Utshovসর্গ 102
102.1
তাং শ্রুত্বা করুণাং বাচং পিতুর্মরণসংহিতাম্ ।
রাঘবো ভরতেনোক্তাং বভূব গতচেতনঃ ॥ ২.১০২.১॥
102.2
তং তু বজ্রমিবোত্সৃষ্টমাহবে দানবারিণা ।
বাগ্বজ্রং ভরতেনোক্তমমনোজ্ঞং পরন্তপঃ ॥ ২.১০২.২॥
102.3
প্রগৃহ্য বাহূ রামো বৈ পুষ্পিতাগ্রো যথা দ্রুমঃ ।
বনে পরশুনা কৃত্তস্তথা ভুবি পপাত হ ॥ ২.১০২.৩॥
102.4
তথা নিপতিতং রামং জগত্যাং জগতীপতিম্ ।
কূলঘাতপরিশ্রান্তং প্রসুপ্তমিব কুঞ্জরম্ ॥ ২.১০২.৪॥
102.5
ভ্রাতরস্তে মহেষ্বাসং সর্বতঃ শোককর্শিতম্ ।
রুদন্তঃ সহ বৈদেহ্যা সিষিচুঃ সলিলেন বৈ ॥ ২.১০২.৫॥
102.6
স তু সংজ্ঞাং পুনর্লব্ধ্বা নেত্রাভ্যামাস্রমুত্সৃজন্ ।
উপাক্রামত কাকুত্স্থঃ কৃপণং বহু ভাষিতুম্ ॥ ২.১০২.৬॥
102.7
স রামঃ স্বর্গতং শ্রুত্বা পিতরং পৃথিবীপতিম্ ।
উবাচ ভরতং বাক্যং ধর্মাত্মা ধর্মসংহিতম্ ॥ ২.১০২.৭॥
102.8
কিং করিষ্যাম্যয়োধ্যায়াং তাতে দিষ্টাং গতিং গতে ।
কস্তাং রাজবরাদ্ধীনাময়োধ্যাং পালয়িষ্যতি ॥ ২.১০২.৮॥
102.9
কিং নু তস্য ময়া কার্য্যং দুর্জাতেন মহাত্মনঃ ।
যো মৃতো মম শোকেন ময়া চাপি ন সংস্কৃতঃ ॥ ২.১০২.৯॥
102.10
অহো ভরত সিদ্ধার্থো যেন রাজা ত্বয়া ঽনঘ ।
শত্রুঘ্নেন চ সর্বেষু প্রেতকৃত্যেষু সত্কৃতঃ ॥ ২.১০২.১০॥
102.11
নিষ্প্রধানামনেকাগ্রাং নরেন্দ্রেণ বিনা কৃতাম্ ।
নিবৃত্তবনবাসোপি নায়োধ্যাং গন্তুমুত্সহে ॥ ২.১০২.১১॥
102.12
সমাপ্তবনবাসং মাময়োধ্যায়াং পরন্তপ ।
কো নু শাসিষ্যতি পুনস্তাতে লোকান্তরং গতে ॥ ২.১০২.১২॥
102.13
পুরা প্রেক্ষ্য সুবৃত্তং মাং পিতা যান্যাহ সান্ত্বয়ন্ ।
বাক্যানি তানি শ্রোষ্যামি কুতঃ কর্ণসুখান্যহম্ ॥ ২.১০২.১৩॥
102.14
এবমুক্ত্বা স ভরতং ভার্যামভ্যেত্য রাঘবঃ ।
উবাচ শোকসন্তপ্তঃ পূর্ণচন্দ্রনিভাননাম্ ॥ ২.১০২.১৪॥
102.15
সীতে মৃতস্তে শ্বশুরঃ পিত্রা হীনো ঽসি লক্ষ্মণ ।
ভরতো দুঃখমাচষ্টে স্বর্গতং পৃথিবীপতিম্ ॥ ২.১০২.১৫॥
102.16
ততো বহুগুণং তেষাং বাষ্পং নেত্রেষ্বজায়ত ।
তথা ব্রুবতি কাকুত্স্থে কুমারাণাং যশস্বিনাম্ ॥ ২.১০২.১৬॥
102.17
ততস্তে ভ্রাতরঃ সর্বে ভৃশমাশ্বাস্য রাঘবম্ ।
