Utshovসর্গ 100
100.1
জটিলং চীরবসনং প্রাঞ্জলিং পতিতং ভুবি ।
দদর্শ রামো দুর্দর্শং যুগান্তে ভাস্করং যথা ॥ ২.১০০.১॥
100.2
কথঞ্চিদভিবিজ্ঞায় বিবর্ণবদনং কৃশম্ ।
ভ্রাতরং ভরতং রামঃ পরিজগ্রাহ বাহুনা ॥ ২.১০০.২॥
100.3
আঘ্রায় রামস্তং মূর্ধ্নি পরিষ্বজ্য চ রাঘবঃ ।
অঙ্কে ভরতমারোপ্য পর্যপৃচ্ছৎ সমাহিতঃ ॥ ২.১০০.৩॥
100.4
ক্ব নু তে ঽভূৎ পিতা তাত যদরণ্যং ত্বমাগতঃ ।
ন হি ত্বং জীবতস্তস্য বনমাগন্তুমর্হসি ॥ ২.১০০.৪॥
100.5
চিরস্য বত পশ্যামি দূরাদ্ভরতমাগতম্ ।
দুষ্প্রতীকমরণ্যে ঽস্মিন্ কিং তাত বনমাগতঃ ॥ ২.১০০.৫॥
100.6
কচ্চিদ্ধারয়তে তাত রাজা যত্ত্বমিহাগতঃ ।
কচ্চিন্ন দীনঃ সহসা রাজা লোকান্তরং গতঃ ॥ ২.১০০.৬॥
100.7
কচ্চিৎ সৌম্য ন তে রাজ্যং ভ্রষ্টং বালস্য শাশ্বতম্ ॥ ২.১০০.৭॥
100.8
কচ্চিচ্ছুশ্রূষসে তাত পিতরং সত্যবিক্রমম্ ॥ ২.১০০.৮॥
100.9
কচ্চিদ্দশরথো রাজা কুশলী সত্যসঙ্গরঃ ।
রাজসূয়াশ্বমেধানামাহর্ত্তা ধর্মনিশ্চয়ঃ ॥ ২.১০০.৯॥
100.10
স কচ্চিদ্ ব্রাহ্মণো বিদ্বান্ ধর্মনিত্যো মহাদ্যুতিঃ ।
ইক্ষ্বাকূণামুপাধ্যায়ো যথাবত্তাত পূজ্যতে ॥ ২.১০০.১০॥
100.11
সা তাত কচ্চিত্কৌসল্যা সুমিত্রা চ প্রজাবতী ।
সুখিনী কচ্চিদার্য্যা চ দেবী নন্দতি কৈকয়ী ॥ ২.১০০.১১॥
100.12
কচ্চিদ্বিনয়সম্পন্নঃ কুলপুত্রো বহুশ্রুতঃ ।
অনসূয়ুরনুদ্রষ্টা সত্কৃতস্তে পুরোহিতঃ ॥ ২.১০০.১২॥
100.13
কচ্চিদগ্নিষু তে যুক্তো বিধিজ্ঞো মতিমানৃজুঃ ।
হুতং চ হোষ্যমাণং চ কালে বেদয়তে সদা ॥ ২.১০০.১৩॥
100.14
কচ্চিদ্দেবান্ পিতঽন্ মাতঽর্গুরূন্ পিতৃসমানপি ।
বৃদ্ধাংশ্চ তত বৈদ্যাংশ্চ ব্রাহ্মণাংশ্চাভিমন্যসে ॥ ২.১০০.১৪॥
100.15
ইষ্বস্ত্রবরসম্পন্নমর্থশাস্ত্রবিশারদম্ ।
সুধন্বানমুপাধ্যায়ং কচ্চিত্ত্বং তাত মন্যসে ॥ ২.১০০.১৫॥
100.16
কচ্চিদাত্মসমাঃ শূরাঃ শ্রুতবন্তো জিতেন্দ্রিয়াঃ ।
কুলীনাশ্চেঙ্গিতজ্ঞাশ্চ কৃতাস্তে তাত মন্ত্রিণঃ ॥ ২.১০০.১৬॥
100.17
মন্ত্রো বিজয়মূলং হি রাজ্ঞাং ভবতি রাঘব ।
