Utshovসর্গ 99
99.1
নিবিষ্টায়াং তু সেনায়ামুত্সুকো ভরতস্তদা।
জগাম ভ্রাতরং দ্রষ্টুং শত্রুধ্নমনুদর্শয়ন্ ॥ ২.৯৯.১॥
99.2
ঋষিং বসিষ্ঠং সন্দিশ্য মাতঽর্মে শীঘ্রমানয়।
ইতি ত্বরিতমগ্রে স জগাম গুরুবত্সলঃ ॥ ২.৯৯.২॥
99.3
সুমন্ত্রস্ত্বপি শত্রুঘ্নমদূরাদন্বপদ্যত।
রামদর্শনজস্তর্ষো ভরতস্যেব তস্য চ ॥ ২.৯৯.৩॥
99.4
গচ্ছন্নেবাথ ভরতস্তাপসালয়সংস্থিতাম্।
ভ্রাতুঃ পর্ণকুটীং শ্রীমানুটজং চ দদর্শ হ ॥ ২.৯৯.৪॥
99.5
শালায়াস্ত্বগ্রতস্তস্যা দদর্শ ভরতস্তদা।
কাষ্ঠানি চাবভগ্নানি পুষ্পাণ্যুপচিতানি চ ॥ ২.৯৯.৫॥
99.6
সলক্ষ্মণস্য রামস্য দদর্শাশ্রমমীয়ুষঃ।
কৃতং বৃক্ষেষ্বভিজ্ঞানং কুশচীরৈঃ ক্বচিৎ ক্বচিৎ ॥ ২.৯৯.৬॥
99.7
দদর্শ চ বনে তস্মিন্ মহতঃ সঞ্চয়ান্ কৃতান্।
মৃগাণাং মহিষাণাং চ করীষৈঃ শীতকারণাৎ ॥ ২.৯৯.৭॥
99.8
গচ্ছন্নেব মহাবাহুর্দ্যুতিমান্ ভরতস্তদা।
শত্রুঘ্নং চাব্রবীদ্ধৃষ্টস্তানমাত্যাংশ্চ সর্বশঃ ॥ ২.৯৯.৮॥
99.9
মন্যে প্রাপ্তাঃ স্ম তং দেশং ভরদ্বাজো যমব্রবীৎ।
নাতিদূরে হি মন্যেঽহং নদীং মন্দাকিনীমিতঃ ॥ ২.৯৯.৯॥
99.10
উচ্চৈর্বদ্ধানি চীরাণি লক্ষ্মণেন ভবেদয়ম্।
অভিজ্ঞানকৃতঃ পন্থা বিকালে গন্তুমিচ্ছতা ॥ ২.৯৯.১০॥
99.11
ইদং চোদাত্তদন্তানাং কুঞ্জরাণাং তরস্বিনাম্।
শৈলপার্শ্বে পরিক্রান্তমন্যোন্যমভিগর্জতাম্ ॥ ২.৯৯.১১॥
99.12
যমেবাধাতুমিচ্ছন্তি তাপসাঃ সততং বনে।
তস্যাসৌ দৃশ্যতে ধূমঃ সঙ্কুলঃ কৃষ্ণবর্ত্মনঃ ॥ ২.৯৯.১২॥
99.13
অত্রাহং পুরুষব্যাঘ্রং গুরুসংস্কারকারিণম্।
আর্যং দ্রক্ষ্যামি সংহৃষ্টো মহর্ষিমিব রাঘবম্ ॥ ২.৯৯.১৩॥
99.14
অথ গত্বা মুহূর্তং তু চিত্রকূটং স রাঘবঃ।
মন্দাকিনীমনুপ্রাপ্তস্তং জনং চেদমব্রবীৎ ॥ ২.৯৯.১৪॥
99.15
জগত্যাং পুরুষব্যাঘ্র আস্তে বীরাসনে রতঃ।
জনেন্দ্রো নির্জনং প্রাপ্য ধিঙ্মে জন্ম সজীবিতম্ ॥ ২.৯৯.১৫॥
99.16
মত্কৃতে ব্যসনং প্রাপ্তো লোকনাথো মহাদ্যুতিঃ।
সর্বান্ কামান্ পরিত্যজ্য বনে বসতি রাঘবঃ ॥ ২.৯৯.১৬॥
99.17
ইতি লোকসমাক্রুষ্টঃ পাদেষ্বদ্য প্রসাদয়ন্।
রামস্য নিপতিষ্যামি সীতায়া লক্ষ্মণস্য চ ॥ ২.৯৯.১৭॥
99.18
এবং স বিলপংস্তস্মিন্ বনে দশরথাত্মজঃ।
দদর্শ মহতীং পুণ্যাং পর্ণশালাং মনোরমাম্ ॥ ২.৯৯.১৮॥
99.19
সালতালাশ্বকর্ণানাং পর্ণৈর্বহুভিরাবৃতাম্।
বিশালাং মৃদুভিস্তীর্ণাং কুশৈর্বেদিমিবাধ্বরে ॥ ২.৯৯.১৯॥
99.20
শক্রায়ুধনিকাশৈশ্চ কার্মুকৈর্ভারসাধনৈঃ।
রুক্মপৃষ্টষ্ঠৈর্মহাসারৈঃ শোভিতাং শত্রুবাধকৈঃ ॥ ২.৯৯.২০॥
99.21
অর্করশ্মিপ্রতীকাশৈর্ঘোরৈস্তূণীগতৈঃ শরৈঃ।
শোভিতাং দীপ্তবদনৈঃ সর্প্পৈর্ভোগবতীমিব ॥ ২.৯৯.২১॥
99.22
