সর্গ 89

89.1

ব্যুষ্য রাত্রিং তু তত্রৈব গঙ্গাকূলে স রাঘবঃ ।
ভরতঃ কাল্যমুত্থায় শত্রুঘ্নমিদমব্রবীৎ ।। ২.৮৯.১ ।।

শত্রুঘ্নোত্তিষ্ঠ কিং শেষে নিষাদাধিপতিং গুহম্ ।
শীঘ্রমানয় ভদ্রং তে তারয়িষ্যতি বাহিনীম্ ।। ২.৮৯.২ ।।

জাগর্মি নাহং স্বপিমি তমেবার্য্যং বিচিন্তয়ন্ ।
ইত্যেবমব্রবীদ্ভ্রাত্রা শত্রুঘ্নোপি প্রচোদিতঃ ।। ২.৮৯.৩ ।।

ইতি সংবদতোরেবমন্যোন্যং নরসিংহয়োঃ ।
আগম্য প্রাঞ্জলিঃ কালে গুহো ভরতমব্রবীৎ ।। ২.৮৯.৪ ।।

কচ্চিত্সুখং নদীতীরে ঽবাত্সীঃ কাকুত্স্থ শর্বরীম্ ।
কচ্চিত্তে সহসৈন্যস্য তাবত্সর্বমনাময়ম্ ।। ২.৮৯.৫ ।।

গুহস্য তত্তু বচনং শ্রুত্বা স্নেহাদুদীরিতম্ ।
রামস্যানুবশো বাক্যং ভরতো ঽপীদমব্রবীৎ ।। ২.৮৯.৬ ।।

সুখা নঃ শর্বরী রাজন্ পূজিতাশ্চাপি তে বয়ম্ ।
গঙ্গাং তু নৌভির্বহ্বীভির্দাশাঃ সন্তারয়ন্তু নঃ ।। ২.৮৯.৭ ।।

ততো গুহঃ সংত্বরিতং শ্রুত্বা ভরতশাসনম্ ।
প্রতিপ্রবিশ্য নগরং তং জ্ঞাতিজনমব্রবীৎ ।। ২.৮৯.৮ ।।

উত্তিষ্ঠত প্রবুধ্যধ্বং ভদ্রমস্তু চ বঃ সদা ।
নাবঃ সমনুকর্ষধ্বং তারয়িষ্যাম বাহিনীম্ ।। ২.৮৯.৯ ।।

তে তথোক্তাঃ সমুত্থায় ত্বরিতা রাজশাসনাৎ ।
পঞ্চ নাবাং শতান্যাশু সমানিন্যুঃ সমন্ততঃ ।। ২.৮৯.১০ ।।

অন্যাঃ স্বস্তিকবিজ্ঞেয়া মহাঘণ্টাধরা বরাঃ ।
শোভমানাঃ পতাকাভির্যুক্তবাতাঃ সুসংহতাঃ ।। ২.৮৯.১১ ।।

ততঃ স্বস্তিকবিজ্ঞেয়াং পাণ্ডুকম্বলসংবৃতাম্ ।
সনন্দিঘোষাং কল্যাণীং গুহো নাবমুপাহরৎ ।তামারুরোহ ভরতঃ শত্রুঘ্নশ্চ মহাবলঃ ।। ২.৮৯.১২ ।।

কৌসল্যা চ সুমিত্রা চ যাশ্চান্যা রাজয়োষিতঃ ।
পুরোহিতশ্চ তত্পূর্বং গুরবো ব্রাহ্মণাশ্চ যে ।অনন্তরং রাজদারাস্তথৈব শকটাপণাঃ ।। ২.৮৯.১৩ ।।

আবাসমাদীপয়তাং তীর্থং চাপ্যবগাহতাম্ ।
ভাণ্ডানি চাদদানানাং ঘোষস্ত্রিদিবমস্পৃশৎ ।। ২.৮৯.১৪ ।।

পতাকিন্যস্তু তা নাবঃ স্বয়ং দাশৈরধিষ্ঠিতাঃ ।
বহন্ত্যো জনমারূঢং তদা সম্পেতুরাশুগাঃ ।। ২.৮৯.১৫ ।।

নারীণামভিপূর্ণাস্তু কাশ্চিৎ কাশ্চিচ্চ বাজিনাম্ ।
কাশ্চিদত্র বহন্তি স্ম যানয়ুগ্যং মহাধনম্ ।। ২.৮৯.১৬ ।।

তাঃ স্ম গত্বা পরং তীরমবরোপ্য চ তং জনম্ ।
নিবৃত্তাঃ কাণ্ডচিত্রাণি ক্রিয়ন্তে দাশবন্ধুভিঃ ।। ২.৮৯.১৭ ।।

সবৈজয়ন্তাস্তু গজা গজারোহপ্রচোদিতাঃ ।
তরন্তঃ স্ম প্রকাশন্তে সধ্বজা ইব পর্বতাঃ ।। ২.৮৯.১৮ ।।

নাবশ্চারুরুহুশ্চান্যে প্লবৈস্তেরুস্তথাপরে ।
অন্যে কুম্ভঘটৈস্তেরুরন্যে তেরুশ্চ বাহুভিঃ ।। ২.৮৯.১৯ ।।

সা পুণ্যা ধ্বজিনী গঙ্গা দাশৈঃ সন্তারিতা স্বয়ম্ ।
মৈত্রে মুহূর্ত্তে প্রয়য়ৌ প্রয়াগবনমুত্তমম্ ।। ২.৮৯.২০ ।।

আশ্বাসয়িত্বা চ চমূং মহাত্মা নিবেশয়িত্বা চ যথোপজোষম্ ।
দ্রষ্টুং ভরদ্বাজমৃষিপ্রবর্য্যমৃত্বিগ্বৃতঃ সন্ ভরতঃ প্রতস্থে ।। ২.৮৯.২১ ।।

স ব্রাহ্মণস্যাশ্রমমভ্যুপেত্য মহাত্মনো দেবপুরোহিতস্য ।
দদর্শ রম্যোটজবৃক্ষষণ্ডং মহদ্বনং বিপ্রবরস্য রম্যম্ ।। ২.৮৯.২২ ।।