Utshovসর্গ 103
103.1
বসিষ্ঠঃ পুরতঃ কৃত্বা দারান্ দশরথস্য চ ।
অভিচক্রাম তং দেশং রামদর্শনতর্ষিতঃ ॥ ২.১০৩.১॥
103.2
রাজপত্ন্যশ্চ গচ্ছন্ত্যো মন্দং মন্দাকিনীং প্রতি ।
দদৃশুস্তত্র তত্তীর্থং রামলক্ষ্মণসেবিতম্ ॥ ২.১০৩.২॥
103.3
কৌসল্যা বাষ্পপূর্ণেন মুখেন পরিশুষ্যতা ।
সুমিত্রামব্রবীদ্দীনা যাশ্চান্যা রাজয়োষিতঃ ॥ ২.১০৩.৩॥
103.4
ইদং তেষামনাথানাং ক্লিষ্টমক্লিষ্টকর্মণাম্ ।
বনে প্রাক্কেবলং তীর্থং যে তে নির্বিষয়ীকৃতাঃ ॥ ২.১০৩.৪॥
103.5
ইতঃ সুমিত্রে পুত্রস্তে সদা জলমতন্দ্রিতঃ ।
স্বয়ং হরতি সৌমিত্রির্মম পুত্রস্য কারণাৎ ॥ ২.১০৩.৫॥
103.6
জঘন্যমপি তে পুত্রঃ কৃতবান্ন তু গর্হিতঃ ।
ভ্রাতুর্যদর্থসহিতং সর্বং তদ্বিহিতং গুণৈঃ ॥ ২.১০৩.৬॥
103.7
অদ্যায়মপি তে পুত্রঃ ক্লেশানামতথোচিতঃ ।
নীচানর্থসমাচারং সজ্জং কর্ম প্রমুঞ্চতু ॥ ২.১০৩.৭॥
103.8
দক্ষিণাগ্রেষু দর্ভেষু সা দদর্শ মহীতলে ।
পিতুরিঙ্গুদিপিণ্যাকং ন্যস্তমায়তলোচনা ॥ ২.১০৩.৮॥
103.9
তং ভূমৌ পিতুরার্তেন ন্যস্তং রামেণ বীক্ষ্য সা ।
উবাচ দেবী কৌসল্যা সর্বা দশরথস্ত্রিয়ঃ ॥ ২.১০৩.৯॥
103.10
ইদমিক্ষ্বাকুনাথস্য রাঘবস্য মহাত্মনঃ ।
রাঘবেণ পিতুর্দত্তং পশ্যতৈতদ্যথাবিধি ॥ ২.১০৩.১০॥
103.11
তস্য দেবসমানস্য পার্থিবস্য মহাত্মনঃ ।
নৈতদৌপয়িকং মন্যে ভুক্তভোগস্য ভোজনম্ ॥ ২.১০৩.১১॥
103.12
চতুরন্তাং মহীং ভুক্ত্বা মহেন্দ্রসদৃশো বিভুঃ ।
কথমিঙ্গুদিপিণ্যাকং স ভুঙ্ক্তে বসুধাধিপঃ ॥ ২.১০৩.১২॥
103.13
অতো দুঃখতরং লোকে ন কিঞ্চিৎ প্রতিভাতি মা ।
যত্র রামঃ পিতুর্দদ্যাদিঙ্গুদীক্ষোদমৃদ্ধিমান্ ॥ ২.১০৩.১৩॥
103.14
রামেণেঙ্গুদিপিণ্যাকং পিতুর্দত্তং সমীক্ষ্য মে ।
কথং দুঃখেন হৃদয়ং ন স্ফোটতি সহস্রধা ॥ ২.১০৩.১৪॥
103.15
শ্রুতিস্তু খল্বিয়ং সত্যা লৌকিকী প্রতিভাতি মা ।
যদন্নঃ পুরুষো ভবতি তদন্নাস্তস্য দেবতাঃ ॥ ২.১০৩.১৫॥
103.16
এবমার্ত্তাং সপত্ন্যস্তা জগ্মুরাশ্বাস্য তাং তদা ।
দদৃশুশ্চাশ্রমে রামং স্বর্গচ্যুতমিবামরম্ ॥ ২.১০৩.১৬॥
103.17
সর্বভোগৈঃ পরিত্যক্তং রামং সম্প্রেক্ষ্য মাতরঃ ।
আর্ত্তা মুমুচুরশ্রূণি সস্বরং শোককর্শিতাঃ ॥ ২.১০৩.১৭॥
