সূক্ত 92

92.1

১৮ গোতমো রাহূগণঃ। উষাঃ, ১৬-১৮ অশ্বিনৌ । ১-৪ জগতী, ৫-১২ ত্রিষ্টুপ্, ১৩-১৮ উষ্ণিক্।

এতা উ ত্যা উষসঃ কেতুমক্রত পূর্বে অর্ধে রজসো ভানুমঞ্জতে ।
নিষ্কৃণ্বানা আয়ুধানীব ধৃষ্ণবঃ প্রতি গাবোঽরুষীর্যন্তি মাতরঃ ॥১॥

উদপপ্তন্নরুণা ভানবো বৃথা স্বায়ুজো অরুষীর্গা অয়ুক্ষত ।
অক্রন্নুষাসো বয়ুনানি পূর্বথা রুশন্তং ভানুমরুষীরশিশ্রয়ুঃ ॥২॥

অর্চন্তি নারীরপসো ন বিষ্টিভিঃ সমানেন যোজনেনা পরাবতঃ ।
ইষং বহন্তীঃ সুকৃতে সুদানবে বিশ্বেদহ যজমানায় সুন্বতে ॥৩॥

অধি পেশাংসি বপতে নৃতূরিবাপোর্ণুতে বক্ষ উস্রেব বর্জহম্ ।
জ্যোতির্বিশ্বস্মৈ ভুবনায় কৃণ্বতী গাবো ন ব্রজং ব্যু ১ ষা আবর্তমঃ ॥৪॥

প্রত্যর্চী রুশদস্যা অদর্শি বি তিষ্ঠতে বাধতে কৃষ্ণমভ্বম্ ।
স্বরুং ন পেশো বিদথেষ্বঞ্জঞ্ চিত্রং দিবো দুহিতা ভানুমশ্রেৎ ॥৫॥

অতারিষ্ম তমসস্পারমস্যোষা উচ্ছন্তী বয়ুনা কৃণোতি ।
শ্রিয়ে ছন্দো ন স্ময়তে বিভাতী সুপ্রতীকা সৌমনসায়াজীগঃ ॥৬॥

ভাস্বতী নেত্রী সূনৃতানাং দিবঃ স্তবে দুহিতা গোতমেভিঃ ।
প্রজাবতো নৃবতো অশ্ববুধ্যানুষো গোঅগ্রাঁ উপ মাসি বাজান্ ॥৭॥

উষস্তমশ্যাং যশসং সুবীরং দাসপ্রবর্গং রয়িমশ্ববুধ্যম্ ।
সুদংসসা শ্রবসা যা বিভাসি বাজপ্রসূতা সুভগে বৃহন্তম্ ॥৮॥

বিশ্বানি দেবী ভুবনাভিচক্ষ্যা প্রতীচী চক্ষুরুর্বিয়া বি ভাতি ।
বিশ্বং জীবং চরসে বোধয়ন্তী বিশ্বস্য বাচমবিদন্মনায়োঃ ॥৯॥

পুনঃপুনর্জায়মানা পুরাণী সমানং বর্ণমভি শুম্ভমানা ।
শ্বঘ্নীব কৃত্নুর্বিজ আমিনানা মর্তস্য দেবী জরয়ন্ত্যায়ুঃ ॥১০॥

ব্যূর্ণ্বতী দিবো অন্তাঁ অবোধ্যপ স্বসারং সনুতর্যুয়োতি ।
প্রমিনতী মনুষ্যা যুগানি যোষা জারস্য চক্ষসা বি ভাতি ॥১১॥

পশূন্ন চিত্রা সুভগা প্রথানা সিন্ধুর্ন ক্ষোদ উর্বিয়া ব্যশ্বৈৎ ।
অমিনতী দৈব্যানি ব্রতানি সূর্যস্য চেতি রশ্মিভির্দৃশানা ॥১২॥

উষস্তচ্চিত্রমা ভরাস্মভ্যং বাজিনীবতি । যেন তোকং চ তনয়ং চ ধামহে ॥১৩॥

উষো অদ্যেহ গোমত্যশ্বাবতি বিভাবরি । রেবদস্মে ব্যুচ্ছ সূনৃতাবতি ॥১৪॥

যুক্ষ্বা হি বাজিনীবত্যশ্বাঁ অদ্যারুণাঁ উষঃ । অথা নো বিশ্বা সৌভগান্যা বহ ॥১৫॥

অশ্বিনা বর্তিরস্মদা গোমদ্ দস্রা হিরণ্যবৎ । অর্বাগ্রথং সমনসা নি যচ্ছতম্ ॥১৬॥

যাবিত্থা শ্লোকমা দিবো জ্যোতির্জনায় চক্রথুঃ । আ ন ঊর্জং বহতমশ্বিনা যুবম্ ॥১৭॥

এহ দেবা ময়োভুবা দস্রা হিরণ্যবর্তনী । উষর্বুধো বহন্তু সোমপীতয়ে ॥১৮॥