Utshovসর্গ 106
106.1
এবমুক্ত্বা তু বিরতে রামে বচনমর্থবৎ ।
ততো মন্দাকিনীতীরে রামং প্রকৃতিবত্সলম্ ।উবাচ ভরতশ্চিত্রং ধার্মিকো ধার্মিকং বচঃ ॥ ২.১০৬.১॥
106.2
কো হি স্যাদীদৃশো লোকে যাদৃশস্ত্বমরিন্দম ।
ন ত্বাং প্রব্যথয়েদ্দুঃখং প্রীতির্বা ন প্রহর্ষয়েৎ ॥ ২.১০৬.২॥
106.3
সম্মতশ্চাসি বৃদ্ধানাং তাংশ্চ পৃচ্ছসি সংশয়ান্ ॥ ২.১০৬.৩॥
106.4
যথা মৃতস্তথা জীবন্ যথা ঽসতি তথা সতি ।
যস্যৈষ বুদ্ধিলাভঃ স্যাত্পরিতপ্যেত কেন সঃ ॥ ২.১০৬.৪॥
106.5
পরাবরজ্ঞো যশ্চ স্যাত্তথা ত্বং মনুজাধিপ ।
স এবং ব্যসনং প্রাপ্য ন বিষীদিতুমর্হতি ॥ ২.১০৬.৫॥
106.6
অমরোপম সত্ত্বস্ত্বং মহাত্মা সত্যসঙ্গরঃ ।
সর্বজ্ঞঃ সর্বদর্শী চ বুদ্ধিমাংশ্চাসি রাঘব ॥ ২.১০৬.৬॥
106.7
ন ত্বামেবঙ্গুণৈর্যুক্তং প্রভবাভবকোবিদম্ ।
অবিষহ্যতমং দুঃখমাসাদয়িতুমর্হতি ॥ ২.১০৬.৭॥
106.8
প্রোষিতে ময়ি যত্পাপং মাত্রা মত্কারণাত্কৃতম্ ।
ক্ষুদ্রয়া তদনিষ্টং মে প্রসীদতু ভবান্মম ॥ ২.১০৬.৮॥
106.9
ধর্মবন্ধেন বদ্ধো ঽস্মি তেনেমাং নেহ মাতরম্ ।
হন্মি তীব্রেণ দণ্ডেন দণ্ডার্হাং পাপকারিণীম্ ॥ ২.১০৬.৯॥
106.10
কথং দশরথাজ্জাতঃ শুদ্ধাভিজনকর্মণঃ ।
জানন্ ধর্মমধর্মিষ্ঠং কুর্য্যাং কর্ম জুগুপ্সিতম্ ॥ ২.১০৬.১০॥
106.11
গুরুঃ ক্রিয়াবান্ বৃদ্ধশ্চ রাজা প্রেতঃ পিতেতি চ ।
তাতং ন পরিগর্হেয়ং দৈবতং চেতি সংসদি ॥ ২.১০৬.১১॥
106.12
কো হি ধর্মার্থয়োর্হীনমীদৃশং কর্ম কিল্বিষম্ ।
স্ত্রিয়াঃ প্রিয়ং চিকীর্ষুঃ সন্ কুর্যাদ্ধর্মজ্ঞ ধর্মবিৎ ॥ ২.১০৬.১২॥
106.13
অন্তকালে হি ভূতানি মুহ্যন্তীতি পুরাশ্রুতিঃ ।
রাজ্ঞৈবং কুর্বতা লোকে প্রত্যক্ষং সা শ্রুতিঃ কৃতা ॥ ২.১০৬.১৩॥
106.14
সাধ্বর্থমভিসন্ধায় ক্রোধান্মোহাচ্চ সাহসাৎ ।
তাতস্য যদতিক্রান্তং প্রত্যাহরতু তদ্ভবান্ ॥ ২.১০৬.১৪॥
106.15
পিতুরপতনহেতুত্বাত্তদেবাপত্যত্বেন সম্মতম্ ॥ ২.১০৬.১৫॥
106.16
তদপত্যং ভবানস্তু মা ভবান্ দুষ্কৃতং পিতুঃ ।
অভিপত্তা কৃতং কর্ম লোকে ধীরবিগর্হিতম্ ॥ ২.১০৬.১৬॥
106.17
কৈকেয়ীং মাং চ তাতং চ সুহৃদো বান্ধবাংশ্চ নঃ ।
পৌরজানপদান্ সর্বাংস্ত্রাতু সর্বমিদং ভবান্ ॥ ২.১০৬.১৭॥
106.18
ক্ব চারণ্যং ক্ব চ ক্ষাত্ত্র ক্ব জটাঃ ক্ব চ পালনম্ ।
ঈদৃশং ব্যাহতং কর্ম ন ভবান্ কর্তুমর্হতি ॥ ২.১০৬.১৮॥
106.19
