Utshovসর্গ 112
112.1
তমপ্রতিমতেজোভ্যাং ভ্রাতৃভ্যাং রোমহর্ষণম্ ।
বিস্মিতাঃ সঙ্গমং প্রেক্ষ্য সমবেতা মহর্ষয়ঃ ॥ ২.১১২.১॥
112.2
অন্তর্হিতাস্ত্বৃষিগণাঃ সিদ্ধাশ্চ পরমর্ষয়ঃ ।
তৌ ভ্রাতরৌ মহাত্মানৌ মহাত্মানৌ কাকুত্স্থৌ প্রশশংসিরে ॥ ২.১১২.২॥
112.3
স ধন্যো যস্য পুত্রৌ দ্বৌ ধর্মজ্ঞৌ ধর্মবিক্রমৌ ।
শ্রুত্বা বয়ং হি সম্ভাষামুভয়োঃ স্পৃহয়ামহে ॥ ২.১১২.৩॥
112.4
ততস্ত্বৃষিগণাঃ ক্ষিপ্রং দশগ্রীববধৈষিণঃ ।
ভরতং রাজশার্দূলমিত্যূচুঃ সঙ্গতা বচঃ ॥ ২.১১২.৪॥
112.5
কুলে জাত মহাপ্রাজ্ঞ মহাবৃত্ত মহায়শঃ ।
গ্রাহ্যং রামস্য বাক্যং তে পিতরং যদ্যবেক্ষসে ॥ ২.১১২.৫॥
112.6
সদানৃণমিমং রামং বয়মিচ্ছামহে পিতুঃ ।
অনৃণত্বাচ্চ কৈকেয্যাঃ স্বর্গং দশরথো গতঃ ॥ ২.১১২.৬॥
112.7
এতাবদুক্ত্বা বচনং গন্ধর্বাঃ সমহর্ষয়ঃ ।
রাজর্ষয়শ্চৈব তদা সর্বে স্বাংস্বাং গতিং গতাঃ ॥ ২.১১২.৭॥
112.8
হ্লাদিতস্তেন বাক্যেন শুভেন শুভদর্শনঃ ।
রামঃ সংহৃষ্টবদনস্তানৃষীনভ্যপূজয়ৎ ॥ ২.১১২.৮॥
112.9
স্রস্তগাত্রস্তু ভরতঃ স বাচা সজ্জমানয়া ।
কৃতাঞ্জলিরিদং বাক্যং রাঘবং পুনরব্রবীৎ ॥ ২.১১২.৯॥
112.10
রাজধর্মমনুপ্রেক্ষ্য কুলধর্মানুসন্ততিম্ ।
কর্ত্তুমর্হসি কাকুত্স্থ মম মাতুশ্চ যাচনাম্ ॥ ২.১১২.১০॥
112.11
রক্ষিতুং সুমহদ্রাজ্যমহমেকস্তু নোত্সহে ।
পৌরজানপদাংশ্চাপি রক্তান্ রঞ্জয়িতুং তথা ॥ ২.১১২.১১॥
112.12
জ্ঞাতয়শ্চ হি যোধাশ্চ মিত্রাণি সুহৃদশ্চ নঃ ।
ত্বামেব প্রতিকাংক্ষন্তে পর্জন্যমিব কর্ষকাঃ ॥ ২.১১২.১২॥
112.13
ইদং রাজ্যং মহাপ্রাজ্ঞ স্থাপয় প্রতিপদ্য হি ।
শক্তিমানসি কাকুত্স্থ লোকস্য পরিপালনে ॥ ২.১১২.১৩॥
112.14
ইত্যুক্ত্বা ন্যপতদ্ ভ্রাতুঃ পাদয়োর্ভরতস্তদা ।
ভৃশং সম্প্রার্থয়ামাস রামমেব প্রিয়ংবদঃ ॥ ২.১১২.১৪॥
112.15
তমঙ্কে ভ্রাতরং কৃত্বা রামো বচনমব্রবীৎ ।
শ্যামং নলিনপত্রাক্ষং মত্তহংসস্বরং স্বয়ম্ ॥ ২.১১২.১৫॥
112.16
আগতা ত্বামিয়ং বুদ্ধিঃ স্বজা বৈনয়িকী চ যা ।
ভৃশমুত্সহসে তাত রক্ষিতুং পৃথিবীমপি ॥ ২.১১২.১৬॥