সুসংবৃতো মন্ত্রধরৈরমাত্যৈঃ শাস্ত্রকোবিদৈঃ ॥ ২.১০০.১৭॥
100.18
কচ্চিন্নিদ্রাবশং নৈষীঃ কচ্চিত্কালে প্রবুধ্যসে ।
কচ্চিচ্চাপররাত্রেষু চিন্তয়স্যর্থনৈপুণম্ ॥ ২.১০০.১৮॥
100.19
কচ্চিন্মন্ত্রয়সে নৈকঃ কচ্চিন্ন বহুভিঃ সহ ।
কচ্চিত্তে মন্ত্রিতো মন্ত্রো রাষ্ট্রং ন পরিধাবতি ॥ ২.১০০.১৯॥
100.20
কচ্চিদর্থং বিনিশ্চিত্য লঘুমূলং মহোদয়ম্ ।
ক্ষিপ্রমারভসে কর্ত্তুং ন দীর্ঘয়সি রাঘব ॥ ২.১০০.২০॥
100.21
কচ্চিত্তে সুকৃতান্যেব কৃতরূপাণি বা পুনঃ ।
বিদুস্তে সর্বকার্যাণি ন কর্ত্তব্যানি পার্থিবাঃ ॥ ২.১০০.২১॥
100.22
কচ্চিন্ন তর্কৈর্যুক্ত্যা বা যে চাপ্যপরিকীর্তিতাঃ ।
ত্বয়া বা বা ঽমাত্যৈর্বুধ্যতে তাত মন্ত্রিতম্ ॥ ২.১০০.২২॥
100.23
কচ্চিৎ সহস্রান্ মূর্খাণামেকমিচ্ছসি পণ্ডিতম্ ।
পণ্ডিতো হ্যর্থকৃচ্ছ্রেষু কুর্য্যান্নিঃশ্রেয়সং মহৎ ॥ ২.১০০.২৩॥
100.24
সহস্রাণ্যপি মূর্খাণাং যদ্যুপাস্তে মহীপতিঃ ।
অথবাপ্যয়ুতান্যেব নাস্তি তেষু সহায়তা ॥ ২.১০০.২৪॥
100.25
একোপ্যমাত্যো মেধাবী শূরো দক্ষো বিচক্ষণঃ ।
রাজানং রাজমাত্রং বা প্রাপয়েন্মহতীং শ্রিয়ম্ ॥ ২.১০০.২৫॥
100.26
কচ্চিন্মুখ্যা মহত্স্বেব মধ্যমেষু চ মধ্যমাঃ ।
জঘন্যাস্তু জঘন্যেষু ভৃত্যাঃ কর্মসু যোজিতাঃ ॥ ২.১০০.২৬॥
100.27
অমাত্যানুপধাতীতান্ পিতৃপৈতামহাঞ্ছুচীন্ ।
শ্রেষ্ঠান্ শ্রেষ্ঠেষু কচ্চিত্ত্বং নিয়োজয়সি কর্মসু ॥ ২.১০০.২৭॥
100.28
কচ্চিন্নোগ্রেণ দণ্ডেন ভৃশমুদ্বেজিতপ্রজম্ ।
রাষ্ট্রং তবানুজানন্তি মন্ত্রিণঃ কৈকয়ীসুত ॥ ২.১০০.২৮॥
100.29
কচ্চিত্ত্বাং নাবজানন্তি যাজকাঃ পতিতং যথা ।
উগ্রপ্রতিগ্রহীতারং কাময়ানমিব স্ত্রিয়ঃ ॥ ২.১০০.২৯॥
100.30
উপায়কুশলং বৈদ্যং ভৃত্যসন্দূষণে রতম্ ।
শূরমৈশ্বর্যকামং চ যো ন হন্তি স বধ্যতে ॥ ২.১০০.৩০॥
100.31
কচ্চিদ্ধৃষ্টশ্চ শূরশ্চ মতিমান্ ধৃতিমাঞ্ছুচিঃ ।
কুলীনশ্চানুরক্তশ্চ দক্ষঃ সেনাপতিঃ কৃতঃ ॥ ২.১০০.৩১॥
100.32
বলবন্তশ্চ কচ্চিত্তে মুখ্যা যুদ্ধবিশারদাঃ ।
দৃষ্টাপদানা বিক্রান্তাস্ত্বয়া সত্কৃত্য মানিতাঃ ॥ ২.১০০.৩২॥
