সূক্ত 93

93.1

১২ গোতমো রাহূগণঃ। অগ্নিষোমৌ। ১-৩ অনুষ্টুপ্, ৪-৭, ১২ ত্রিষ্টুপ্, ৮ জগতী ত্রিষ্টুব্বা, ৯-১১ গায়ত্রী ।

অগ্নীষোমাবিমং সু মে শৃণুতং বৃষণা হবম্ ।
প্রতি সূক্তানি হর্যতং ভবতং দাশুষে ময়ঃ ॥১॥

অগ্নীষোমা যো অদ্য বামিদং বচঃ সপর্যতি ।
তস্মৈ ধত্তং সুবীর্যং গবাং পোষং স্বশ্ব্যম্ ॥২॥

অগ্নীষোমা য আহুতিং যো বাং দাশাদ্ধবিষ্কৃতিম্ ।
স প্রজয়া সুবীর্যং বিশ্বমায়ুর্ব্যশ্নবৎ ॥৩॥

অগ্নীষোমা চেতি তদ্ বীর্যং বাং যদমুষ্ণীতমবসং পণিং গাঃ ।
অবাতিরতং বৃসয়স্য শেষো ঽবিন্দতং জ্যোতিরেকং বহুভ্যঃ ॥৪॥

যুবমেতানি দিবি রোচনান্যগ্নিশ্চ সোম সক্রতূ অধত্তম্ ।
যুবং সিন্ধূঁরভিশস্তেরবদ্যাদগ্নীষোমাবমুঞ্চতং গৃভীতান্ ॥৫॥

আন্যং দিবো মাতরিশ্বা জভারামথ্নাদন্যং পরি শ্যেনো অদ্রেঃ ।
অগ্নীষোমা ব্রহ্মণা বাবৃধানোরুং যজ্ঞায় চক্রথুরু লোকম্ ॥৬॥

অগ্নীষোমা হবিষঃ প্রস্থিতস্য বীতং হর্যতং বৃষণা জুষেথাম্ ।
সুশর্মাণা স্ববসা হি ভূতমথা ধত্তং যজমানায় শং যোঃ ॥৭॥

যো অগ্নীষোমা হবিষা সপর্যাদ্ দেবদ্রীচা মনসা যো ঘৃতেন ।
তস্য ব্রতং রক্ষতং পাতমংহসো বিশে জনায় মহি শর্ম যচ্ছতম্ ॥৮॥

অগ্নীষোমা সবেদসা সহূতী বনতং গিরঃ । সং দেবত্রা বভূবথুঃ ॥৯॥

অগ্নীষোমাবনেন বাং যো বাং ঘৃতেন দাশতি । তস্মৈ দীদয়তং বৃহৎ ॥১০॥

অগ্নীষোমাবিমানি নো যুবং হব্যা জুজোষতম্ । আ যাতমুপ নঃ সচা ॥১১॥

অগ্নীষোমা পিপৃতমর্বতো ন আ প্যায়ন্তামুস্রিয়া হব্যসূদঃ ।
অস্মে বলানি মঘবত্সু ধত্তং কৃণুতং নো অধ্বরং শ্রুষ্টিমন্তম্ ॥১২॥