সর্গ 101

101.1

রামস্য বচনং শ্রুত্বা ভরতঃ প্রত্যুবাচ হ ।
কিং মে ধর্মাদ্বিহীনস্য রাজধর্মঃ করিষ্যতি ॥ ২.১০১.১॥

শাশ্বতো ঽয়ং সদা ধর্ম্মঃ স্থিতো ঽস্মাসু নরর্ষভ ।
জ্যেষ্ঠপুত্রে স্থিতে রাজন্ন কনীয়ান্ নৃপো ভবেৎ ॥ ২.১০১.২॥

স সমৃদ্ধাং ময়া সার্দ্ধময়োধ্যাং গচ্ছ রাঘব ।
অভিষেচয় চাত্মানং কুলস্যাস্য ভবায় নঃ ॥ ২.১০১.৩॥

রাজানং মানুষং প্রাহুর্দেবত্বে স মতো মম ।
যস্য ধর্মার্থসহিতং বৃত্তমাহুরমানুষম্ ॥ ২.১০১.৪॥

কেকয়স্থে চ ময়ি তু ত্বয়ি চারণ্যমাশ্রিতে ।
দিবমার্যো গতো রাজা যায়জূকঃ সতাং মতঃ ॥ ২.১০১.৫॥

নিষ্ক্রান্তমাত্রে ভবতি সহসীতে সলক্ষ্মণে ।
দুঃখশোকাভিভূতস্তু রাজা ত্রিদিবমভ্যগাৎ ॥ ২.১০১.৬॥

উত্তিষ্ঠ পুরুষব্যাঘ্র ক্রিয়তামুদকং পিতুঃ ।
অহং চায়ং চ শত্রুঘ্নঃ পূর্বমেব কৃতোদকৌ ॥ ২.১০১.৭॥

প্রিয়েণ খলু দত্তং হি পিতৃলোকেষু রাঘব ।
অক্ষয্যং ভবতীত্যাহুর্ভবাংশ্চৈব পিতুঃ প্রিয়ঃ ॥ ২.১০১.৮॥

ত্বামেব শোচংস্তব দর্শনেপ্সুস্ত্বয্যেব সক্তামনিবর্ত্য বুদ্ধিম্ ।
ত্বয়া বিহীনস্তব শোকরুগ্ণস্ত্বাং সংস্মরন্নস্তমিতঃ পিতা তে ॥ ২.১০১.৯ ॥