Utshovসর্গ 105
105.1
ততঃ পুরুষসিংহানাং বৃতানাং তৈঃ সুহৃদ্গণৈঃ ।
শোচতামেব রজনী দুঃখেন ব্যত্যবর্ত্তত ॥ ২.১০৫.১॥
105.2
রজন্যাং সুপ্রভাতায়াং ভ্রাতরস্তে সুহৃদ্বৃতাঃ ।
মন্দাকিন্যাং হুতং জপ্যং কৃত্বা রামমুপাগমন্ ॥ ২.১০৫.২॥
105.3
তূষ্ণীং তে সমুপাসীনা ন কশ্চিত্কিঞ্চিদব্রবীৎ ।
ভরতস্তু সুহৃন্মধ্যে রামং বচনমব্রবীৎ ॥ ২.১০৫.৩॥
105.4
সান্ত্বিতা মামিকা মাতা দত্তং রাজ্যমিদং মম ।
তদ্দদামি তবৈবাহং ভুঙ্ক্ষ্ব রাজ্যমকণ্টকম্ ॥ ২.১০৫.৪॥
105.5
মহতেবাম্বুবেগেন ভিন্নঃ সেতুর্জলাগমে ।
দুরাবারং ত্বদন্যেন রাজ্যখণ্ডমিদং মহৎ ॥ ২.১০৫.৫॥
105.6
গতিং খর ইবাশ্বস্য তার্ক্ষ্যস্যেব পতত্িত্রণঃ ।
অনুগন্তুং ন শক্তির্মে গতিং তব মহীপতে ॥ ২.১০৫.৬॥
105.7
সুজীবং নিত্যশস্তস্য যঃ পরৈরুপজীব্যতে ।
রাম তেন তু দুর্জীবং যঃ পরানুপজীবতি ॥ ২.১০৫.৭॥
105.8
যথা তু রোপিতো বৃক্ষঃ পুরুষেণ বিবর্দ্ধিতঃ ।
হ্রস্বকেন দুরারোহো রূঢস্কন্ধো মহাদ্রুমঃ ॥ ২.১০৫.৮॥
105.9
স যথা পুষ্পিতো ভূত্বা ফলানি ন বিদর্শয়েৎ ।
স তাং নানুভবেত্প্রীতিং যস্য হেতোঃ প্ররোপিতঃ ॥ ২.১০৫.৯॥
105.10
এষোপমা মহাবাহো তমর্থং বেত্তুমর্হসি ।
যদি ত্বমস্মান্ বৃষভো ভর্ত্তা ভৃত্যান্ন শাধি হি ॥ ২.১০৫.১০॥
105.11
শ্রেণয়স্ত্বাং মহারাজ পশ্যন্ত্বগ্র্যাশ্চ সর্বশঃ ।
প্রতপন্তমিবাদিত্যং রাজ্যে স্থিতমরিন্দমম্ ॥ ২.১০৫.১১॥
105.12
তবা ঽনুয়ানে কাকুত্স্থ মত্তা নর্দন্তু কুঞ্জরাঃ ।
অন্তঃপুরগতা নার্যো নন্দন্তু সুসমাহিতাঃ ॥ ২.১০৫.১২॥
105.13
তস্য সাধ্বিত্যমন্যন্ত নাগরা বিবিধা জনাঃ ।
ভরতস্য বচঃ শ্রুত্বা রামং প্রত্যনুয়াচতঃ ॥ ২.১০৫.১৩॥
105.14
তমেবং দুঃখিতং প্রেক্ষ্য বিলপন্তং যশস্বিনম্ ।
রামঃ কৃতাত্মা ভরতং সমাশ্বাসয় দাত্মবান্ ॥ ২.১০৫.১৪॥
105.15
নাত্মনঃ কামকারো ঽস্তি পুরুষো ঽয়মনীশ্বরঃ ।
ইতশ্চেতরতশ্চৈনং কৃতান্তঃ পরিকর্ষতি ॥ ২.১০৫.১৫॥
105.16
সর্বে ক্ষয়ান্তা নিচয়াঃ পতনান্তাঃ সমুচ্ছ্রয়াঃ ।
