Utshovসর্গ 90
90.1
ভরদ্বাজাশ্রমং দৃষ্ট্বা ক্রোশাদেব নরর্ষভঃ ।
বলং সর্বমবস্থাপ্য জগাম সহ মন্ত্রিভিঃ ॥ ২.৯০.১
90.2
পদ্ভ্যামেব হি ধর্মজ্ঞো ন্যস্তশস্ত্রপরিচ্ছদঃ ।
বসানো বাসসী ক্ষৌমে পুরোধায় পুরোধসম্ ॥ ২.৯০.২
90.3
ততঃ সন্দর্শনে তস্য ভরদ্বাজস্য রাঘবঃ ।
মন্ত্রিণস্তানবস্থাপ্য জগামানুপুরোহিতম্ ॥ ২.৯০.৩
90.4
বসিষ্ঠমথ দৃষ্ট্বৈব ভরদ্বাজো মহাতপাঃ ।
সঞ্চচালাসনাত্তূর্ণং শিষ্যানর্ধ্যমিতি ব্রুবন্ ॥ ২.৯০.৪
90.5
বসিষ্ঠসাহচর্য্যাদিতি ভাবঃ ॥ ২.৯০.৫
90.6
তাভ্যামর্ধ্যং চ পাদ্যং চ দত্ত্বা পশ্চাৎ ফলানি চ ।
আনুপূর্ব্যাচ্চ ধর্মজ্ঞঃ পপ্রচ্ছ কুশলং কুলে ॥ ২.৯০.৬
90.7
অয়োধ্যায়াং বলে কোশে মিত্রেষ্বপি চ মন্ত্রিষু ।
জানন্ দশরথং বৃত্তং ন রাজানমুদাহরৎ ॥ ২.৯০.৭
90.8
বসিষ্ঠো ভরতশ্চৈনং পপ্রচ্ছতুরনাময়ম্ ।
শরীরে ঽগ্নিষু বৃক্ষেষু শিষ্যেষু মৃগপক্ষিষু ॥ ২.৯০.৮
90.9
তথেতি তত্প্রতিজ্ঞায় ভরদ্বাজো মহাতপাঃ ।
ভরতং প্রত্যুবাচেদং রাঘবস্নেহবন্ধনাৎ ॥ ২.৯০.৯
90.10
কিমিহাগমনে কার্য্যং তব রাজ্যং প্রশাসতঃ ।
এতদাচক্ষ্ব মে সর্বং নহি মে শুদ্ধ্যতে মনঃ ॥ ২.৯০.১০
90.11
সুষুবে যমমিত্রঘ্নং কৌসল্যা নন্দবর্দ্ধনম্ ।
ভ্রাত্রা সহ সভার্যো যশ্চিরং প্রব্রাজিতো বনম্ ॥ ২.৯০.১১
90.12
নিয়ুক্তঃ স্ত্রীনিয়ুক্তেন পিত্রা যো ঽসৌ মহায়শাঃ ।
বনবাসী ভবেতীহ সমাঃ কিল চতুর্দশ ॥ ২.৯০.১২
90.13
কচ্চিন্ন তস্যাপাপস্য পাপং কর্তুমিহেচ্ছসি ।
অকণ্টকং ভোক্তুমনা রাজ্যং তস্যানুজস্য চ ॥ ২.৯০.১৩
90.14
এবমুক্তো ভরদ্বাজং ভরতঃ প্রত্যুবাচ হ ।
পর্য্যশ্রুনয়নো দুঃখাদ্বাচা সংসজ্জমানয়া ॥ ২.৯০.১৪
90.15
হতো ঽস্মি যদি মামেবং ভগবানপি মন্যতে ।
মত্তো ন দোষমাশঙ্কে নৈবং মামনুশাধি হি ॥ ২.৯০.১৫
90.16
ন চৈত দিষ্টং মাতা মে যদবোচন্মদন্তরে ।
নাহমেতেন তুষ্টশ্চ ন তদ্বচনমাদদে ॥ ২.৯০.১৬
90.17
অহং তু তং নরব্যাঘ্রমুপয়াতঃ প্রসাদকঃ ।
প্রতিনেতুময়োধ্যাং চ পাদৌ তস্যাভিবন্দিতুম্ ॥ ২.৯০.১৭
90.18
ত্বং মামেবঙ্গতং মত্বা প্রসাদং কর্তুমর্হসি ।
শংস মে ভগবন্ রামঃ ক্ব সম্প্রতি মহীপতিঃ ॥ ২.৯০.১৮
90.19
বসিষ্ঠাদিভির্ঋত্বিগ্ভির্যাচিতো ভগবাংস্ততঃ ।
উবাচ তং ভরদ্বাজঃ প্রসাদাদ্ভরতং বচঃ ॥ ২.৯০.১৯
90.20
ত্বয্যেতত্পুরুষব্যাঘ্র যুক্তং রাঘববংশজে ।
গুরুবৃত্তির্দমশ্চৈব সাধূনাং চানুয়ায়িতা ॥ ২.৯০.২০
90.21
জানে চৈতন্মনঃস্থং তে দৃঢীকরণমস্ত্বিতি ।
অপৃচ্ছং ত্বাং তথাত্যর্থং কীর্ত্তিং সমভিবর্দ্ধয়ন্ ॥ ২.৯০.২১
90.22
জানে চ রামং ধর্ম্মজ্ঞং সসীতং সহলক্ষ্মণম্ ।
অসৌ বসতি তে ভ্রাতা চিত্রকূটে মহাগিরৌ ॥ ২.৯০.২২
90.23
শ্বস্তু গন্তাসি তং দেশং বসাদ্য সহ মন্ত্রিভিঃ ।
এতং মে কুরু সুপ্রাজ্ঞ কামং কামার্থকোবিদ ॥ ২.৯০.২৩
90.24
ততস্তথেত্যেবমুদারদর্শনঃ প্রতীতরূপো ভরতো ঽব্রবীদ্বচঃ ।
চকার বুদ্ধিং চ তদা তদাশ্রমে নিশানিবাসায় নরাধিপাত্মজঃ ॥ ২.৯০.২৪ ॥