Utshovসর্গ 111
111.1
বসিষ্ঠস্তু তদা রামমুক্ত্বা রাজপুরোহিতঃ ।
অব্রবীদ্ধর্মসংয়ুক্তং পুনরেবাপরং বচঃ ॥ ২.১১১.১॥
111.2
পুরুষস্যেহ জাতস্য ভবন্তি গুরবস্ত্রয়ঃ ।
আচার্য্যশ্চৈব কাকুত্স্থ পিতা মাতা চ রাঘব ॥ ২.১১১.২॥
111.3
পিতা হ্যেনং জনয়তি পুরুষং পুরুষর্ষভ ।
প্রজ্ঞাং দদাতি চাচার্যস্তস্মাত্স গুরুরুচ্যতে ॥ ২.১১১.৩॥
111.4
সো ঽহং তে পিতুরাচার্য্যস্তব চৈব পরন্তপ ।
মম ত্বং বচনং কুর্বন্ নাতিবর্ত্তেঃ সতাঙ্গতিম্ ॥ ২.১১১.৪॥
111.5
ইমা হি তে পরিষদঃ শ্রেণয়শ্চ দ্বিজাস্তথা ।
এষু তাত চরন্ ধর্মং নাতিবর্ত্তেঃ সতাঙ্গতিম্ ॥ ২.১১১.৫॥
111.6
বৃদ্ধায়া ধর্মশীলায়া মাতুর্নার্হস্যবর্ত্তিতুম্ ।
অস্যাস্তু বচনং কুর্বন্ নাতিবর্ত্তেঃ সতাঙ্গতিম্ ॥ ২.১১১.৬॥
111.7
ভরতস্য বচঃ কুর্বন্ যাচমানস্য রাঘব ।
আত্মানং নাতিবর্ত্তেস্ত্বং সত্যধর্মপরাক্রম ॥ ২.১১১.৭॥
111.8
এবং মধুরমুক্তস্তু গুরুণা রাঘবঃ স্বয়ম্ ।
প্রত্যুবাচ সমাসীনং বসিষ্ঠং পুরুষর্ষভঃ ॥ ২.১১১.৮॥
111.9
যন্মাতাপিতরৌ বৃত্তং তনয়ে কুরুতঃ সদা ।
ন সুপ্রতিকরং তত্তু মাত্রা পিত্রা চ যত্কৃতম্ ॥ ২.১১১.৯॥
111.10
যথাশক্তি প্রদানেন স্নাপনোচ্ছাদনেন চ ।
নিত্যং চ প্রিয়বাদেন তথা সংবর্দ্ধনেন চ ॥ ২.১১১.১০॥
111.11
স হি রাজা জনয়িতা পিতা দশরথো মম ।
আজ্ঞাতং যন্ময়া তস্য ন তন্মিথ্যা ভবিষ্যতি ॥ ২.১১১.১১॥
111.12
এবমুক্তস্তু রামেণ ভরতঃ প্রত্যনন্তরম্ ।
উবাচ পরমোদারঃ সূতং পরমদুর্মনাঃ ॥ ২.১১১.১২॥
111.13
ইহ মে স্থণ্ডিলে শীঘ্রং কুশানাস্তর সারথে ।
আর্য্যং প্রত্যুপবেক্ষ্যামি যাবন্মে ন প্রসীদতি ॥ ২.১১১.১৩॥
111.14
অনাহারো নিরালোকো ধনহীনো যথা দ্বিজঃ ।
শেষ্যে পুরস্তাৎ শালায়া যাবন্ন প্রতিয়াস্যতি ॥ ২.১১১.১৪॥
111.15
স তু রামমবেক্ষন্তং সুমন্ত্রং প্রেক্ষ্য দুর্মনাঃ ।
কুশোত্তরমুপস্থাপ্য ভূমাবেবাস্তরৎ স্বয়ম্ ॥ ২.১১১.১৫॥
111.16
তমুবাচ মহাতেজা রামো রাজর্ষিসত্তমঃ ।
কিং মাং ভরত কুর্বাণং তাত প্রত্যুপবেক্ষ্যসি ॥ ২.১১১.১৬॥
