Utshovসর্গ 96
96.1
তাং তথা দর্শয়িত্বা তু মৈথিলীং গিরিনিম্নগাম্ ।
নিষসাদ গিরিপ্রস্থে সীতাং মাংসেন ছন্দয়ন্ ॥ ২.৯৬.১॥
96.2
ইদং মেধ্যমিদং স্বাদু নিষ্টপ্তমিদমগ্নিনা ।
এবমাস্তে স ধর্মাত্মা সীতয়া সহ রাঘবঃ ॥ ২.৯৬.২॥
96.3
তথা তত্রাসতস্তস্য ভরতস্যোপয়ায়িনঃ ।
সৈন্যরেণুশ্চ শব্দশ্চ প্রাদুরাস্তাং নভস্স্পৃশৌ ॥ ২.৯৬.৩॥
96.4
এতস্মিন্নন্তরে ত্রস্তাঃ শব্দেন মহতা ততঃ ।
অর্দিতা যূথপা মত্তাঃ সয়ূথা দুদ্রুবুর্দিশঃ ॥ ২.৯৬.৪॥
96.5
স তং সৈন্যসমুদ্ধূতং শব্দং শুশ্রাব রাঘবঃ ।
তাংশ্চ বিপ্রদ্রুতান্ সর্বান্ যূথপানন্ববৈক্ষত ॥ ২.৯৬.৫॥
96.6
তাংশ্চ বিদ্রবতো দৃষ্ট্বা তং চ শ্রুত্বা চ নিস্বনম্ ।
উবাচ রামঃ সৌমিত্রিং লক্ষ্মণং দীপ্ততেজসম্ ॥ ২.৯৬.৬॥
96.7
হন্ত লক্ষ্মণ পশ্যেহ সুমিত্রা সুপ্রজাস্ত্বয়া ।
ভীমস্তনিতগম্ভীরস্তুমুলঃ শ্রূয়তে স্বনঃ ॥ ২.৯৬.৭॥
96.8
গজয়ূথানি বা ঽরণ্যে মহিষা বা মহাবনে ।
বিত্রাসিতা মৃগাঃ সিংহৈঃ সহসা প্রদ্রুতা দিশঃ ॥ ২.৯৬.৮॥
96.9
রাজা বা রাজমাত্রো বা মৃগয়ামটতে বনে ।
অন্যদ্বা শ্বাপদং কিঞ্চিৎ সৌমিত্রে জ্ঞাতুমর্হসি ॥ ২.৯৬.৯॥
96.10
সুদুশ্চরো গিরিশ্চায়ং পক্ষিণামপি লক্ষ্মণ ।
সর্বমেতদ্যথাতত্ত্বমচিরাজ্জ্ঞাতুমর্হসি ॥ ২.৯৬.১০॥
96.11
স লক্ষ্মণঃ সংত্বরিতঃ সালমারুহ্য পুষ্পিতম্ ।
প্রেক্ষমাণো দিশঃ সর্বাঃ পূর্বাং দিশমুদৈক্ষত ॥ ২.৯৬.১১॥
96.12
উদঙ্মুখঃ প্রেক্ষমাণো দদর্শ মহতীং চমূম্ ।
রথাশ্বগজসম্বাধাং যত্তৈর্যুক্তাং পদাতিভিঃ ॥ ২.৯৬.১২॥
96.13
তামশ্বগজসম্পূর্ণাং রথধ্বজবিভূষিতাম্ ।
শশংস সেনাং রামায় বচনং চেদমব্রীৎ ॥ ২.৯৬.১৩॥
96.14
অগ্নিং সংশময়ত্বার্যঃ সীতা চ ভজতাং গুহাম্ ।
সজ্যং কুরুষ্ব চাপং চ শরাংশ্চ কবচং তথা ॥ ২.৯৬.১৪॥
96.15
তং রামঃ পুরুষব্যাঘ্রো লক্ষ্মণং প্রত্যুবাচ হ ।
অঙ্গাবেক্ষস্ব সৌমিত্রে কস্যেমাং মন্যসে চমূম্ ॥ ২.৯৬.১৫॥
96.16