103.18
তাসাং রামঃ সমুত্থায় জগ্রাহ চরণান্ শুভান্ ।
মাতঽণাং মনুজব্যাঘ্রঃ সর্বাসাং সত্যসঙ্গরঃ ॥ ২.১০৩.১৮॥
103.19
তাঃ পাণিভিঃ সুখস্পর্শৈর্মৃদ্বঙ্গুলিতলৈঃ শুভৈঃ ।
প্রমমার্জূ রজঃ পৃষ্ঠাদ্রামস্যায়তলোচনাঃ ॥ ২.১০৩.১৯॥
103.20
সৌমিত্রিরপি তাঃ সর্বাঃ মাতঽঃ সম্প্রেক্ষ্য দুঃখিতঃ ।
অভ্যবাদয়তাসক্তং শনৈ রামাদনন্তরম্ ॥ ২.১০৩.২০॥
103.21
যথা রামে তথা তস্মিন্ সর্বা ববৃতিরে স্ত্রিয়ঃ ।
বৃত্তিং দশরথাজ্জাতে লক্ষ্মণে শুভলক্ষণে ॥ ২.১০৩.২১॥
103.22
সীতাপি চরণাংস্তাসামুপসংগৃহ্য দুঃখিতা ।
শ্বশ্রূণামশ্রুপূর্ণাক্ষী সা বভূবাগ্রতঃ স্থিতা ॥ ২.১০৩.২২॥
103.23
তাং পরিষ্বজ্য দুঃখার্ত্তাং মাতা দুহিতরং যথা ।
বনবাসকৃশাং দীনাং কৌসল্যা বাক্যমব্রবীৎ ॥ ২.১০৩.২৩॥
103.24
বিদেহরাজস্য সুতা স্নুষা দশরথস্য চ ।
রামপত্নী কথং দুঃখং সম্প্রাপ্তা নির্জনে বনে ॥ ২.১০৩.২৪॥
103.25
পদ্মমাতপসন্তপ্তং পরিক্লিষ্টমিবোত্পলম্ ।
কাঞ্চনং রজসা ধ্বস্তং ক্লিষ্টং চন্দ্রমিবাম্বুদৈঃ ॥ ২.১০৩.২৫॥
103.26
মুখং তে প্রেক্ষ্য মাং শোকো দহত্যগ্নিরিবাশ্রয়ম্ ভৃশং মনসি বৈদেহি ব্যসনারণিসম্ভবঃ ॥ ২.১০৩.২৬॥
103.27
ব্রুবন্ত্যামেবমার্ত্তায়াং জনন্যাং ভরতাগ্রজঃ ।
পাদাবাসাদ্য জগ্রাহ বসিষ্ঠস্য চ রাঘবঃ ॥ ২.১০৩.২৭॥
103.28
পুরোহিতস্যাগ্নিসমস্য বৈ তদা বৃহস্পতেরিন্দ্র ইবামরাধিপঃ ।
প্রগৃহ্য পাদৌ সুসমৃদ্ধতেজসঃ সহৈব তেনোপবিবেশ রাঘবঃ ॥ ২.১০৩.২৮॥
103.29
ততো জঘন্যং সহিতৈঃ সমন্ত্রিভিঃ পুরপ্রধানৈশ্চ সহৈব সৈনিকৈঃ ।
জনেন ধর্মজ্ঞতমেন ধর্মবানুপোপবিষ্টো ভরতস্তদাগ্রজম্ ॥ ২.১০৩.২৯॥
103.30
উপোপবিষ্টস্তু তথা স বীর্যবাংস্তপস্বিবেষেণ সমীক্ষ্য রাঘবম্ ।
শ্রিয়া জ্বলন্তং ভরতঃ কৃতাঞ্জলির্যথা মহেন্দ্রঃ প্রয়তঃ প্রজাপতিম্ ॥ ২.১০৩.৩০॥
103.31
কিমেষ বাক্যং ভরতো ঽদ্য রাঘবং প্রণম্য সত্কৃত্য চ সাধু বক্ষ্যতি ।
ইতীব তস্যার্যজনস্য তত্ত্বতো বভূব কৌতূহলমুত্তমং তদা ॥ ২.১০৩.৩১॥
103.32
স রাঘবঃ সত্যধৃতিশ্চ লক্ষ্মণো মহানুভবো ভরতশ্চ ধার্মিকঃ ।
বৃতাঃ সুহৃদ্ভিশ্চ বিরেজুরধ্বরে যথা সদস্যৈঃ সহিতাস্ত্রয়ো ঽগ্নয়ঃ ॥ ২.১০৩.৩২ ॥