অব্রুবন্ জগতীভর্ত্তুঃ ক্রিয়তামুদকং পিতুঃ ॥ ২.১০২.১৭॥
102.18
সা সীতা শ্বশুরং শ্রুত্বা স্বর্গলোকগতং নৃপম্ ।
নেত্রাভ্যামশ্রুপূর্ণাভ্যামশকন্নেক্ষিতুং পতিম্ ॥ ২.১০২.১৮॥
102.19
সান্ত্বয়িত্বা তু তাং রামো রুদন্তীং জনকাত্মজাম্ ।
উবাচ লক্ষ্মণং তত্র দুঃখিতো দুঃখিতং বচঃ ॥ ২.১০২.১৯॥
102.20
আনয়েঙ্গুদিপিণ্যাকং চীরমাহর চোত্তরম্ ।
জলক্রিয়ার্থং তাতস্য গমিষ্যামি মহাত্মনঃ ॥ ২.১০২.২০॥
102.21
সীতা পুরস্তাদ্ব্রজতুত্বমেনামভিতো ব্রজ ।
অহং পশ্চাদ্গমিষ্যামি গতির্হ্যেষা সুদারুণা ॥ ২.১০২.২১॥
102.22
ততো নিত্যানুগস্তেষাং বিদিতাত্মা মহামতিঃ ।
মৃদুর্দান্তশ্চ শান্তশ্চ রামে চ দৃঢভক্তিমান্ ॥ ২.১০২.২২॥
102.23
সুমন্ত্রস্তৈর্নৃপসুতৈঃ সার্দ্ধমাশ্বাস্য রাঘবম্ ।
অবাতারয়দালম্ব্য নদীং মন্দাকিনীং শিবাম্ ॥ ২.১০২.২৩॥
102.24
তে সুতীর্থাং ততঃ কৃচ্ছ্রাদুপাগম্য যশস্বিনঃ ।
নদীং মন্দাকিনীং রম্যাং সদা পুষ্পিতকাননাম্ ॥ ২.১০২.২৪॥
102.25
শীঘ্রস্রোতসমাসাদ্য তীর্থং শিবমকর্দ্দমম্ ।
সিষিচুস্তূদকং রাজ্ঞে তত্রৈতত্তে ভবত্বিতি ॥ ২.১০২.২৫॥
102.26
প্রগৃহ্য চ মহীপালো জলপূরিতমঞ্জলিম্ ।
দিশং যাম্যামভিমুখো রুদন্ বচনমব্রবীৎ ॥ ২.১০২.২৬॥
102.27
এতত্তে রাজশার্দূল বিমলং তোয়মক্ষয়ম্ ।
পিতৃলোকগতস্যাদ্য মদ্দত্তমুপতিষ্ঠতু ॥ ২.১০২.২৭॥
102.28
ততো মন্দাকিনীতীরাৎ প্রত্যুত্তীর্য্য স রাঘবঃ ।
পিতুশ্চকার তেজস্বী নিবাপং ভ্রাতৃভিঃ সহ ॥ ২.১০২.২৮॥
102.29
ঐঙ্গুদং বদরীমিশ্রং পিণ্যাকং দর্ভসংস্তরে ।
ন্যস্য রামঃ সুদুঃখার্ত্তো রুদন্ বচনমব্রবীৎ ॥ ২.১০২.২৯॥
102.30
ইদং ভুঙ্ক্ষ্ব মহারাজ প্রীতো যদশনা বয়ম্ ।
যদন্নঃ পুরুষো ভবতি তদন্নাস্তস্য দেবতাঃ ॥ ২.১০২.৩০॥
102.31
ততস্তেনৈব মার্গেণ প্রত্যুত্তীর্য্য নদীতটাৎ ।
আরুরোহ নরব্যাঘ্রো রম্যসানুং মহীধরম্ ॥ ২.১০২.৩১॥
102.32
ততঃ পর্ণকুটীদ্বারমাসাদ্য জগতীপতিঃ ।
পরিজগ্রাহ বাহুভ্যামুভৌ ভরতলক্ষ্মণৌ ॥ ২.১০২.৩২॥
102.33
তেষাং তু রুদতাং শব্দাৎ প্রতিশ্রুত্কো ঽভবদ্গিরৌ ।
ভ্রাতঽণাং সহ বৈদেহ্যাঃ সিংহানামিব নর্দতাম্ ॥ ২.১০২.৩৩॥