100.33
কচ্চিদ্বলস্য ভক্তং চ বেতনং চ যথোচিতম্ ।
সম্প্রাপ্তকালং দাতব্যং দদাসি ন বিলম্বসে ॥ ২.১০০.৩৩॥
100.34
কালাতিক্রমণাচ্চৈব ভক্তবেতনয়োর্ভৃতাঃ ।
ভর্ত্তুঃ কুপ্যন্তি দুষ্যন্তি সো ঽনর্থঃ সুমহান্ স্মৃতঃ ॥ ২.১০০.৩৪॥
100.35
কচ্চিৎ সর্বে ঽনুরক্তাস্ত্বাং কুলপুত্রাঃ প্রধানতঃ ।
কচ্চিত্প্রাণাংস্তবার্থেষু সন্ত্যজন্তি সমাহিতাঃ ॥ ২.১০০.৩৫॥
100.36
কচ্চিজ্জানপদো বিদ্বান্ দক্ষিণঃ প্রতিভানবান্ ।
যথোক্তবাদী দূতস্তে কৃতো ভরত পণ্ডিতঃ ॥ ২.১০০.৩৬॥
100.37
কচ্চিদষ্টাদশান্যেষু স্বপক্ষে দশ পঞ্চ চ ।
ত্রিভিস্ত্রিভিরবিজ্ঞাতৈর্বেত্সি তীর্থানি চারকৈঃ ॥ ২.১০০.৩৭॥
100.38
কচ্চিদ্ব্যপাস্তানহিতান্ প্রতিয়াতাংশ্চ সর্বদা ।
দুর্বলাননবজ্ঞায় বর্ত্তসে রিপুসূদন ॥ ২.১০০.৩৮॥
100.39
কচ্চিন্ন লোকায়তিকান্ ব্রাহ্মণাংস্তাত সেবসে ।
অনর্থকুশলা হ্যেতে বালাঃ পণ্ডিতমানিনঃ ॥ ২.১০০.৩৯॥
100.40
ধর্মশাস্ত্রেষু মুখ্যেষু বিদ্যমানেষু দুর্বুধাঃ ।
বুদ্ধিমান্বীক্ষিকীং প্রাপ্য নিরর্থং প্রবদন্তি তে ॥ ২.১০০.৪০॥
100.41
বীরৈরধ্যুষিতাং পূর্বমস্মাকং তাত পূর্বকৈঃ ।
সত্যনামাং দৃঢদ্বারাং হস্ত্যশ্বরথসঙ্কুলাম্ ॥ ২.১০০.৪১॥
100.42
ব্রাহ্মণৈঃ ক্ষত্িত্রয়ৈর্বৈশ্যৈঃ স্বকর্মনিরতৈঃ সদা ।
জিতেন্দ্রিয়ৈর্মহোত্সাহৈর্বৃতামার্যৈঃ সহস্রশঃ ॥ ২.১০০.৪২॥
100.43
প্রাসাদৈর্বিবিধাকারৈর্বৃতাং বৈদ্যজনাকুলাম্ ।
কচ্চিত্সুমুদিতাং স্ফীতাময়োধ্যাং পরিরক্ষসি ॥ ২.১০০.৪৩॥
100.44
কচ্চিচ্চিত্যশতৈর্জুষ্টঃ সুনিবিষ্টজনাকুলঃ ।
দেবস্থানৈঃ প্রপাভিশ্চ তটাকৈশ্চোপশোভিতঃ ॥ ২.১০০.৪৪॥
100.45
প্রহৃষ্টনরনারীকঃ সমাজোত্সবশোভিতঃ ।
সুকৃষ্টসীমা পশুমান্ হিংসাভিঃ পরিবর্জিতঃ ॥ ২.১০০.৪৫॥
100.46
অদেবমাতৃকো রম্যঃ শ্বাপদৈঃ পরিবর্জিতঃ ।
পরিত্যক্তো ভয়ৈঃ সর্বৈঃ খনিভিশ্চোপশোভিতঃ ॥ ২.১০০.৪৬॥
100.47
বিবর্জিতো নরৈঃ পাপৈর্মম পূর্বৈঃ সুরক্ষিতঃ ।
কচ্চিজ্জনপদঃ স্ফীতঃ সুখং বসতি রাঘব ॥ ২.১০০.৪৭॥
100.48
