সর্গ 107

107.1

পুনরেবং ব্রুবাণং তং ভরতং লক্ষ্মণাগ্রজঃ ।
প্রত্যুবাচ ততঃ শ্রীমান্ জ্ঞাতিমধ্যে ঽভিসত্কৃতঃ ॥ ২.১০৭.১॥

উপপন্নমিদং বাক্যং যত্ত্বমেবমভাষথাঃ ।
জাতঃ পুত্রো দশরথাৎ কৈকেয্যাং রাজসত্তমাৎ ॥ ২.১০৭.২॥

পুরা ভ্রাতঃ পিতা নঃ স মাতরং তে সমুদ্বহন্ ।
মাতামহে সমাশ্রৌষীদ্রাজ্যশুল্কমনুত্তমম্ ॥ ২.১০৭.৩॥

দৈবাসুরে চ সঙ্গ্রামে জনন্যৈ তব পার্থিবঃ ।
সম্প্রহৃষ্টো দদৌ রাজা বরমারাধিতঃ প্রভুঃ ॥ ২.১০৭.৪॥

ততঃ সা সম্প্রতিশ্রাব্য তব মাতা যশস্বিনী ।
অয়াচত নরশ্রেষ্ঠং দ্বৌ বরৌ বরবর্ণিনী ॥ ২.১০৭.৫॥

তব রাজ্যং নরব্যাঘ্র মম প্রব্রাজনং তথা ।
তৌ চ রাজা তদা তস্যৈ নিয়ুক্তঃ প্রদদৌ বরৌ ॥ ২.১০৭.৬॥

তেন পিত্রা ঽহমপ্যত্র নিয়ুক্তঃ পুরুষর্ষভ ।
চতুর্দশ বনে বাসং বর্ষাণি বরদানিকম্ ॥ ২.১০৭.৭॥

সো ঽহং বনমিদং প্রাপ্তো নির্জনং লক্ষ্মণান্বিতঃ ।
সীতয়া চাপ্রতিদ্বন্দ্বঃ সত্যবাদে স্থিতঃ পিতুঃ ॥ ২.১০৭.৮॥

ভবানপি তথেত্যেব পিতরং সত্যবাদিনম্ ।
কর্ত্তুমর্হতি রাজেন্দ্র ক্ষিপ্রমেবাভিষেচনাৎ ॥ ২.১০৭.৯॥

ঋণান্মোচয় রাজানং মত্কৃতে ভরত প্রভুম্ ।
পিতরং চাপি ধর্মজ্ঞং মাতরং চাভিনন্দয় ॥ ২.১০৭.১০॥

শ্রূয়তে হি পুরা তাত শ্রুতির্গীতা যশস্বিনা ।
গয়েন যজমানেন গয়েষ্বেব পিতঽন্ প্রতি ॥ ২.১০৭.১১॥

পুন্নাম্নো নরকাদ্যস্মাৎ পিতরং ত্রায়তে সুতঃ ।
তস্মাৎ পুত্র ইতি প্রোক্তঃ পিতঽন্ যত্পাতি বা সুতঃ ॥ ২.১০৭.১২॥

এষ্টব্যা বহবঃ পুত্রা গুণবন্তো বহুশ্রুতাঃ ।
তেষাং বৈ সমবেতানামপি কশ্চিদ্গয়াং ব্রজেৎ ॥ ২.১০৭.১৩॥

এবং রাজর্ষয়ঃ সর্বে প্রতীতা রাজনন্দন ।
তস্মাৎ ত্রাহি নরশ্রেষ্ঠ পিতরং নরকাৎ প্রভো ॥ ২.১০৭.১৪॥

অয়োধ্যাং গচ্ছ ভরত প্রকৃতীরনুরঞ্জয় ।
শত্রুঘ্নসহিতো বীর সহ সর্বৈর্দ্বিজাতিভিঃ ॥ ২.১০৭.১৫॥

প্রবেক্ষ্যে দণ্ডকারণ্যমহমপ্যবিলম্বয়ন্ ।
আভ্যাং তু সহিতো রাজন্ বৈদেহ্যা লক্ষ্মণেন চ ॥ ২.১০৭.১৬॥

ত্বং রাজা ভরত ভব স্বয়ং নরাণাং বন্যানামহমপি রাজরাণ্মৃগাণাম্ ।
গচ্ছত্বং পুরবরমদ্য সম্প্রহৃষ্টঃ সংহৃষ্টস্ত্বহমপি দণ্ডকান্ প্রবেক্ষ্যে ॥ ২.১০৭.১৭॥

ছায়াং তে দিনকরভাঃ প্রবাধমানং বর্ষত্রং ভরত করোতু মূর্ধ্নি শীতাম্ ।
এতেষামহমপি কাননদ্রুমাণাং ছায়াং তামতি শয়িনীং সুখী শ্রয়িষ্যে ॥ ২.১০৭.১৮॥

শত্রুঘ্নঃ কুশলমতিস্তু তে সহায়ঃ সৌমিত্রির্মম বিদিতঃ প্রধানমিত্রম্ ।
চত্বারস্তনয়বরা বয়ং নরেন্দ্রং সত্যস্থং ভরত চরাম মা বিষাদম্ ॥ ২.১০৭.১৯ ॥