UtshovSarga 98
98.1
निवेश्य सेनां तु विभुः पद्भ्यां पादवतां वरः।
अभिगन्तुं स काकुत्स्थमियेष गुरुवर्त्तकम् ॥ २.९८.१॥
Niveshya senam tu vibhuh padbhyam padavatam varah
Abhigantum sa kakutsthamiyesha guruvarttakam
98.2
निविष्टमात्रे सैन्ये तु यथोद्देशं विनीतवत्।
भरतो भ्रातरं वाक्यं शत्रुघ्नमिदमब्रवीत् ॥ २.९८.२॥
Nivishtamatre sainye tu yathoddesham vinitavat
Bharato bhrataram vakyam shatrughnamidamabravit
98.3
क्षिप्रं वनमिदं सौम्य नरसङ्घैः समन्ततः।
लुब्धैश्च सहितैरेभिस्त्वमन्वेषितुमर्हसि ॥ २.९८.३॥
Kshipram vanamidam saumya narasanghaih samantatah
Lubdhaishcha sahitairebhistvamanveshitumarhasi
98.4
गुहो ज्ञातिसहस्रेण शरचापासिधारिणा।
समन्वेषतु काकुत्स्थावस्मिन् परिवृतः स्वयम् ॥ २.९८.४॥
Guho gyatisahasrena sharachapasidharina
Samanveshatu kakutsthavasmin parivritah svayam
98.5
अमात्यैः सह पौरैश्च गुरुभिश्च द्विजातिभिः।
वनं सर्वं चरिष्यामि पद्भ्यां परिवृतः स्वयम् ॥ २.९८.५॥
Amatyaih saha pauraishcha gurubhishcha dvijatibhih
Vanam sarvam charishyami padbhyam parivritah svayam
98.6
यावन्न रामं द्रक्ष्यामि लक्ष्मणं वा महाबलम्।
वैदेहीं वा महाभागां न मे शान्तिर्भविष्यति ॥ २.९८.६॥
Yavanna ramam drakshyami lakshmanam va mahabalam
Vaidehim va mahabhagam na me shantirbhavishyati
98.7
यावन्न चन्द्रसङ्काशं द्रक्ष्यामि शुभमाननम्।
भ्रातुः पद्मपलाशाक्षं न मे शान्तिर्भविष्यति ॥ २.९८.७॥
Yavanna chandrasankasham drakshyami shubhamananam
Bhratuh padmapalashaksham na me shantirbhavishyati
98.8
यावन्न चरणौ भ्रातुः पार्थिवव्यञ्जनान्वितौ।
शिरसा धारयिष्यामि न मे शान्तिर्भविष्यति ॥ २.९८.८॥
Yavanna charanau bhratuh parthivavyanjananvitau
Shirasa dharayishyami na me shantirbhavishyati
98.9
यावन्न राज्ये राज्यार्हः पितृपैतामहे स्थितः।
अभिषेकजलक्लिन्नो न मे शान्तिर्भविष्यति ॥ २.९८.९॥
Yavanna rajye rajyarhah pitripaitamahe sthitah
Abhishekajalaklinno na me shantirbhavishyati
98.10
सिद्धार्थः खलु सौमित्रिर्यश्चन्द्रविमलोपमम्।
मुखं पश्यति रामस्य राजीवाक्षं महाद्युति ॥ २.९८.१०॥
Siddharthah khalu saumitriryashchandravimalopamam
Mukham pashyati ramasya rajivaksham mahadyuti
98.11
कृतकत्या महाभागा वैदेही जनकात्मजा।
भर्तारं सागरान्तायाः पृथिव्या याऽनुगच्छति ॥ २.९८.११॥
Kritakatya mahabhaga vaidehi janakatmaja
Bhartaram sagarantayah prithivya yanugachchhati
98.12
सुभगश्चित्रकूटोऽसौ गिरिराजोपमो गिरिः।
यस्मिन् वसति काकुत्स्थः कुबेर इव नन्दने ॥ २.९८.१२॥
Subhagashchitrakutosau girirajopamo girih
Yasmin vasati kakutsthah kubera iva nandane
98.13
कृतकार्यमिदं दुर्गं वनं व्यालनिषेवितम्।
यदध्यास्ते महातेजा रामः शस्त्रभृतां वरः ॥ २.९८.१३॥
Kritakaryamidam durgam vanam vyalanishevitam
Yadadhyaste mahateja ramah shastrabhritam varah
98.14
एवमुक्त्वा महातेजा भरतः पुरुषर्षभः।
पद्भ्यामेव महाबाहुः प्रविवेश महद्वनम् ॥ २.९८.१४॥
Evamuktva mahateja bharatah purusharshabhah
Padbhyameva mahabahuh pravivesha mahadvanam
98.15
स तानि द्रुमजालानि जातानि गिरिसानुषु।
पुष्पिताग्राणि मध्येन जगाम वदतां वरः ॥ २.९८.१५॥
Sa tani drumajalani jatani girisanushu
Pushpitagrani madhyena jagama vadatam varah
98.16
समीपत्वात्तन्मूलदर्शनमिति न पुनरुक्तिः ॥ २.९८.१६॥
Samipatvattanmuladarshanamiti na punaruktih
98.17
तं दृष्ट्वा भरतः श्रीमान् मुमोह सहबान्धवः।
अत्र राम इति ज्ञात्वा गतः पारमिवाम्भसः ॥ २.९८.१७॥
Tam drishtva bharatah shriman mumoha sahabandhavah
Atra rama iti gyatva gatah paramivambhasah
98.18
स चित्रकूटे तु गिरौ निशम्य रामाश्रमं पुण्यजनोपपन्नम्।
गुहेन सार्द्धं त्वरितो जगाम पुनर्निवेश्यैव चमूं महात्मा ॥ २.९८.१८ ॥
Sa chitrakute tu girau nishamya ramashramam punyajanopapannam
Guhena sarddham tvarito jagama punarniveshyaiva chamum mahatma