কচ্চিত্তে দয়িতাঃ সর্বে কৃষিগোরক্ষজীবিনঃ ।
বার্ত্তায়াং সংশ্রিতস্তাত লোকো হি সুখমেধতে ॥ ২.১০০.৪৮॥
100.49
তেষাং গুপ্তিপরীহারৈঃ কচ্চিত্তে ভরণং কৃতম্ ।
রক্ষ্যা হি রাজ্ঞা ধর্মেণ সর্বে বিষয়বাসিনঃ ॥ ২.১০০.৪৯॥
100.50
কচ্চিৎ স্ত্রিয়ঃ সান্ত্বয়সি কচ্চিত্তাশ্চ সুরক্ষিতাঃ ।
কচ্চিন্ন শ্রদ্দধাস্যাসাং কচ্চিদ্ গুহ্যং ন ভাষসে ॥ ২.১০০.৫০॥
100.51
কচ্চিন্নাগবনং গুপ্তং কচ্চিত্তে সন্তি ধেনুকাঃ ।
কচ্চিন্ন গণিকাশ্বানাং কুঞ্জরাণাং চ তৃপ্যসি ॥ ২.১০০.৫১॥
100.52
কচ্চিদ্দর্শয়সে নিত্যং মনুষ্যাণাং বিভূষিতম্ ।
উত্থায়োত্থায় পূর্বাহ্ণে রাজপুত্র মহাপথে ॥ ২.১০০.৫২॥
100.53
কচ্চিন্ন সর্বে কর্মান্তাঃ প্রত্যক্ষাস্তে ঽবিশঙ্কয়া ।
সর্বে বা পুনরুত্সৃষ্টা মধ্যমেবাত্র কারণম্ ॥ ২.১০০.৫৩॥
100.54
কচ্চিৎ সর্বাণি দুর্গাণি ধনধান্যায়ুধোদকৈঃ ।
যন্ত্রৈশ্চ পরিপূর্ণানি তথা শিল্পিধনুর্দ্ধরৈ ॥ ২.১০০.৫৪॥
100.55
আয়স্তে বিপুলঃ কচ্চিৎ কচ্চিদল্পতরো ব্যয়ঃ ।
অপাত্রেষু ন তে কচ্চিত্কোশো গচ্ছতি রাঘব ॥ ২.১০০.৫৫॥
100.56
দেবতার্থে চ পিত্রর্থে ব্রাহ্মণাভ্যাগতেষু চ ।
যোধেষু মিত্রবর্গেষু কচ্চিদ্গচ্ছতি তে ব্যয়ঃ ॥ ২.১০০.৫৬॥
100.57
কচ্চিদার্য্যো বিশুদ্ধাত্মা ঽ ঽক্ষারিতশ্চোরকর্মণা ।
অপৃষ্টঃ শাস্ত্রকুশলৈর্ন লোভাদ্বধ্যতে শুচিঃ ॥ ২.১০০.৫৭॥
100.58
গৃহীতশ্চৈব পৃষ্টশ্চ কালে দৃষ্টঃ সকারণঃ ।
কচ্চিন্ন মুচ্যতে চোরো ধনলোভান্নরর্ষভ ॥ ২.১০০.৫৮॥
100.59
ব্যসনে কচ্চিদাঢ্যস্য দুর্গতস্য চ রাঘব ।
অর্থং বিরাগাঃ পশ্যন্তি তবামাত্যা বহুশ্রুতাঃ ॥ ২.১০০.৫৯॥
100.60
যানি মিথ্যাভিশস্তানাং পতন্ত্যস্রাণি রাঘব ।
তানি পুত্রপশূন্ ঘ্নন্তি প্রীত্যর্থমনুশাসতঃ ॥ ২.১০০.৬০॥
100.61
কচ্চিদ্ বৃদ্ধাংশ্চ বালাংশ্চ বৈদ্যমুখ্যাংশ্চ রাঘব ।
দানেন মনসা বাচা ত্রিভিরেতৈর্বুভূষসে ॥ ২.১০০.৬১॥
100.62
কচ্চিদ্গুরূংশ্চ বৃদ্ধাংশ্চ তাপসান্ দেবতাতিথীন্ ।
চৈত্যাংশ্চ সর্বান্ সিদ্ধার্থান্ ব্রাহ্মণাংশ্চ নমস্যসি ॥ ২.১০০.৬২॥
