Utshovসর্গ 113
113.1
ততঃ শিরসি কৃত্বা তু পাদুকে ভরতস্তদা ।
আরুরোহ রথং হৃষ্টঃ শত্রুঘ্নেন সমন্বিতঃ ॥ ২.১১৩.১॥
113.2
বসিষ্ঠো বামদেবশ্চ জাবালিশ্চ দৃঢব্রতঃ ।
অগ্রতঃ প্রয়য়ুঃ সর্বে মন্ত্রিণো মন্ত্রপূজিতাঃ ॥ ২.১১৩.২॥
113.3
মন্দাকিনীং নদীং রম্যাং প্রাঙ্মুখাস্তে যয়ুস্তদা ।
প্রদক্ষিণং চ কুর্বাণাশ্চিত্রকূটং মহাগিরিম্ ॥ ২.১১৩.৩॥
113.4
পশ্যন্ ধাতুসহস্রাণি রম্যাণি বিবিধানি চ ।
প্রয়য়ৌ তস্য পার্শ্বেন সসৈন্যো ভরতস্তদা ॥ ২.১১৩.৪॥
113.5
অদূরাচ্চিত্রকূটস্য দদর্শ ভরতস্তদা ।
আশ্রমং যত্র স মুনির্ভরদ্বাজঃ কৃতালয়ঃ ॥ ২.১১৩.৫॥
113.6
স তমাশ্রমমাগম্য ভরদ্বাজস্য বুদ্ধিমান্ ।
অবতীর্য রথাৎ পাদৌ ববন্দে ভরতস্তদা ॥ ২.১১৩.৬॥
113.7
ততো হৃষ্টো ভরদ্বাজো ভরতং বাক্যমব্রবীৎ ।
অপি কৃত্যং কৃতং তাত রামেণ চ সমাগতম্ ॥ ২.১১৩.৭॥
113.8
এবমুক্তঃ স তু ততো ভরদ্বাজেন ধীমতা ।
প্রত্যুবাচ ভরদ্বাজং ভরতো ভ্রাতৃবত্সলঃ ॥ ২.১১৩.৮॥
113.9
স যাচ্যমানো গুরুণা ময়া চ দৃঢবিক্রমঃ ।
রাঘবঃ পরমপ্রীতো বসিষ্ঠং বাক্যমব্রবীৎ ॥ ২.১১৩.৯॥
113.10
পিতুঃ প্রতিজ্ঞাং তামেব পালয়িষ্যামি তত্ত্বতঃ ।
চতুর্দশ হি বর্ষাণি যা প্রতিজ্ঞা পিতুর্মম ॥ ২.১১৩.১০॥
113.11
এবমুক্তো মহাপ্রাজ্ঞো বসিষ্ঠঃ প্রত্যুবাচ হ ।
বাক্যজ্ঞো বাক্যকুশলং রাঘবং বচনং মহৎ ॥ ২.১১৩.১১॥
113.12
এতে প্রয়চ্ছ সংহৃষ্টঃ পাদুকে হেমভূষিতে ।
অয়োধ্যায়াং মহাপ্রাজ্ঞ যোগক্ষেমকরে তব ॥ ২.১১৩.১২॥
113.13
এবমুক্তো বসিষ্ঠেন রাঘবঃ প্রাঙ্মুখঃ স্থিতঃ ।
পাদুকে অধিরুহ্যৈতে মম রাজ্যায় বৈ দদৌ ॥ ২.১১৩.১৩॥
113.14
নিবৃত্তো ঽহমনুজ্ঞাতো রামেণ সুমহাত্মনা ।
অয়োধ্যামেব গচ্ছামি গৃহীত্বা পাদুকে শুভে ॥ ২.১১৩.১৪॥
113.15
এতচ্ছ্রুত্বা শুভং বাক্যং ভরতস্য মহাত্মনঃ ।
ভরদ্বাজঃ শুভতরং মুনির্বাক্যমুবাচ তম্ ॥ ২.১১৩.১৫॥
113.16
নৈতচ্চিত্রং নরব্যাঘ্র শীলবৃত্তবতাং বর ।
যদার্যং ত্বয়ি তিষ্ঠেত্তু নিম্নে সৃষ্টমিবোদকম্ ॥ ২.১১৩.১৬॥
113.17
অমৃতঃ স মহাবাহুঃ পিতা দশরথস্তব ।
যস্য ত্বমীদৃশঃ পুত্রো ধর্মজ্ঞো ধর্মবত্সলঃ ॥ ২.১১৩.১৭॥
113.18
তমৃষিং তু মহাত্মানমুক্তবাক্যং কৃতাঞ্জলিঃ ।
আমতন্ত্রয়িতুমারেভে চরণাবুপগৃহ্য চ ॥ ২.১১৩.১৮॥
113.19
ততঃ প্রদক্ষিণং কৃত্বা ভরদ্বাজং পুনঃপুনঃ ।
ভরতস্তু যয়ৌ শ্রীমানয়োধ্যাং সহ মন্ত্রিভিঃ ॥ ২.১১৩.১৯॥
113.20
যানৈশ্চ শকটৈশ্চৈব হয়ৈর্নাগৈশ্চ সা চমূঃ ।
পুনর্নিবৃত্তা বিস্তীর্ণা ভরতস্যানুয়ায়িনী ॥ ২.১১৩.২০॥
113.21
ততস্তে যমুনাং দিব্যাং নদীং তীর্ত্বোর্মিমালিনীম্ ।
দদৃশুস্তাং পুনঃ সর্বে গঙ্গাং শুভজলাং নদীম্ ॥ ২.১১৩.২১॥
113.22
তাং রম্যজলসম্পূর্ণাং সন্তীর্য সহবান্ধবঃ ।
শৃঙ্গিবেরপুরং রম্যং প্রবিবেশ সসৈনিকঃ ॥ ২.১১৩.২২॥
113.23
শৃঙ্গিবেরপুরাদ্ভূয়স্ত্বয়োধ্যাং সংদদর্শ হ ॥ ২.১১৩.২৩॥
113.24
অয়োধ্যাং চ ততো দৃষ্ট্বা পিত্রা ভ্রাত্রা বিবর্জিতাম্ ।
ভরতো দুঃখসন্তপ্তঃ সারথিং চেদমব্রবীৎ ॥ ২.১১৩.২৪॥
113.25
সারথে পশ্য বিধ্বস্তা সায়োধ্যা ন প্রকাশতে ।
নিরাকারা নিরানন্দা দীনা প্রতিহতস্বরা ॥ ২.১১৩.২৫ ॥