপয়ন্তি স্ম নদীতীরেষু বল্গুষু ।
অপ্যেকমেকং পুরুষং প্রমদাঃ সপ্ত চাষ্ট চ ॥ ২.৯১.৫২॥
91.53
সংবাহন্ত্যঃ সমাপেতুর্নার্যো রুচিরলোচনাঃ ।
পরিমৃজ্য তথান্যোন্যং পায়য়ন্তি বরাঙ্গনাঃ ॥ ২.৯১.৫৩॥
91.54
হয়ান্ গজান্ খরানুষ্ট্রাংস্তথৈব সুরভেঃ সুতান্ ।
অভোজয়ন্ বাহনপাস্তেষাং ভোজ্যং যথাবিধি ॥ ২.৯১.৫৪॥
91.55
ইক্ষূংশ্চ মধুলাজাংশ্চ ভোজয়ন্তি স্ম বাহনান্ ।
ইক্ষ্বাকুবরয়োধানাং চোদয়ন্তো মহাবলাঃ ॥ ২.৯১.৫৫॥
91.56
নাশ্ববন্ধো ঽশ্বমাজানান্ন গজং কুঞ্জরগ্রহঃ ।
মত্তপ্রমত্তমুদিতা নমূঃ সা তত্র সম্বভৌ ॥ ২.৯১.৫৬॥
91.57
তর্পিতাঃ সর্বকামৈস্তে রক্তচন্দনরূষিতাঃ ।
অপ্সরোগণসংয়ুক্তাঃ সৈন্যা বাচমুদৈরয়ন্ ॥ ২.৯১.৫৭॥
91.58
নৈবায়োধ্যাং গমিষ্যামো ন গমিষ্যাম দণ্ডকান্ ।
কুশলং ভরতস্যাস্তু রামস্যাস্তু তথা সুখম্ ॥ ২.৯১.৫৮॥
91.59
ইতি পাদাতয়োধাশ্চ হস্ত্যশ্বারোহ বন্ধকাঃ ।
অনাথাস্তং বিধিং লব্ধ্বা বাচমেতামুদৈরয়ন্ ॥ ২.৯১.৫৯॥
91.60
সম্প্রহৃষ্টা বিনেদুস্তে নরাস্তত্র সহস্রশঃ ।
ভরতস্যানুয়াতারঃ স্বর্গোয়মিতি চাব্রুবন্ ॥ ২.৯১.৬০॥
91.61
নৃত্যন্তি স্ম হসন্তি স্ম গায়ন্তি স্ম চ সৈনিকাঃ ।
সমন্তাৎ পরিধাবন্তি মাল্যোপেতাঃ সহস্রশঃ ॥ ২.৯১.৬১॥
91.62
ততো ভুক্তবতাং তেষাং তদন্নমমৃতোপমম্ ।
দিব্যানুদ্বীক্ষ্য ভক্ষ্যাংস্তানভবদ্ভক্ষণে মতিঃ ॥ ২.৯১.৬২॥
91.63
প্রেষ্যাশ্চেষ্ট্যশ্চ বধ্বশ্চ বলস্থাশ্চ সহস্রশঃ ।
বভূবুস্তে ভৃশং দৃপ্তাঃ সর্বে চাহতবাসসঃ ॥ ২.৯১.৬৩॥
91.64
কুঞ্জরাশ্চ খরোষ্ট্রাশ্চ গোশ্বাশ্চ মৃগপক্ষিণঃ ।
বভূবুঃ সুভৃতাস্তত্র নান্যো হ্যন্যমকল্পয়ৎ ॥ ২.৯১.৬৪॥
91.65
নাশুক্লবাসাস্তত্রাসীৎ ক্ষুধিতো মলিনো ঽপি বা ।
রজসা ধ্বস্তকেশো বা নরঃ কশ্চিদদৃশ্যত ॥ ২.৯১.৬৫॥
91.66
আজৈশ্চাপি চ বারাহৈর্নিষ্ঠানবরসঞ্চয়ৈঃ ।
ফলনির্যূহসংসিদ্ধৈঃ সূপৈর্গন্ধরসান্বিতৈঃ ॥ ২.৯১.৬৬॥
91.67
পুষ্পধ্বজবতীঃ পূর্ণাঃ শুক্লস্যান্নস্য চাভিতঃ ।
দদৃশুর্বিস্মিতাস্তত্র নরা লৌহীঃ সহস্রশঃ ॥ ২.৯১.৬৭॥
91.68