সংয়োগা বিপ্রয়োগান্তা মরণান্তং চ জীবিতম্ ॥ ২.১০৫.১৬॥
105.17
যথা ফলানাং পক্বানাং নান্যত্র পতনাদ্ভয়ম্ ।
এবং নরস্য জাতস্য নান্যত্র মরণাদ্ভয়ম্ ॥ ২.১০৫.১৭॥
105.18
যথাগারং দৃঢস্থূণং জীর্ণং ভূত্বা ঽবসীদতি ।
তথৈব সীদন্তি নরা জরামৃত্যুবশঙ্গতাঃ ॥ ২.১০৫.১৮॥
105.19
অত্যেতি রজনী যা তু সা ন প্রতিনিবর্ত্ততে ।
যাত্যেব যমুনা পূর্ণা সমুদ্রমুদকাকুলম্ ॥ ২.১০৫.১৯॥
105.20
অহোরাত্রাণি গচ্ছন্তি সর্বেষাং প্রাণিনামিহ ।
আয়ূংষি ক্ষপয়ন্ত্যাশু গ্রীষ্মে জলমিবাংশবঃ ॥ ২.১০৫.২০॥
105.21
আত্মানমনুশোচ ত্বং কিমন্যমনুশোচসি ।
আয়ুস্তে হীয়তে যস্য স্থিতস্য চ গতস্য চ ॥ ২.১০৫.২১॥
105.22
সহৈব মৃত্যুর্ব্রজতি সহ মৃত্যুর্নিষীদতি ।
গত্বা সুদীর্ঘমধ্বানং সহমৃত্যুর্নিবর্ততে ॥ ২.১০৫.২২॥
105.23
গাত্রেষু বলয়ঃ প্রাপ্তাঃ শ্বেতাশ্চৈব শিরোরুহাঃ ।
জরয়া পুরুষো জীর্ণঃ কিং হি কৃত্বা প্রভাবয়েৎ ॥ ২.১০৫.২৩॥
105.24
নন্দন্ত্যুদিত আদিত্যে নন্দন্ত্যস্তমিতে রবৌ ।
আত্মনো নাববুধ্যন্তে মনুষ্যা জীবিতক্ষয়ম্ ॥ ২.১০৫.২৪॥
105.25
হৃষ্যন্ত্যৃতুমখং দৃষ্ট্বা নবং নবমিহাগতম্ ।
ঋতূনাং পরিবর্ত্তেন প্রাণিনাং প্রাণসংক্ষয়ঃ ॥ ২.১০৫.২৫॥
105.26
যথা কাষ্ঠং চ কাষ্ঠং চ সমেয়াতাং মহার্ণবে ।
সমেত্য চ ব্যপেয়াতাং কালমাসাদ্য কঞ্চন ॥ ২.১০৫.২৬॥
105.27
এবং ভার্যাশ্চ পুত্রাশ্চ জ্ঞাতয়শ্চ ঘনানি চ ।
সমেত্য ব্যবধাবন্তি ধ্রুবো হ্যেষাং বিনাভবঃ ॥ ২.১০৫.২৭॥
105.28
নাত্র কশ্চিদ্যথাভাবং প্রাণী সমভিবর্ত্ততে ।
তেন তস্মিন্ন সামর্থ্যং প্রেতস্যাস্ত্যনুশোচতঃ ॥ ২.১০৫.২৮॥
105.29
যথা হি সার্থং গচ্ছন্তং ব্রূয়াৎ কশ্চিৎ পথি স্থিতঃ ।
অহমপ্যাগমিষ্যামি পৃষ্ঠতো ভবতামিতি ॥ ২.১০৫.২৯॥
105.30
এবং পূর্বৈর্গতো মার্গঃ পিতৃপৈতামহো ধ্রুবঃ ।
তমাপন্নঃ কথং শোচেদ্যস্য নাস্তি ব্যতিক্রমঃ ॥ ২.১০৫.৩০॥
105.31
বয়সঃ পতমানস্য স্রোতসো বা ঽনিবর্তিনঃ ।
আত্মা সুখে নিয়োক্তব্যঃ সুখভাজঃ প্রজাঃ স্মৃতাঃ ॥ ২.১০৫.৩১॥
