সর্গ 98

98.1

নিবেশ্য সেনাং তু বিভুঃ পদ্ভ্যাং পাদবতাং বরঃ।
অভিগন্তুং স কাকুত্স্থমিয়েষ গুরুবর্ত্তকম্ ॥ ২.৯৮.১॥

নিবিষ্টমাত্রে সৈন্যে তু যথোদ্দেশং বিনীতবৎ।
ভরতো ভ্রাতরং বাক্যং শত্রুঘ্নমিদমব্রবীৎ ॥ ২.৯৮.২॥

ক্ষিপ্রং বনমিদং সৌম্য নরসঙ্ঘৈঃ সমন্ততঃ।
লুব্ধৈশ্চ সহিতৈরেভিস্ত্বমন্বেষিতুমর্হসি ॥ ২.৯৮.৩॥

গুহো জ্ঞাতিসহস্রেণ শরচাপাসিধারিণা।
সমন্বেষতু কাকুত্স্থাবস্মিন্ পরিবৃতঃ স্বয়ম্ ॥ ২.৯৮.৪॥

অমাত্যৈঃ সহ পৌরৈশ্চ গুরুভিশ্চ দ্বিজাতিভিঃ।
বনং সর্বং চরিষ্যামি পদ্ভ্যাং পরিবৃতঃ স্বয়ম্ ॥ ২.৯৮.৫॥

যাবন্ন রামং দ্রক্ষ্যামি লক্ষ্মণং বা মহাবলম্।
বৈদেহীং বা মহাভাগাং ন মে শান্তির্ভবিষ্যতি ॥ ২.৯৮.৬॥

যাবন্ন চন্দ্রসঙ্কাশং দ্রক্ষ্যামি শুভমাননম্।
ভ্রাতুঃ পদ্মপলাশাক্ষং ন মে শান্তির্ভবিষ্যতি ॥ ২.৯৮.৭॥

যাবন্ন চরণৌ ভ্রাতুঃ পার্থিবব্যঞ্জনান্বিতৌ।
শিরসা ধারয়িষ্যামি ন মে শান্তির্ভবিষ্যতি ॥ ২.৯৮.৮॥

যাবন্ন রাজ্যে রাজ্যার্হঃ পিতৃপৈতামহে স্থিতঃ।
অভিষেকজলক্লিন্নো ন মে শান্তির্ভবিষ্যতি ॥ ২.৯৮.৯॥

সিদ্ধার্থঃ খলু সৌমিত্রির্যশ্চন্দ্রবিমলোপমম্।
মুখং পশ্যতি রামস্য রাজীবাক্ষং মহাদ্যুতি ॥ ২.৯৮.১০॥

কৃতকত্যা মহাভাগা বৈদেহী জনকাত্মজা।
ভর্তারং সাগরান্তায়াঃ পৃথিব্যা যাঽনুগচ্ছতি ॥ ২.৯৮.১১॥

সুভগশ্চিত্রকূটোঽসৌ গিরিরাজোপমো গিরিঃ।
যস্মিন্ বসতি কাকুত্স্থঃ কুবের ইব নন্দনে ॥ ২.৯৮.১২॥

কৃতকার্যমিদং দুর্গং বনং ব্যালনিষেবিতম্।
যদধ্যাস্তে মহাতেজা রামঃ শস্ত্রভৃতাং বরঃ ॥ ২.৯৮.১৩॥

এবমুক্ত্বা মহাতেজা ভরতঃ পুরুষর্ষভঃ।
পদ্ভ্যামেব মহাবাহুঃ প্রবিবেশ মহদ্বনম্ ॥ ২.৯৮.১৪॥

স তানি দ্রুমজালানি জাতানি গিরিসানুষু।
পুষ্পিতাগ্রাণি মধ্যেন জগাম বদতাং বরঃ ॥ ২.৯৮.১৫॥

সমীপত্বাত্তন্মূলদর্শনমিতি ন পুনরুক্তিঃ ॥ ২.৯৮.১৬॥

তং দৃষ্ট্বা ভরতঃ শ্রীমান্ মুমোহ সহবান্ধবঃ।
অত্র রাম ইতি জ্ঞাত্বা গতঃ পারমিবাম্ভসঃ ॥ ২.৯৮.১৭॥

স চিত্রকূটে তু গিরৌ নিশম্য রামাশ্রমং পুণ্যজনোপপন্নম্।
গুহেন সার্দ্ধং ত্বরিতো জগাম পুনর্নিবেশ্যৈব চমূং মহাত্মা ॥ ২.৯৮.১৮ ॥