111.17
ব্রাহ্মণো হ্যেকপার্শ্বেন নরান্ রোদ্ধুমিহার্হতি ।
ন তু মূর্দ্ধাভিষিক্তানাং বিধিঃ প্রত্যুপবেশনে ॥ ২.১১১.১৭॥
111.18
উত্তিষ্ঠ নরশার্দূল হিত্বৈতদ্দারুণং ব্রতম্ ।
পুরবর্য্যামিতঃ ক্ষিপ্রময়োধ্যাং যাহি রাঘব ॥ ২.১১১.১৮॥
111.19
আসীনস্ত্বেব ভরতঃ পৌরজানপদং জনম্ ।
উবাচ সর্বতঃ প্রেক্ষ্য কিমার্যং নানুশাসথ ॥ ২.১১১.১৯॥
111.20
তে তমূচুর্মহাত্মানং পৌরজানপদা জনাঃ ।
কাকুত্স্থমভিজানীমঃ সম্যগ্বদতি রাঘবঃ ॥ ২.১১১.২০॥
111.21
এষো ঽপি হি মহাভাগঃ পিতুর্বচসি তিষ্ঠতি ।
অত এব ন শক্তাঃ স্মো ব্যাবর্ত্তয়িতুমঞ্জসা ॥ ২.১১১.২১॥
111.22
তেষামাজ্ঞায় বচনং রামো বচনমব্রবীৎ ।
এবং নিবোধ বচনং সুহৃদাং ধর্মচক্ষুষাম্ ॥ ২.১১১.২২॥
111.23
এতচ্চৈবোভয়ং শ্রুত্বা সম্যক্ সম্পশ্য রাঘব ।
উত্তিষ্ঠ ত্বং মহাবাহো মাং চ স্পৃশ তথোদকম্ ॥ ২.১১১.২৩॥
111.24
অথোত্থায় জলং স্পৃষ্ট্বা ভরতো বাক্যমব্রবীৎ ।
শ্রৃণ্বন্তু মে পরিষদো মন্ত্রিণঃ শ্রেণয়স্তথা ॥ ২.১১১.২৪॥
111.25
ন যাচে পিতরং রাজ্যং নানুশাসামি মাতরম্ ।
আর্যং পরমধর্মজ্ঞং নানুজানামি রাঘবম্ ॥ ২.১১১.২৫॥
111.26
যদি ত্ববশ্যং বস্তব্যং কর্ত্তব্যং চ পিতুর্বচঃ ।
অহমেব নিবত্স্যামি চতুর্দশ সমা বনে ॥ ২.১১১.২৬॥
111.27
ধর্মাত্মা তস্য তথ্যেন ভ্রাতুর্বাক্যেন বিস্মিতঃ ।
উবাচ রামঃ সম্প্রেক্ষ্য পৌরজানপদং জনম্ ॥ ২.১১১.২৭॥
111.28
বিক্রীতমাহিতং ক্রীতং যৎ পিত্রা জীবতা মম ।
ন তল্লোপয়িতুং শক্যং ময়া বা ভরতেন বা ॥ ২.১১১.২৮॥
111.29
অপধির্ন ময়া কার্য্যো বনবাসে জুগুপ্সিতঃ ।
যুক্তমুক্তং চ কৈকেয্যা পিত্রা মে সুকৃতং কৃতম্ ॥ ২.১১১.২৯॥
111.30
জানামি ভরতং ক্ষান্তং গুরুসত্কারকারিণম্ ।
সর্বমেবাত্র কল্যাণং সত্যসন্ধে মহাত্মনি ॥ ২.১১১.৩০॥
111.31
অনেন ধর্মশীলেন বনাৎ প্রত্যাগতঃ পুনঃ ।
ভ্রাত্রা সহ ভবিষ্যামি পৃথিব্যাঃ পতিরুত্তমঃ ॥ ২.১১১.৩১॥
111.32
বৃতো রাজা হি কৈকেয্যা ময়া তদ্বচনং কৃতম্ ।
অনৃতন্মোচয়ানেন পিতরং তং মহীপতিম্ ॥ ২.১১১.৩২ ॥