সর্গ 108

108.1

আশ্বাসয়ন্তং ভরতং জাবালির্ব্রাহ্মণোত্তমঃ ।
উবাচ রামং ধর্মজ্ঞং ধর্মাপেতমিদং বচঃ ॥ ২.১০৮.১॥

সাধু রাঘব মাভূত্তে বুদ্ধিরেবং নিরর্থিকা ।
প্রাকৃতস্য নরস্যেব হ্যার্যবুদ্ধের্মনস্বিনঃ ॥ ২.১০৮.২॥

কঃ কস্য পুরুষো বন্ধুঃ কিমাপ্যং কস্য কেনচিৎ ।
যদেকো জায়তে জন্তুরেক এব বিনশ্যতি ॥ ২.১০৮.৩॥

তস্মান্মাতা পিতা চেতি রাম সজ্জেতয়ো নরঃ ।
উন্মত্ত ইব স জ্ঞেয়ো নাস্তি কশ্চিদ্ধি কস্যচিৎ ॥ ২.১০৮.৪॥

যথা গ্রামান্তরং গচ্ছন্ নরঃ কশ্চিৎ ক্বচিদ্বসেৎ ।
উত্সৃজ্য চ তমাবাসং প্রতিষ্ঠেতাপরে ঽহনি ॥ ২.১০৮.৫॥

এবমেব মনুষ্যাণাং পিতা মাতা গৃহং বসু ।
আবাসমাত্রং কাকুত্স্থ সজ্জন্তে নাত্র সজ্জনাঃ ॥ ২.১০৮.৬॥

পিত্র্যং রাজ্যং পরিত্যজ্য স নার্হসি নরোত্তম ।
আস্থাতুং কাপথং দুঃখং বিষমং বহুকণ্টকম্ ॥ ২.১০৮.৭॥

সমৃদ্ধায়াময়োধ্যায়ামাত্মানমভিষেচয় ।
একবেণী ধরা হি ত্বাং নগরী সম্প্রতীক্ষতে ॥ ২.১০৮.৮॥

রাজভোগাননুভবন্ মহার্হান্ পার্থিবাত্মজ ।
বিহর ত্বময়োধ্যায়াং যথা শক্রস্ত্রিবিষ্টপে ॥ ২.১০৮.৯॥

ন তে কশ্চিদ্দশরথস্ত্বং চ তস্য ন কশ্চন ।
অন্যো রাজা ত্বমন্যঃ স তস্মাৎ কুরু যদুচ্যতে ॥ ২.১০৮.১০॥

বীজমাত্রং পিতা জন্তোঃ শুক্লং রুধিরমেব চ ।
সংয়ুক্তমৃতুমন্মাত্রা পুরুষস্যেহ জন্ম তৎ ॥ ২.১০৮.১১॥

গতঃ স নৃপতিস্তত্র গন্তব্যং যত্র তেন বৈ ।
প্রবৃত্তিরেষা মর্ত্ত্যানাং ত্বং তু মিথ্যা বিহন্যসে ॥ ২.১০৮.১২॥

অর্থধর্মপরা যে যে তাংস্তান্ শোচামি নেতরান্ ।
তে হি দুঃখমিহ প্রাপ্য বিনাশং প্রেত্য ভেজিরে ॥ ২.১০৮.১৩॥

অষ্টকা পিতৃদৈবত্যমিত্যয়ং প্রসৃতো জনঃ ।
অন্নস্যোপদ্রবং পশ্য মৃতো হি কিমশিষ্যতি ॥ ২.১০৮.১৪॥

যদি ভুক্তমিহান্যেন দেহমন্যস্য গচ্ছতি ।
দদ্যাৎ প্রবসতঃ শ্রাদ্ধং ন তৎ পথ্যশনং ভবেৎ ॥ ২.১০৮.১৫॥

দানসংবননা হ্যেতে গ্রন্থা মেধাবিভিঃ কৃতাঃ ।
যজস্ব দেহি দীক্ষস্ব তপস্তপ্যস্ব সন্ত্যজ ॥ ২.১০৮.১৬॥

স নাস্তি পরমিত্যেব কুরু বুদ্ধিং মহামতে ।
প্রত্যক্ষং যত্তদাতিষ্ঠ পরোক্ষং পৃষ্ঠতঃ কুরু ॥ ২.১০৮.১৭॥

স তাং বুদ্ধিং পুরস্কৃত্য সর্বলোকনিদর্শিনীম্ ।
রাজ্যং ত্বং প্রতিগৃহ্ণীষ্ব ভরতেন প্রসাদিতঃ ॥ ২.১০৮.১৮ ॥