Utshovসর্গ 97
97.1
সুসংরব্ধং তু সৌমিত্রিং লক্ষ্মণং ক্রোধমূর্চ্ছিতম্।
রামস্তু পরিসান্ত্ব্যাথ বচনং চেদমব্রবীৎ ॥ ২.৯৭.১॥
97.2
কিমত্র ধনুষা কার্যমসিনা বা সচর্মণা।
মহেষ্বাসে মহাপ্রাজ্ঞে ভরতে স্বয়মাগতে ॥ ২.৯৭.২॥
97.3
পিতুঃ সত্যং প্রতিশ্রুত্য হত্বা ভরতমাগতম্।
কিং করিষ্যামি রাজ্যেন সাপবাদেন লক্ষ্মণ ॥ ২.৯৭.৩॥
97.4
যদ্দ্রব্যং বান্ধবানাং বা মিত্রাণাং বা ক্ষয়ে ভবেৎ।
নাহং তৎ প্রতিগৃহ্ণীয়াং ভক্ষান্ বিষকৃতানিব ॥ ২.৯৭.৪॥
97.5
ধর্মমর্থং চ কামং চ পৃথিবীং চাপি লক্ষ্মণ।
ইচ্ছামি ভবতামর্থে এতৎ প্রতিশ্রৃণোমি তে ॥ ২.৯৭.৫॥
97.6
ভ্রাতঽণাং সঙ্গ্রহার্থং চ সুখার্থং চাপি লক্ষ্মণ।
রাজ্যমপ্যহমিচ্ছামি সত্যেনায়ুধমালভে ॥ ২.৯৭.৬॥
97.7
নেয়ং মম মহী সৌম্য দুর্ল্লভা সাগরাম্বরা।
নহীচ্ছেয়মধর্মেণ শক্রত্বমপি লক্ষ্মণ ॥ ২.৯৭.৭॥
97.8
যদ্বিনা ভরতং ত্বাং চ শত্রুঘ্নং চাপি মানদ।
ভবেন্মম সুখং কিঞ্চিদ্ভস্ম তৎ কুরুতাং শিখী ॥ ২.৯৭.৮॥
97.9
মন্যেঽহমাগতোঽয়োধ্যাং ভরতো ভ্রাতৃবত্সলঃ।
মম প্রাণাৎ প্রিয়তরঃ কুলধর্মমনুস্মরন্ ॥ ২.৯৭.৯॥
97.10
শ্রুত্বা প্রব্রাজিতং মাং হি জটাবল্কলধারিণম্।
জানক্যা সহিতং বীর ত্বয়া চ পুরুষর্ষভ ॥ ২.৯৭.১০॥
97.11
স্নেহেনাক্রান্তহৃদয়ঃ শোকেনাকুলিতেন্দ্রিয়ঃ।
দ্রষ্টুমভ্যাগতো হ্যেষ ভরতো নান্যথা গতঃ ॥ ২.৯৭.১১॥
97.12
অম্বাং চ কৈকয়ীং রুষ্য পরুষং চাপ্রিয়ং বদন্।
প্রসাদ্য পিতরং শ্রীমান্ রাজ্যং মে দাতুমাগতঃ ॥ ২.৯৭.১২॥
97.13
প্রাপ্তকালং যদেষোঽস্মান্ ভরতো দ্রষ্টুমিচ্ছতি।
অস্মাসু মনসাপ্যেষ নাপ্রিয়ং কিঞ্চিদাচরেৎ ॥ ২.৯৭.১৩॥
97.14
বিপ্রিয়ং কৃতপূর্বং তে ভরতেন কদা নু কিম্।
ঈদৃশং বা ভয়ং তেঽদ্য ভরতং যোঽত্র শঙ্কসে ॥ ২.৯৭.১৪॥
97.15
নহি তে নিষ্ঠুরং বাচ্যো ভরতো নাপ্রিয়ং বচঃ।
অহং হ্যপ্রিয়মুক্তঃ স্যাং ভরতস্যাপ্রিয়ে কৃতে ॥ ২.৯৭.১৫॥
97.16
কথং নু পুত্রাঃ পিতরং হন্যুঃ কস্যাঞ্চিদাপদি।