এবমুক্তস্তু রামেণ লক্ষ্মণো বাক্যমব্রবীৎ ।
দিধক্ষন্নিব তাং সেনাং রুষিতঃ পাবকো যথা ॥ ২.৯৬.১৬॥
96.17
সম্পন্নং রাজ্যমিচ্ছংস্তু ব্যক্তং প্রাপ্যাভিষেচনম্ ।
আবাং হন্তুং সমভ্যেতি কৈকেয্যা ভরতঃ সুতঃ ॥ ২.৯৬.১৭॥
96.18
এষ বৈ সুমহান্ শ্রীমান্ বিটপী সম্প্রকাশতে ।
বিরাজত্যুদ্গতস্কন্ধঃ কোবিদারধ্বজো রথে ॥ ২.৯৬.১৮॥
96.19
ভজন্ত্যেতে যথা কামমশ্বানারুহ্য শীঘ্রগান্ ।
এতে ভ্রাজন্তি সংহৃষ্টা গজানারুহ্য সাদিনঃ ॥ ২.৯৬.১৯॥
96.20
গৃহীতধনুষৌ চাবাং গিরিং বীরশ্রয়াবহৈ ।
অথবেহৈব তিষ্ঠাবঃ সন্নদ্ধাবুদ্যতায়ুধৌ ॥ ২.৯৬.২০॥
96.21
অপি নৌ বশমাগচ্ছেৎ কোবিদারধ্বজো দণে ॥ ২.৯৬.২১॥
96.22
অপি দ্রক্ষ্যামি ভরতং যত্কৃতে ব্যসনং মহৎ ।
ত্বয়া রাঘব সম্প্রাপ্তং সীতয়া চ ময়া তথা ॥ ২.৯৬.২২॥
96.23
যন্নিমিত্তং ভবান্ রাজ্যাচ্চ্যুতো রাঘব শাশ্বতাৎ ।
সম্প্রাপ্তো ঽয়মরির্বীর ভরতো বধ্য এব মে ॥ ২.৯৬.২৩॥
96.24
ভরতস্য বধে দোষং নাহং পশ্যামি রাঘব ।
পূর্বাপকারিণাং ত্যাগে ন হ্যধর্মো বিধীয়তে ॥ ২.৯৬.২৪॥
96.25
পূর্বাপকারী ভরতস্ত্যক্তধর্মশ্চ রাঘব ।
এতস্মিন্নিহতে কৃত্স্নামনুশাধি বসুন্ধরাম্ ॥ ২.৯৬.২৫॥
96.26
অদ্য পুত্রং হতং সঙ্খ্যে কৈকেয়ী রাজ্যকামুকা ।
ময়া পশ্যেৎ সুদুঃখার্ত্তা হস্তিভগ্নমিব দ্রুমম্ ॥ ২.৯৬.২৬॥
96.27
কৈকেয়ীং চ বধিষ্যামি সানুবন্ধাং সবান্ধবাম্ ।
কলুষেণাদ্য মহতা মেদিনী পরিমুচ্যতাম্ ॥ ২.৯৬.২৭॥
96.28
অদ্যেমং সংয়তং ক্রোধমসত্কারং চ মানদ ।
মোক্ষ্যামি শত্রুসৈন্যেষু কক্ষেষ্বিব হুতাশনম্ ॥ ২.৯৬.২৮॥
96.29
অদ্যৈতচ্চিত্রকূটস্য কাননং নিশিতৈঃ শরৈঃ ।
ভিন্দন্ শত্রুশরীরাণি করিষ্যে শোণিতোক্ষিতম্ ॥ ২.৯৬.২৯॥
96.30
শরৈর্নির্ভিন্নহৃদয়ান্ কুঞ্জরাংস্তুরগাংস্তথা ।
শ্বাপদাঃ পরিকর্ষন্তু নরাংশ্চ নিহতান্ ময়া ॥ ২.৯৬.৩০॥
96.31
শরাণাং ধনুষশ্চাহমনৃণো ঽস্মি মহামৃধে ।
সসৈন্যং ভরতং হত্বা ভবিষ্যামি ন সংশয়ঃ ॥ ২.৯৬.৩১ ॥