102.34
মহাবলানাং রুদতাং কুর্বতামুদকং পিতুঃ ।
বিজ্ঞায় তুমুলং শব্দং ত্রস্তা ভরতসৈনিকাঃ ॥ ২.১০২.৩৪॥
102.35
অব্রুবংশ্চাপি রামেণ ভরতঃ সঙ্গতো ধ্রুবম্ ।
তেষামেব মহাঞ্ছব্দঃ শোচতাং পিতরং মৃতম্ ॥ ২.১০২.৩৫॥
102.36
অথ বাসান্ পরিত্যজ্য তং সর্বে ঽভিমুখাঃ স্বনম্ ।
অপ্যেকমনসো জগ্মুর্যথাস্থানং প্রধাবিতাঃ ॥ ২.১০২.৩৬॥
102.37
হয়ৈরন্যে গজৈরন্যে রথৈরন্যে স্বলঙ্কৃতৈঃ ।
সুকুমারাস্তথৈবান্যে পদ্ভিরেব নরা যয়ুঃ ॥ ২.১০২.৩৭॥
102.38
অচিরপ্রোষিতং রামং চিরবিপ্রোষিতং যথা ।
দ্রষ্টুকামো জনঃ সর্বো জগাম সহসাশ্রমম্ ॥ ২.১০২.৩৮॥
102.39
ভ্রাতঽণাং ত্বরিতাস্তত্র দ্রষ্টুকামাঃ সমাগমম্ ।
যয়ুর্বহুবিধৈর্যানৈঃ খুরনেমিস্বনাকুলৈঃ ॥ ২.১০২.৩৯॥
102.40
সা ভূমির্বহুভির্যানৈঃ খুরনেমিসমাহতা ।
মুমোচ তুমুলং শব্দং দ্যৌরিবাভ্রসমাগমে ॥ ২.১০২.৪০॥
102.41
তেন বিত্রাসিতা নাগাঃ করেণুপরিবারিতাঃ ।
আবাসয়ন্তো গন্ধেন জগ্মুরন্যদ্বনং ততঃ ॥ ২.১০২.৪১॥
102.42
বরাহবৃকসঙ্ঘাশ্চ মহিষাঃ সর্প্পবানরাঃ ।
ব্যাঘ্রগোকর্ণগবয়াঃ বিত্রেসুঃ পৃষতৈঃ সহ ॥ ২.১০২.৪২॥
102.43
রথাঙ্গসাহ্বা নত্যূহাঃ হংসাঃ কারণ্ডবাঃ প্লবাঃ ।
তথা পুংস্কোকিলাঃ ক্রৌঞ্চা বিসংজ্ঞা ভেজিরে দিশঃ ॥ ২.১০২.৪৩॥
102.44
তেন শব্দেন বিত্রস্তৈরাকাশং পক্ষিভির্বৃতম্ ।
মনুষ্যৈরাবৃতা ভূমিরুভয়ং প্রবভৌ তদা ॥ ২.১০২.৪৪॥
102.45
ততস্তং পুরুষব্যাঘ্রং যশস্বিনমরিন্দমম্ ।
আসীনং স্থণ্ডিলে রামং দদর্শ সহসা জনঃ ॥ ২.১০২.৪৫॥
102.46
বিগর্হমাণঃ কৈকেয়ীং সহিতো মন্থরামপি ।
অভিগম্য জনো রামং বাষ্পপূর্ণমুখো ঽভবৎ ॥ ২.১০২.৪৬॥
102.47
তান্নরান্ বাষ্পপূর্ণাক্ষান্ সমীক্ষ্যাথ সুদুঃখিতান্ ।
পর্য্যষ্বজত ধর্মজ্ঞঃ পিতৃবন্মাতৃবচ্চ সঃ ॥ ২.১০২.৪৭॥
102.48
স তত্র কাংচ্চিৎ পরিষস্বজে নরান্নরাশ্চ কেচিত্তু তমভ্যবাদয়ন্ ।
চকার সর্বান্ সবয়স্য বান্ধবান্ যথার্হমাসাদ্য তদা নৃপাত্মজঃ ॥ ২.১০২.৪৮॥
102.49
স তত্র তেষাং রুদতাং মহাত্মনাং ভুবং চ খং চানুনিনাদয়ন্ স্বনঃ ।
গুহা গিরীণাং চ দিশশ্চ সন্ততং মৃদঙ্গঘোষপ্রতিমঃ প্রশুশ্রুবে ॥ ২.১০২.৪৯ ॥