112.17
অমাত্যৈশ্চ সুহৃদ্ভিশ্চ বুদ্ধিমদ্ভিশ্চ মন্ত্রিভিঃ ।
সর্বকার্যাণি সম্মন্ত্র্য সুমহান্ত্যপি কারয় ॥ ২.১১২.১৭॥
112.18
লক্ষ্মীশ্চন্দ্রাদপেয়াদ্বা হিমবান্ বা হিমং ত্যজেৎ ।
অতীয়াৎ সাগরো বেলাং ন প্রতিজ্ঞামহং পিতুঃ ॥ ২.১১২.১৮॥
112.19
কামাদ্বা তাত লোভাদ্বা মাত্রা তুভ্যমিদং কৃতম্ ।
ন তন্মনসি কর্ত্তব্যং বর্ত্তিতব্যং চ মাতৃবৎ ॥ ২.১১২.১৯॥
112.20
এবং ব্রুবাণং ভরতঃ কৌসল্যাসুতমব্রবীৎ ।
তেজসাদিত্যসঙ্কাশং প্রতিপচ্চন্দ্রদর্শনম্ ॥ ২.১১২.২০॥
112.21
অধিরোহার্য পাদাভ্যাং পাদুকে হেমভূষিতে ।
এতে হি সর্বলোকস্য যোগক্ষেমং বিধাস্যতঃ ॥ ২.১১২.২১॥
112.22
সো ঽধিরুহ্য নরব্যাঘ্রঃ পাদুকে হ্যবরুহ্য চ ।
প্রায়চ্ছৎ সুমহাতেজা ভরতায় মহাত্মনে ॥ ২.১১২.২২॥
112.23
স পাদুকে সম্প্রণম্য রামং বচনমব্রবীৎ ।
চতুর্দশ হি বর্ষাণি জটাচীরধরো হ্যহম্ ॥ ২.১১২.২৩॥
112.24
ফলমূলাশনো বীর ভবেয়ং রঘুনন্দন ।
তবাগমনমাকাংক্ষন্ বসন্ বৈ নগরাদ্বহিঃ ॥ ২.১১২.২৪॥
112.25
তব পাদুকয়োর্ন্যস্তরাজ্যতন্ত্রঃ পরন্তপ ।
চতুর্দশে হি সম্পূর্ণে বর্ষে ঽহনি রঘূত্তম ।ন দ্রক্ষ্যামি যদি ত্বাং তু প্রবেক্ষ্যামি হুতাশনম্ ॥ ২.১১২.২৫॥
112.26
তথেতি চ প্রতিজ্ঞায় তং পরিষ্বজ্য সাদরম্ ।
শত্রুঘ্নং চ পরিষ্বজ্য ভরতং চেদমব্রবীৎ ॥ ২.১১২.২৬॥
112.27
মাতরং রক্ষ কৈকেয়ীং মা রোষং কুরু তাং প্রতি ।
ময়া চ সীতয়া চৈব শপ্তো ঽসি রঘুসত্তম ॥ ২.১১২.২৭॥
112.28
ইত্যুক্ত্বা ঽশ্রুপরীতাক্ষো ভ্রাতরং বিসসর্জ হ ॥ ২.১১২.২৮॥
112.29
স পাদুকে তে ভরতঃ প্রতাপবান্ স্বলঙ্কৃতে সম্পরিপূজ্য ধর্মবিৎ ।
প্রদক্ষিণং চৈব চকার রাঘবং চকার চৈবোত্তমনাগমূর্দ্ধনি ॥ ২.১১২.২৯॥
112.30
অথানুপূর্ব্যাৎ প্রতিনন্দ্য তং জনং গুরূংশ্চ মন্ত্রিপ্রকৃতীস্তথানুজৌ ।
ব্যসর্জয়দ্রাঘববংশবর্দ্ধনঃ স্থিরঃ স্বধর্মে হিমবানিবাচলঃ ॥ ২.১১২.৩০॥
112.31
তং মাতরো বাষ্পগৃহীতকণ্ঠ্যো দুঃখেন নামন্ত্রয়িতুং হি শেকুঃ ।
স ত্বেব মাতঽরভিবাদ্য সর্বা রুদন্ কুটীং স্বাং প্রবিবেশ রামঃ ॥ ২.১১২.৩১ ॥