এষ হি প্রথমো ধর্মঃ ক্ষত্িত্রয়স্যাভিষেচনম্ ।
যেন শক্যং মহাপ্রাজ্ঞ প্রজানাং পরিপালনম্ ॥ ২.১০৬.১৯॥
106.20
কশ্চ প্রত্যক্ষমুত্সৃজ্য সংশয়স্থমলক্ষণম্ ।
আয়তিস্থং চরেদ্ধর্মং ক্ষত্ত্রবন্ধুরনিশ্চিতম্ ॥ ২.১০৬.২০॥
106.21
অথ ক্লেশজমেব ত্বং ধর্মং চরিতুমিচ্ছসি ।
ধর্মেণ চতুরো বর্ণান্ পালয়ন্ ক্লেশমাপ্নুহি ॥ ২.১০৬.২১॥
106.22
চতুর্ণামাশ্রমাণাং হি গার্হস্থ্যং শ্রেষ্ঠমাশ্রমম্ ।
প্রাহুর্ধর্মজ্ঞ ধর্মজ্ঞাস্তং কথং ত্যক্তুমর্হসি ॥ ২.১০৬.২২॥
106.23
শ্রুতেন বালঃ স্থানেন জন্মনা ভবতো হ্যহম্ ।
স কথং পালয়িষ্যামি ভূমিং ভবতি তিষ্ঠতি ॥ ২.১০৬.২৩॥
106.24
হীনবুদ্ধিগুণো বালো হীনঃ স্থানেন চাপ্যহম্ ।
ভবতা চ বিনাভূতো ন বর্ত্তয়িতুমুত্সহে ॥ ২.১০৬.২৪॥
106.25
ইদং নিখিলমব্যগ্রং রাজ্যং পিত্র্যমকণ্টকম্ ।
অনুশাধি স্বধর্মেণ ধর্মজ্ঞ সহ বান্ধবৈঃ ॥ ২.১০৬.২৫॥
106.26
ইহৈব ত্বা ঽভিষিঞ্চন্তু সর্বাঃ প্রকৃতয়ঃ সহ ।
ঋত্বিজঃ সবসিষ্ঠাশ্চ মন্ত্রবন্মন্ত্রকোবিদাঃ ॥ ২.১০৬.২৬॥
106.27
অভিষিক্তস্ত্বমস্মাভিরয়োধ্যাং পালনে ব্রজ ।
বিজিত্য তরসা লোকান্ মরুদ্ভিরিব বাসবঃ ॥ ২.১০৬.২৭॥
106.28
ঋণানি ত্রীণ্যপাকুর্বন্ দুর্হৃদঃ সাধু নির্দ্দহন্ ।
সুহৃদস্তর্পয়ন্ কামৈস্ত্বমেবাত্রানুশাধি মাম্ ॥ ২.১০৬.২৮॥
106.29
অদ্যার্য মুদিতাঃ সন্তু সুহৃদস্তে ঽভিষেচনে ।
অদ্য ভীতাঃ পলায়ন্তাং দুর্হৃদস্তে দিশো দশ ॥ ২.১০৬.২৯॥
106.30
আক্রোশং মম মাতুশ্চ প্রমৃজ্য পুরুষর্ষভ ।
অদ্য তত্রভবন্তং চ পিতরং রক্ষ কিল্বিষাৎ ॥ ২.১০৬.৩০॥
106.31
শিরসা ত্বা ঽভিয়াচে ঽহং কুরুষ্ব করুণাং ময়ি ।
বান্ধবেষু চ সর্বেষু ভূতেষ্বিব মহেশ্বরঃ ॥ ২.১০৬.৩১॥
106.32
অথৈতৎ পৃষ্ঠতঃ কৃত্বা বনমেব ভবানিতঃ ।
গমিষ্যতি গমিষ্যামি ভবতা সার্দ্ধমপ্যহম্ ॥ ২.১০৬.৩২॥
106.33
তথাহি রামো ভরতেন তাম্যতা প্রসাদ্যমানঃ শিরসা মহীপতিঃ ।
ন চৈব চক্রে গমনায় সত্ত্ববান্ মতিং পিতুস্তদ্বচনে ব্যবস্থিতঃ ॥ ২.১০৬.৩৩॥
106.34
তদদ্ভুতং স্থৈর্যমবেক্ষ্য রাঘবে সমং জনো হর্ষমবাপ দুঃখিতঃ ।
ন যাত্যয়োধ্যামিতি দুঃখিতো ঽভবৎ স্থিরপ্রতিজ্ঞত্বমবেক্ষ্য হর্ষিতঃ ॥ ২.১০৬.৩৪॥
106.35
তমৃত্বিজো নৈগময়ূথবল্লভাস্তদা বিংসজ্ঞাশ্রুকলাশ্চ মাতরঃ ।
তথা ব্রুবাণং ভরতং প্রতুষ্টুবুঃ প্রণম্য রামং চ যয়াচিরে সহ ॥ ২.১০৬.৩৫ ॥