মহারজতবাসোভ্যামসিভ্যাং চ বিরাজিতাম্।
রুক্মবিন্দুবিচিত্রাভ্যাং চর্মভ্যাং চাপি শোভিতাম্ ॥ ২.৯৯.২২॥
99.23
গোধাঙ্গুলিত্রৈরাসক্তৈশ্চিত্রৈঃ কাঞ্চনভূষিতৈঃ।
অরিসঙ্ঘৈরনাধৃষ্যাং মৃগৈঃ সিংহগুহামিব ॥ ২.৯৯.২৩॥
99.24
প্রাগুদক্প্রবণাং বেদিং বিশালাং দীপ্তপাবকাম্।
দদর্শ ভরতস্তত্র পুণ্যাং রামনিবেশনে ॥ ২.৯৯.২৪॥
99.25
নিরীক্ষ্য স মুহূর্ত্তং তু দদর্শ ভরতো গুরম্।
উটজে রামমাসীনং জটামণ্ডলধারিণম্ ॥ ২.৯৯.২৫॥
99.26
তং তু কৃষ্ণাজিনধরং চীরবল্কলবাসসম্।
দদর্শ রামমাসীনমভিতঃ পাবকোপমম্ ॥ ২.৯৯.২৬॥
99.27
সিংহস্কন্ধং মহাবাহুং পুণ্ডরীকনিভেক্ষণম্।
পৃথিব্যাঃ সাগরান্তায়া ভর্ত্তারং ধর্মচারিণম্ ॥ ২.৯৯.২৭॥
99.28
উপবিষ্টং মহাবাহুং ব্রহ্মাণমিব শাশ্বতম্।
স্থণ্ডিলে দর্ভসংস্তীর্ণে সীতয়া লক্ষ্মণেন চ ॥ ২.৯৯.২৮॥
99.29
তং দৃষ্ট্বা ভরতঃ শ্রীমান্ দুঃখশোকপরিপ্লুতঃ।
অভ্যধাবত ধর্মাত্মা ভরতঃ কৈকয়ীসুতঃ ॥ ২.৯৯.২৯॥
99.30
দৃষ্ট্বৈব বিললাপার্ত্তো বাষ্পসন্দিগ্ধয়া গিরা।
অশক্নুবন্ ধারয়িতুং ধৈর্যাদ্বচনমব্রবীৎ ॥ ২.৯৯.৩০॥
99.31
যঃ সংসদি প্রকৃতিভির্ভবেদ্যুক্ত উপাসিতুম্।
বন্যৈর্মৃগৈরুপাসীনঃ সোঽয়মাস্তে মমাগ্রজঃ ॥ ২.৯৯.৩১॥
99.32
বাসোভির্বহুসাহস্রৈর্যো মহাত্মা পুরোচিতঃ।
মৃগাজিনে সোঽয়মিহ প্রবস্তে ধর্মমাচরন্ ॥ ২.৯৯.৩২॥
99.33
অধারয়দ্যো বিবিধাশ্চিত্রাঃ সুমনসস্তদা সোঽয়ং জটাভারমিমং বহতে রাঘবঃ কথম্ ॥ ২.৯৯.৩৩॥
99.34
যস্য যজ্ঞৈর্যথোদ্দিষ্টৈর্যুক্তো ধর্মস্য সঞ্চয়ঃ।
শরীরক্লেশসম্ভূতং স ধর্মং পরিমার্গতে ॥ ২.৯৯.৩৪॥
99.35
চন্দনেন মহার্হেণ যস্যাঙ্গমুপসেবিতম্।
মলেন তস্যাঙ্গমিদং কথমার্যস্য সেব্যতে ॥ ২.৯৯.৩৫॥
99.36
মন্নিমিত্তমিদং দুঃখং প্রাপ্তো রামঃ সুখোচিতঃ।
ধিগ্জীবিতং নৃশংসস্য মম লোকবিগর্হিতম্ ॥ ২.৯৯.৩৬॥
99.37
ইত্যেবং বিলপন্ দীনঃ প্রস্বিন্নমুখপঙ্কজঃ।
পাদাবপ্রাপ্য রামস্য পপাত ভরতো রুদন্ ॥ ২.৯৯.৩৭॥
99.38
দুঃখাভিতপ্তো ভরতো রাজপুত্রো মহাবলঃ।
উক্ত্বার্যেতি সকৃদ্দীনং পুনর্নোবাচ কিঞ্চন ॥ ২.৯৯.৩৮॥
99.39
বাষ্পাপিহিতকণ্ঠশ্চ প্রেক্ষ্য রামং যশস্বিনম্।
আর্যেত্যেবাথ সংক্রুশ্য ব্যাহর্ত্তুং নাশকত্তদা ॥ ২.৯৯.৩৯॥
99.40
শত্রুঘ্নশ্চাপি রামস্য ববন্দে চরণৌ রুদন্।
তাবুভৌ স সমালিঙ্গ্য রামশ্চাশ্রূণ্যবর্ত্তয়ৎ ॥ ২.৯৯.৪০॥
99.41
ততঃ সুমন্ত্রেণ গুহেন চৈব সমীয়তূ রাজসুতাবরণ্যে।
দিবাকরশ্চৈব নিশাকরশ্চ যথাম্বরে শুক্রবৃহস্পতিভ্যাম্ ॥ ২.৯৯.৪১॥
99.42
তান্ পার্থিবান্ বারণয়ূথপাভান্ সমাগতাংস্তত্র মহত্যরণ্যে।
বনৌকসস্তেঽপি সমীক্ষ্য সর্বেপ্যশ্রূণ্যমুঞ্চন্ প্রবিহায় হর্ষম্ ॥ ২.৯৯.৪২ ॥