105.32
ধর্মাত্মা স শুভৈঃ কৃত্স্নৈঃ ক্রতুভিশ্চাপ্তদক্ষিণৈঃ ।
ধূতপাপো গতঃ স্বর্গং পিতা নঃ পৃথিবীপতিঃ ॥ ২.১০৫.৩২॥
105.33
ভৃত্যানাং ভরণাৎ সম্যক্ প্রজানাং পরিপালনাৎ ।
অর্থাদানাচ্চ ধর্মেণ পিতা নস্ত্রিদিবং গতঃ ॥ ২.১০৫.৩৩॥
105.34
কর্মভিস্তু শুভৈরিষ্টৈঃ ক্রতুভিশ্চাপ্তদক্ষিণৈঃ ।
স্বর্গং দশরথঃ প্রাপ্তঃ পিতা নঃ পৃথিবীপতিঃ ॥ ২.১০৫.৩৪॥
105.35
ইষ্ট্বা বহুবিধৈর্যজ্ঞৈর্ভোগাংশ্চাবাপ্য পুষ্কলান্ ।
উত্তমং চায়ুরাসাদ্য স্বর্গতঃ পৃথিবীপতিঃ ॥ ২.১০৫.৩৫॥
105.36
আয়ুরুত্তমমাসাদ্য ভোগানপি চ রাঘবঃ ।
স ন শোচ্যঃ পিতা তাতঃ স্বর্গতঃ সত্কৃতঃ সতাম্ ॥ ২.১০৫.৩৬॥
105.37
স জীর্ণং মানুষং দেহং পরিত্যজ্য পিতা হি নঃ ।
দৈবীমৃদ্ধিমনুপ্রাপ্তো ব্রহ্মলোকবিহারিণীম্ ॥ ২.১০৫.৩৭॥
105.38
তং তু নৈবংবিধঃ কশ্চিৎ প্রাজ্ঞঃ শোচিতুমর্হতি ।
তদ্বিধো যদ্বিধশ্চাপি শ্রুতবান্ বুদ্ধিমত্তরঃ ॥ ২.১০৫.৩৮॥
105.39
এতে বহুবিধাঃ শোকা বিলাপরুদিতে তথা ।
বর্জনীয়া হি ধীরেণ সর্বাবস্থাসু ধীমতা ॥ ২.১০৫.৩৯॥
105.40
স স্বস্থো ভব মাশোচীর্যাত্বা চাবস তাং পুরীম্ ।
তথা পিত্রা নিয়ুক্তো ঽসি বশিনা বদতাং বর ॥ ২.১০৫.৪০॥
105.41
যত্রাহমপি তেনৈব নিয়ুক্তঃ পুণ্যকর্মণা ।
তত্রৈবাহং করিষ্যামি পিতুরার্য্যস্য শাসনম্ ॥ ২.১০৫.৪১॥
105.42
ন ময়া শাসনং তস্য ত্যক্তুং ন্যায্যমরিন্দম ।
তৎ ত্বয়াপি সদা মান্যং স বৈ বন্ধুঃ স নঃ পিতা ॥ ২.১০৫.৪২॥
105.43
তদ্বচঃ পিতুরেবাহং সম্মতং ধর্মচারিণঃ ।
কর্মণা পালয়িষ্যামি বনবাসেন রাঘব ॥ ২.১০৫.৪৩॥
105.44
ধীর্মিকেণানৃশংসেন নরেণ গুরুবর্ত্তিনা ।
ভবিতব্যং নরব্যাঘ্র পরলোকং জিগীষতা ॥ ২.১০৫.৪৪॥
105.45
আত্মানমনুতিষ্ঠ ত্বং স্বভাবেন নরর্ষভ ।
নিশাম্য তু শুভং বৃত্তং পিতুর্দশরথস্য নঃ ॥ ২.১০৫.৪৫॥
105.46
ইত্যেবমুক্ত্বা বচনং মহাত্মা পিতুর্নিদেশপ্রতিপালনার্থম্ ।
যবীয়সং ভ্রাতরমর্থবচ্চ প্রভুর্মুহূর্তাদ্বিররাম রামঃ ॥ ২.১০৫.৪৬ ॥