ভ্রাতা বা ভ্রাতরং হন্যাৎ সৌমিত্রে প্রাণমাত্মনঃ ॥ ২.৯৭.১৬॥
97.17
যদি রাজ্যস্য হেতোস্ত্বমিমাং বাচং প্রভাষসে।
বক্ষ্যামি ভরতং দৃষ্ট্বা রাজ্যমস্মৈ প্রদীয়তাম্ ॥ ২.৯৭.১৭॥
97.18
উচ্যমানোঽপি ভরতো ময়া লক্ষ্মণ তত্ত্বতঃ।
রাজ্যমস্মৈ প্রয়চ্ছেতি বাঢমিত্যেব বক্ষ্যতি ॥ ২.৯৭.১৮॥
97.19
তথোক্তো ধর্মশীলেন ভ্রাত্রা তস্য হিতে রতঃ।
লক্ষ্মণঃ প্রবিবেশেব স্বানি গাত্রাণি লজ্জয়া ॥ ২.৯৭.১৯॥
97.20
তদ্বাক্যং লক্ষ্মণঃ শ্রুত্বা ব্রীডিতঃ প্রত্যুবাচ হ।
ত্বাং মন্যে দ্রষ্টুমায়াতঃ পিতা দশরথঃ স্বয়ম্ ॥ ২.৯৭.২০॥
97.21
ব্রীডিতং লক্ষ্মণং দৃষ্ট্বা রাঘবঃ প্রত্যুবাচ হ।
এষ মন্যে মহাবাহুরিহাস্মান্ দ্রষ্টুমাগতঃ ॥ ২.৯৭.২১॥
97.22
অথবা নৌ ধ্রুবং মন্যে মন্যমানঃ সুখোচিতৌ।
বনবাসমনুধ্যায় গৃহায় প্রতিনেষ্যতি ॥ ২.৯৭.২২॥
97.23
ইমাং বাপ্যেষ বৈদেহীমত্যন্তসুখসেবিনীম্।
পিতা মে রাঘবঃ শ্রীমান্ বনাদাদায় যাস্যতি ॥ ২.৯৭.২৩॥
97.24
এতৌ তৌ সম্প্রকাশেতে গোত্রবন্তৌ মনোরমৌ।
বায়ুবেগসমৌ বীর জবনৌ তুরগোত্তমৌ ॥ ২.৯৭.২৪॥
97.25
স এষ সুমহাকায়ঃ কম্পতে বাহিনীমুখে।
নাগঃ শত্রুঞ্জয়ো নাম বৃদ্ধস্তাতস্য ধীমতঃ ॥ ২.৯৭.২৫॥
97.26
ন তু পশ্যামি তচ্ছত্ত্রং পাণ্ডরং লোকসত্কৃতম্।
পিতুর্দিব্যং মহাবাহো সংশয়ো ভবতীহ মে ॥ ২.৯৭.২৬॥
97.27
প্রথমমর্ধমুত্তরার্ধেন যোজনীয়ম্ ॥ ২.৯৭.২৭॥
97.28
অবতীর্য্য তু সালাগ্রাত্তস্মাত্স সমিতিঞ্জয়ঃ।
লক্ষ্মণঃ প্রাঞ্জলির্ভূত্বা তস্থৌ রামস্য পার্শ্বতঃ ॥ ২.৯৭.২৮॥
97.29
ভরতেনাপি সন্দিষ্টা সম্মর্দো ন ভবেদিতি।
সমন্তাত্তস্য শৈলস্য সেনা বাসমকল্পয়ৎ ॥ ২.৯৭.২৯॥
97.30
অধ্যর্দ্ধমিক্ষ্বাকুচমূর্যোজনং পর্বতস্য সা।
পার্শ্বে ন্যবিশদাবৃত্য গজবাজিরথাকুলা ॥ ২.৯৭.৩০॥
97.31
সা চিত্রকূটে ভরতেন সেনা ধর্মং পুরস্কৃত্য বিধূয় দর্প্পম্।
প্রসাদনার্থং রঘুনন্দনস্য বিরাজতে নীতিমতা প্রণীতা ॥ ২.৯৭.৩১ ॥