Utshovসর্গ 109
109.1
জাবালেস্তু বচঃ শ্রুত্বা রামঃ সত্যাত্মনাং বরঃ ।
উবাচ পরয়া ভক্ত্যা স্ববুদ্ধ্যা চাবিপন্নয়া ॥ ২.১০৯.১॥
109.2
ভবান্ মে প্রিয়কামার্থং বচনং যদিহোক্তবান্ ।
অকার্য্যং কার্য্যসঙ্কাশমপথ্যং পথ্যসম্মিতম্ ॥ ২.১০৯.২॥
109.3
নির্মর্যাদস্তু পুরুষঃ পাপাচারসমন্বিতঃ ।
মানং ন লভতে সত্সু ভিন্নচারিত্রদর্শনঃ ॥ ২.১০৯.৩॥
109.4
কুলীনমকুলীনং বা বীরং পুরুষমানিনম্ ।
চারিত্রমেব ব্যাখ্যাতি শুচিং বা যদি বা ঽশুচিম্ ॥ ২.১০৯.৪॥
109.5
অনার্যস্ত্বার্যসঙ্কাশঃ শৌচাদ্ধীনস্তথা শুচিঃ ।
লক্ষণ্যবদলক্ষণ্যো দুঃশীলঃ শীলবানিব ॥ ২.১০৯.৫॥
109.6
অধর্মং ধর্মবেষেণ যদীমং লোকসঙ্করম্ ।
অভিপত্স্যে শুভং হিত্বা ক্রিয়াবিধিবিবর্জিতম্ ॥ ২.১০৯.৬॥
109.7
কশ্চেতয়ানঃ পুরুষঃ কার্যাকার্যবিচক্ষণঃ ।
বহুমংস্যতি মাং লোকে দুর্বৃত্তং লোকদূষণম্ ॥ ২.১০৯.৭॥
109.8
কস্য ধাস্যাম্যহং বৃত্তং কেন বা স্বর্গমাপ্নুয়াম্ ।
অনয়া বর্ত্তমানো হি বৃত্ত্যা হীনপ্রতিজ্ঞয়া ॥ ২.১০৯.৮॥
109.9
কামবৃত্তস্ত্বয়ং লোকঃ কৃত্স্নঃ সমুপবর্ত্ততে ।
যদ্বৃত্তাঃ সন্তি রাজানস্তদ্বৃত্তাঃ সন্তি হি প্রজাঃ ॥ ২.১০৯.৯॥
109.10
সত্যমেবানৃশংসঞ্চ রাজবৃত্তং সনাতনম্ ।
তস্মাত্সত্যাত্মকং রাজ্যং সত্যে লোকঃ প্রতিষ্ঠিতঃ ॥ ২.১০৯.১০॥
109.11
ঋষয়শ্চৈব দেবাশ্চ সত্যমেব হি মেনিরে ।
সত্যবাদী হি লোকে ঽস্মিন্ পরমং গচ্ছতি ক্ষয়ম্ ॥ ২.১০৯.১১॥
109.12
উদ্বিজন্তে যথা সর্প্পান্নরাদনৃতবাদিনঃ ।
ধর্মঃ সত্যং পরো লোকে মূলং স্বর্গস্য চোচ্যতে ॥ ২.১০৯.১২॥
109.13
সত্যমেবেশ্বরো লোকে সত্যং পদ্মা শ্রিতা সদা ।
সত্যমূলানি সর্বাণি সত্যান্নাস্তি পরং পদম্ ॥ ২.১০৯.১৩॥
109.14
দত্তমিষ্টং হুতং চৈব তপ্তানি চ তপাংসি চ ।
বেদাঃ সত্যপ্রতিষ্ঠানাস্তস্মাৎ সত্যপরো ভবেৎ ॥ ২.১০৯.১৪॥
109.15
একঃ পালয়তে লোকমেকঃ পালয়তে কুলম্ ।
মজ্জত্যেকো হি নিরয় একঃ স্বর্গে মহীয়তে ॥ ২.১০৯.১৫॥
109.16
সো ঽহং পিতুর্নিয়োগন্তু কিমর্থং নানুপালয়ে ।
সত্যপ্রতিশ্রবঃ সত্যং সত্যেন সময়ীকৃতঃ ॥ ২.১০৯.১৬॥
109.17
নৈব লোভান্ন মোহাদ্বা ন হ্যজ্ঞানাত্তমোন্বিতঃ ।
সেতুং সত্যস্য ভেত্স্যামি গুরোঃ সত্যপ্রতিশ্রবঃ ॥ ২.১০৯.১৭॥
109.18
অসত্যসন্ধস্য সতশ্চলস্যাস্থিরচেতসঃ ।
নৈব দেবা ন পিতরঃ প্রতীচ্ছন্তীতি নঃ শ্রুতম্ ॥ ২.১০৯.১৮॥
109.19
প্রত্যগাত্মমিমং ধর্মং সত্যং পশ্যাম্যহং স্বয়ম্ ।
ভারঃ সত্পুরুষাচীর্ণস্তদর্থমভিমন্যতে ॥ ২.১০৯.১৯॥
109.20
ক্ষাত্ত্রং ধর্মমহং ত্যক্ষ্যে হ্যধর্মং ধর্মসংহিতম্ ।
ক্ষুদ্রৈর্নৃশংসৈর্লুব্ধৈশ্চ সেবিতং পাপকর্মভিঃ ॥ ২.১০৯.২০॥
109.21
কায়েন কুরুতে পাপং মনসা সম্প্রধার্য চ ।
অনৃতং জিহ্বয়া চাহ ত্রিবিধং কর্ম পাতকম্ ॥ ২.১০৯.২১॥
