Utshovসর্গ 104
104.1
তং তু রামঃ সমাজ্ঞায় ভ্রাতরং গুরুবত্সলম্ ।
লক্ষ্মণেন সহ ভ্রাত্রা প্রষ্টুং সমুপচক্রমে ॥ ২.১০৪.১॥
104.2
কিমেতদিচ্ছেয়মহং শ্রোতুং প্রব্যাহৃতং ত্বয়া ।
যস্মাত্ত্বমাগতো দেশমিমং চীরজটাজিনী ॥ ২.১০৪.২॥
104.3
কিং নিমিত্তমিমং দেশং কৃষ্ণাজিনজটাধরঃ ।
হিত্বা রাজ্যং প্রবিষ্টস্ত্বং তত্সর্বং বক্তুমর্হসি ॥ ২.১০৪.৩॥
104.4
ইত্যুক্তঃ কৈকয়ীপুত্রঃ কাকুত্স্থেন মহাত্মনা ।
প্রগৃহ্য বলবদ্ভূয়ঃ প্রাঞ্জলির্বাক্যমব্রবীৎ ॥ ২.১০৪.৪॥
104.5
আর্য্যং তাতঃ পরিত্যজ্য কৃত্বা কর্ম সুদুষ্করম্ ।
গতঃ স্বর্গং মহাবাহুঃ পুত্রশোকাভিপীডিতঃ ॥ ২.১০৪.৫॥
104.6
স্ত্রিয়া নিয়ুক্তঃ কৈকেয্যা মম মাত্রা পরন্তপ ।
চকার সুমহত্পাপমিদমাত্ময়শোহরম্ ॥ ২.১০৪.৬॥
104.7
সা রাজ্যফলমপ্রাপ্য বিধবা শোককর্শিতা ।
পতিষ্যতি মহাঘোরে নিরয়ে জননী মম ॥ ২.১০৪.৭॥
104.8
তস্য মে দাসভূতস্য প্রসাদং কর্ত্তুমর্হসি ।
অভিষিঞ্চস্ব চাদ্যৈব রাজ্যেনপ মঘবানিব ॥ ২.১০৪.৮॥
104.9
ইমাঃ প্রকৃতয়ঃ সর্বা বিধবা মাতরশ্চ যাঃ ।
ত্বত্সকাশমনুপ্রাপ্তাঃ প্রসাদং কর্ত্তুমর্হসি ॥ ২.১০৪.৯॥
104.10
তদানুপূর্ব্যা যুক্তং চ যুক্তং চাত্মনি মানদ ।
রাজ্যং প্রাপ্নুহি ধর্মেণ সকামান্ সুহৃদঃ কুরু ॥ ২.১০৪.১০॥
104.11
ভবত্ববিধবা ভূমিঃ সমগ্রা পতিনা ত্বয়া ।
শশিনা বিমলেনেব শারদী রজনী যথা ॥ ২.১০৪.১১॥
104.12
এভিশ্চ সচিবৈঃ সার্দ্ধং শিরসা যাচিতো ময়া ।
ভ্রাতুঃ শিষ্যস্য দাসস্য প্রসাদং কর্ত্তুমর্হসি ॥ ২.১০৪.১২॥
104.13
তদিদং শাশ্বতং পিত্র্যং সর্বং প্রকৃতিমণ্ডলম্ ।
পূজিতং পুরুষব্যাঘ্র নাতিক্রমিতুমর্হসি ॥ ২.১০৪.১৩॥
104.14
এবমুক্ত্বা মহাবাহুঃ সবাষ্পঃ কৈকয়ীসুতঃ ।
রামস্য শিরসা পাদৌ জগ্রাহ বিধিবত্পুনঃ ॥ ২.১০৪.১৪॥
104.15
তং মত্তমিব মাতঙ্গং নিঃশ্বসন্তং পুনঃপুনঃ ।
ভ্রাতরং ভরতং রামঃ পরিষ্বজ্যেদমব্রবীৎ ॥ ২.১০৪.১৫॥
104.16
কুলীনঃ সত্ত্বসম্পন্নস্তেজস্বী চরিতব্রতঃ ।
রাজ্যহেতোঃ কথং পাপমাচরেত্ত্বদ্বিধো জনঃ ॥ ২.১০৪.১৬॥
104.17
ন দোষং ত্বয়ি পশ্যামি সূক্ষ্মমপ্যরিসূদন ।
ন চাপি জননীং বাল্যাত্ত্বং বিগর্হিতুমর্হসি ॥ ২.১০৪.১৭॥
104.18
কামকারো মহাপ্রাজ্ঞ গুরূণাং সর্বদা ঽনঘ ।
উপপন্নেষু দারেষু পুত্রেষু চ বিধীয়তে ॥ ২.১০৪.১৮॥
104.19
বয়মস্য যথা লোকে সঙ্খ্যাতাঃ সৌম্য সাধুভিঃ ।
ভার্য্যাঃ পুত্রাশ্চ শিষ্যাশ্চ ত্বমনু জ্ঞাতুমর্হসি ॥ ২.১০৪.১৯॥
104.20
বনে বা চীরবসনং সৌম্য কৃষ্ণাজিনাম্বরম্ ।
রাজ্যে বাপি মহারাজো মাং বাসয়িতুমীশ্বরঃ ॥ ২.১০৪.২০॥
104.21
যাবত্পিতরি ধর্মজ্ঞে গৌরবং লোকসত্কৃতম্ ।
তাবদ্ধর্মভৃতাং শ্রেষ্ঠ জনন্যামপি গৌরবম্ ॥ ২.১০৪.২১॥
104.22
এতাভ্যাং ধর্মশীলাভ্যাং বনং গচ্ছেতি রাঘব ।
মাতাপিতৃভ্যামুক্তো ঽহং কথমন্যৎ সমাচরে ॥ ২.১০৪.২২॥
104.23
ত্বয়া রাজ্যময়োধ্যায়াং প্রাপ্তব্যং লোকসত্কৃতম্ ।
বস্তব্যং দণ্ডকারণ্যে ময়া বল্কলবাসসা ॥ ২.১০৪.২৩॥
104.24
এবং কৃত্বা মহারাজো বিভাগং লোকসন্নিধৌ ।
ব্যাদিশ্য চ মহাতেজা দিবং দশরথো গতঃ ॥ ২.১০৪.২৪॥
104.25
স চ প্রমাণং ধর্মাত্মা রাজা লোকগুরুস্তব ।
পিত্রা দত্তং যথাভাগমুপভোক্তুং ত্বমর্হসি ॥ ২.১০৪.২৫॥
104.26
চতুর্দশসমাঃ সৌম্য দণ্ডকারণ্যমাশ্রিতঃ ।
উপভোক্ষ্যে ত্বহং দত্তং ভাগং পিত্রা মহাত্মনা ॥ ২.১০৪.২৬॥
104.27
যদব্রবীন্মাং নরলোকসত্কৃতঃ পিতা মহাত্মা বিবুধাধিপোপমঃ ।
তদেব মন্যে পরমাত্মনো হিতং ন সর্বলোকেশ্বরভাবমপ্যহম্ ॥ ২.১০৪.২৭ ॥