100.63
কচ্চিদর্থেন বা ধর্মমর্থং ধর্মেণ বা পুনঃ ।
উভৌ বা প্রীতিলোভেন কামেন চ ন বাধসে ॥ ২.১০০.৬৩॥
100.64
কচ্চিদর্থং চ ধর্মং চ কামং চ জয়তাং বর ।
বিভজ্য কালে কালজ্ঞ সর্বান্ বরদ সেবসে ॥ ২.১০০.৬৪॥
100.65
কচ্চিত্তে ব্রাহ্মণাঃ শর্ম সর্বশাস্ত্রার্থকোবিদাঃ ।
আশংসন্তে মহাপ্রাজ্ঞ পৌরজানপদৈঃ সহ ॥ ২.১০০.৬৫॥
100.66
নাস্তিক্যমনৃতং ক্রোধং প্রমাদং দীর্ঘসূত্রতাম্ ।
অদর্শনং জ্ঞানবতামালস্যং পঞ্চবৃত্তিতাম্ ॥ ২.১০০.৬৬॥
100.67
একচিন্তনমর্থানামনর্থজ্ঞৈশ্চ মন্ত্রণম্ ।
নিশ্চিতানামনারম্ভং মন্ত্রস্যাপরিরক্ষণম্ ॥ ২.১০০.৬৭॥
100.68
মঙ্গলস্যাপ্রয়োগং চ প্রত্যুত্থানং চ সর্বতঃ ।
কচ্চিত্ত্বং বর্জয়স্যেতান্ রাজদোষাংশ্চতুর্দশ ॥ ২.১০০.৬৮॥
100.69
দশ পঞ্চ চতুর্বর্গান্ সপ্তবর্গং চ তত্ত্বতঃ ।
অষ্টবর্গং ত্রিবর্গং চ বিদ্যাস্তিস্রশ্চ রাঘব ॥ ২.১০০.৬৯॥
100.70
ইন্দ্রিয়াণাং জয়ং বুদ্ধ্বা ষাঙ্গুণ্যং দৈবমানুষম্ ।
কৃত্যং বিংশতিবর্গঞ্চ তথা প্রকৃতিমণ্ডলম্ ॥ ২.১০০.৭০॥
100.71
যাত্রাদণ্ডবিধানঞ্চ দ্বিয়োনী সন্ধিবিগ্রহৌ ।
কচ্চিদেতান্ মহাপ্রাজ্ঞ যথাবদনুমন্যসে ॥ ২.১০০.৭১॥
100.72
মন্ত্রিভিস্ত্বং যথোদ্দিষ্টৈশ্চতুর্ভিস্ত্রিভিরেব বা ।
কচ্চিৎ সমস্তৈর্ব্যস্তৈশ্চ মন্ত্র মন্ত্রয়সে মিথঃ ॥ ২.১০০.৭২॥
100.73
কচ্চিত্তে সফলা বেদাঃ কচ্চিত্তে সফলাঃ ক্রিয়াঃ ।
কচ্চিত্তে সফলা দারাঃ কচ্চিত্তে সফলং শ্রুতম্ ॥ ২.১০০.৭৩॥
100.74
কচ্চিদেষৈব তে বুদ্ধির্যথোক্তা মম রাঘব ।
আয়ুষ্যা চ যশস্যা চ ধর্মকামার্থসংহিতা ॥ ২.১০০.৭৪॥
100.75
যাং বৃত্তিং বর্ত্ততে তাতো যাং চ নঃ প্রপিতামহাঃ ।
তাং বৃত্তিং বর্ত্তসে কচ্চিদ্যা চ সত্পথগা শুভা ॥ ২.১০০.৭৫॥
100.76
কচ্চিৎ স্বাদু কৃতং ভোজ্যমেকো নাশ্নাসি রাঘব ।
কচ্চিদাশংসমানেভ্যো মিত্রেভ্যঃ সম্প্রয়চ্ছসি ॥ ২.১০০.৭৬॥
100.77
রাজা তু ধর্মেণ হি পালয়িত্বা মহামতির্দণ্ডধরঃ প্রজানাম্ ।
অবাপ্য কৃত্স্নাং বসুধাং যথাবদিতশ্চ্যুতঃ স্বর্গমুপৈতি বিদ্বান্ ॥ ২.১০০.৭৭ ॥