109.22
ভূমিঃ কীর্ত্তির্যশো লক্ষ্মীঃ পুরুষং প্রার্থয়ন্তি হি ।
স্বর্গস্থং চানুপশ্যন্তি সত্যমেব ভজেত তৎ ॥ ২.১০৯.২২॥
109.23
শ্রেষ্ঠং হ্যনার্যমেব স্যাদ্যদ্ভবানবধার্য্য মাম্ ।
আহ যুক্তিকরৈর্বাক্যৈরিদং ভদ্রং কুরুষ্ব হ ॥ ২.১০৯.২৩॥
109.24
কথং হ্যহং প্রতিজ্ঞায় বনবাসমিমং গুরৌ ।
ভরতস্য করিষ্যামি বচো হিত্বা গুরোর্বচঃ ॥ ২.১০৯.২৪॥
109.25
স্থিরা ময়া প্রতিজ্ঞাতা প্রতিজ্ঞা গুরুসন্নিধৌ ।
প্রহৃষ্যমাণা সা দেবী কৈকেয়ী চাভবত্তদা ॥ ২.১০৯.২৫॥
109.26
বনবাসং বসন্নেবং শুচির্নিয়তভোজনঃ ।
মূলৈঃ পুষ্পৈঃ ফলৈঃ পুণ্যৈঃ পিতঽন্ দেবাংশ্চ তর্পয়ন্ ॥ ২.১০৯.২৬॥
109.27
সন্তুষ্টপঞ্চবর্গো ঽহং লোকয়াত্রাং প্রবর্ত্তয়ে ।
অকুহঃ শ্রদ্দধানস্সন্ কার্য্যাকার্য্যবিচক্ষণঃ ॥ ২.১০৯.২৭॥
109.28
কর্মভূমিমিমাং প্রাপ্য কর্ত্তব্যং কর্ম যচ্ছুভম্ ।
অগ্নির্বায়ুশ্চ সোমশ্চ কর্মণাং ফলভাগিনঃ ॥ ২.১০৯.২৮॥
109.29
শতং ক্রতূনামাহৃত্য দেবরাট্ ত্রিদিবঙ্গতঃ ।
তপাংস্যুগ্রাণি চাস্থায় দিবং যাতা মহর্ষয়ঃ ॥ ২.১০৯.২৯॥
109.30
অমৃষ্যমাণঃ পুনরুগ্রতেজা নিশম্য তন্নাস্তিকবাক্যহেতুম্ ।
অথাব্রবীত্তং নৃপতেস্তনূজো বিগর্হমাণো বচনানি তস্য ॥ ২.১০৯.৩০॥
109.31
সত্যং চ ধর্মং চ পরাক্রমং চ ভূতানুকম্পাং প্রিয়বাদিতাঞ্চ ।
দ্বিজাতিদেবাতিথিপূজনং চ পন্থানমাহুস্ত্রিদিবস্য সন্তঃ ॥ ২.১০৯.৩১॥
109.32
তেনৈবমাজ্ঞায় যথাবদর্থমেকোদয়ং সম্প্রতিপদ্য বিপ্রাঃ ।
ধর্মং চরন্তঃ সকলং যথাবৎ কাংক্ষন্তি লোকাগমমপ্রমত্তাঃ ॥ ২.১০৯.৩২॥
109.33
নিন্দাম্যহং কর্ম পিতুঃ কৃতং তদ্যস্ত্বামগৃহ্ণাদ্বিষমস্থবুদ্ধিম্ ।
বুদ্ধ্যানয়ৈবংবিধয়া চরন্তং সুনাস্তিকং ধর্মপথাদপেতম্ ॥ ২.১০৯.৩৩॥
109.34
যথা হি চোরঃ স তথা হি বুদ্ধস্তথাগতং নাস্তিকমত্র বিদ্ধি ।
তস্মাদ্ধি যঃ শঙ্ক্যতমঃ প্রজানাং ন নাস্তিকেনাভিমুখো বুধঃ স্যাৎ ॥ ২.১০৯.৩৪॥
109.35
ত্বত্তো জনাঃ পূর্বতরে বরাশ্চ শুভানি কর্মাণি বহূনি চক্রুঃ ।
জিত্বা সদেমং চ পরঞ্চ লোকং তস্মাদ্দ্বিজাঃ স্বস্তি হুতং কৃতং চ ॥ ২.১০৯.৩৫॥
109.36
ধর্মে রতাঃ সত্পুরুষৈঃ সমেতাস্তেজস্বিনো দানগুণপ্রধানাঃ ।
অহিংসকা বীতমলাশ্চ লোকে ভবন্তি পূজ্যা মুনয়ঃ প্রধানাঃ ॥ ২.১০৯.৩৬॥
109.37
ইতি ব্রুবন্তং বচনং সরোষং রামং মহাত্মানমদীনসত্ত্বম্ ।
উবাচ তথ্যং পুনরাস্তিকং চ সত্যং বচঃ সানুনয়ং চ বিপ্রঃ ॥ ২.১০৯.৩৭॥
109.38
ন নাস্তিকানাং বচনং ব্রবীম্যহং ন নাস্তিকোঽহং ন চ নাস্তি কিঞ্চন।
সমীক্ষ্য কালং পুনরাস্তিকোঽভবং ভবেয় কালে পুনরেব নাস্তিকঃ॥২.১০৯.৩৮॥
109.39
স চাপি কালো ঽয়মুপাগতঃ শনৈর্যথা ময়া নাস্তিকবাগুদীরিতা ।
নিবর্ত্তনার্থং তব রাম কারণাৎ প্রসাদনার্থং তু ময়ৈতদীরিতম্ ॥ ২.১০৯.৩৯ ॥