বভূবুর্বনপার্শ্বেষু কূপাঃ পায়সকর্দমাঃ ।
তাশ্চ কামদুঘা গাবো দ্রুমাশ্চাসন্ মধুস্রুতঃ ॥ ২.৯১.৬৮॥
91.69
বাপ্যো মৈরেয়পূর্ণাশ্চ মৃষ্টমাংসচয়ৈর্বৃতাঃ ।
প্রতপ্তপিঠরৈশ্চাপি মার্গমায়ূরকৌক্কুটৈঃ ॥ ২.৯১.৬৯॥
91.70
পাত্রীণাং চ সহস্রাণি স্থালীনাং নিয়ুতানি চ ।
ন্যর্বুদানি চ পাত্রাণি শাতকুম্ভময়ানি চ ॥ ২.৯১.৭০॥
91.71
স্থাল্যঃ কুম্ভ্যঃ করম্ভ্যশ্চ দধিপূর্ণাঃ সুসংস্কৃতাঃ ।
যৌবনস্থস্য গৌরস্য কপিত্থস্য সুগন্ধিনঃ ॥ ২.৯১.৭১॥
91.72
হ্রদাঃ পূর্ণা রসালস্য দঘ্নঃ শ্বেতস্য চাপরে ।
বভূবুঃ পায়সস্যান্যে শর্করায়াশ্চ সঞ্চয়াঃ ॥ ২.৯১.৭২॥
91.73
কল্কাংশ্চূর্ণকষায়াংশ্চ স্নানানি বিবিধানি চ ।
দদৃশুর্ভাজনস্থানি তীর্থেষু সরিতাং নরাঃ ॥ ২.৯১.৭৩॥
91.74
শুক্লানংশুমতশ্চাপি দন্তধাবনসঞ্চয়ান্ ।
শুক্লাংশ্চন্দনকল্কাংশ্চ সমুদ্গেষ্ববতিষ্ঠতঃ ॥ ২.৯১.৭৪॥
91.75
দর্পণান্ পরিমৃষ্টাংশ্চ বাসসাং চাপি সঞ্চয়ান্ ।
পাদুকোপানহশ্চৈব যুগ্মানি চ সহস্রশঃ ॥ ২.৯১.৭৫॥
91.76
আঞ্জনীঃ কঙ্কতান্ কূর্চান্ শস্ত্রাণি চ ধনূংষি চ ।
মর্মত্রাণানি চিত্রাণি শয়নান্যাসনানি চ ॥ ২.৯১.৭৬॥
91.77
প্রতিপানহ্রদান্ পূর্ণান্ খরোষ্ট্রগজবাজিনাম্ ।
অবগাহ্য সুতীর্থাংশ্চ হ্রদান্ সোত্পলপুষ্করান্ ॥ ২.৯১.৭৭॥
91.78
আকাশবর্ণপ্রতিমান্ স্বচ্ছতোয়ান্ সুখপ্লবান্ ।
নীলবৈডূর্য্যবর্ণাংশ্চ মৃদূন্ যবসসঞ্চয়ান্ ॥ ২.৯১.৭৮॥
91.79
নির্বাপার্থান্ পশূনাং তে দদৃশুস্তত্র সর্বশঃ ॥ ২.৯১.৭৯॥
91.80
ব্যস্ময়ন্ত মনুষ্যাস্তে স্বপ্নকল্পং তদদ্ভুতম্ ।
দৃষ্ট্বাতিথ্যং কৃতং তাদৃক্ ভরতস্য মহর্ষিণা ॥ ২.৯১.৮০॥
91.81
ইত্যেবং রমমাণানাং দেবানামিব নন্দনে ।
ভরদ্বাজাশ্রমে রম্যে সা রাত্রির্ব্যত্যবর্ত্তত ॥ ২.৯১.৮১॥
91.82
প্রতিজগ্মুশ্চ তা নদ্যো গন্ধর্বাশ্চ যথাগতম্ ।
ভরদ্বাজমনুজ্ঞাপ্য তাশ্চ সর্বা বরাঙ্গনাঃ ॥ ২.৯১.৮২॥
91.83
তথৈব মত্তা মদিরোত্কটা নরাস্তথৈব দিব্যাগুরুচন্দনোক্ষিতাঃ ।
তথৈব দিব্যা বিবিধাঃ স্রগুত্তমাঃ পৃথক্ প্রকীর্ণা মনুজৈঃ প্রমর্দিতাঃ ॥ ২.৯১.৮৩ ॥