সূক্ত 91

91.1

২৩ গোতমো রাহূগণঃ। সোমঃ। ত্রিষ্টুপ্, ৫-১৬ গায়ত্রী, ১৭ উষ্ণিক্।

ত্বং সোম প্র চিকিতো মনীষা ত্বং রজিষ্ঠমনু নেষি পন্থাম্ ।
তব প্রণীতী পিতরো ন ইন্দো দেবেষু রত্নমভজন্ত ধীরাঃ ॥১॥

ত্বং সোম ক্রতুভিঃ সুক্রতুর্ভূস্ত্বং দক্ষৈঃ সুদক্ষো বিশ্ববেদাঃ ।
ত্বং বৃষা বৃষত্বেভির্মহিত্বা দ্যুম্নেভির্দ্যুম্ন্যভবো নৃচক্ষাঃ ॥২॥

রাজ্ঞো নু তে বরুণস্য ব্রতানি বৃহদ্ গভীরং তব সোম ধাম ।
শুচিষ্ট্বমসি প্রিয়ো ন মিত্রো দক্ষায্যো অর্যমেবাসি সোম ॥৩॥

যা তে ধামানি দিবি যা পৃথিব্যাং যা পর্বতেষ্বোষধীষ্বপ্সু ।
তেভির্নো বিশ্বৈঃ সুমনা অহেলন্ রাজন্ত্সোম প্রতি হব্যা গৃভায় ॥৪॥

ত্বং সোমাসি সত্পতিস্ত্বং রাজোত বৃত্রহা । ত্বং ভদ্রো অসি ক্রতুঃ ॥৫॥

ত্বং চ সোম নো বশো জীবাতুং ন মরামহে । প্রিয়স্তোত্রো বনস্পতিঃ ॥৬॥

ত্বং সোম মহে ভগং ত্বং যূন ঋতায়তে । দক্ষং দধাসি জীবসে ॥৭॥

ত্বং নঃ সোম বিশ্বতো রক্ষা রাজন্নঘায়তঃ । ন রিষ্যেৎ ত্বাবতঃ সখা ॥৮॥

সোম যাস্তে ময়োভুব ঊতয়ঃ সন্তি দাশুষে । তাভির্নোঽবিতা ভব ॥৯॥

ইমং যজ্ঞমিদং বচো জুজুষাণ উপাগহি । সোম ত্বং নো বৃধে ভব ॥১০॥

সোম গীর্ভিষ্ট্বা বয়ং বর্ধয়ামো বচোবিদঃ । সুমৃলীকো ন আ বিশ ॥১১॥

গয়স্ফানো অমীবহা বসুবিৎ পুষ্টিবর্ধনঃ । সুমিত্রঃ সোম নো ভব ॥১২॥

সোম রারন্ধি নো হৃদি গাবো ন যবসেষ্বা । মর্য ইব স্ব ওক্যে ॥১৩॥

যঃ সোম সখ্যে তব রারণদ্ দেব মর্ত্যঃ । তং দক্ষঃ সচতে কবিঃ ॥১৪॥

উরুষ্যা ণো অভিশস্তেঃ সোম নি পাহ্যংহসঃ । সখা সুশেব এধি নঃ ॥১৫॥

আ প্যায়স্ব সমেতু তে বিশ্বতঃ সোম বৃষ্ণ্যম্ । ভবা বাজস্য সংগথে ॥১৬॥

আ প্যায়স্ব মদিন্তম সোম বিশ্বেভিরংশুভিঃ । ভবা নঃ সুশ্রবস্তমঃ সখা বৃধে ॥১৭॥

সং তে পয়াংসি সমু যন্তু বাজাঃ সং বৃষ্ণ্যান্যভিমাতিষাহঃ ।
আপ্যায়মানো অমৃতায় সোম দিবি শ্রবাংস্যুত্তমানি ধিষ্ব ॥১৮॥

যা তে ধামানি হবিষা যজন্তি তা তে বিশ্বা পরিভূরস্তু যজ্ঞম্ ।
গয়স্ফানঃ প্রতরণঃ সুবীরো ঽবীরহা প্র চরা সোম দুর্যান্ ॥১৯॥

সোমো ধেনুং সোমো অর্বন্তমাশুং সোমো বীরং কর্মণ্যং দদাতি ।
সাদন্যং বিদথ্যং সভেয়ং পিতৃশ্রবণং যো দদাশদস্মৈ ॥২০॥

অষাহ্লং যুত্সু পৃতনাসু পপ্রিং স্বর্ষামপ্সাং বৃজনস্য গোপাম্ ।
ভরেষুজাং সুক্ষিতিং সুশ্রবসং জয়ন্তং ত্বামনু মদেম সোম ॥২১॥

ত্বমিমা ওষধীঃ সোম বিশ্বাস্ত্বমপো অজনয়স্ত্বং গাঃ ।
ত্বমা ততন্থোর্ব ১ ন্তরিক্ষং ত্বং জ্যোতিষা বি তমো ববর্থ ॥২২॥

দেবেন নো মনসা দেব সোম রায়ো ভাগং সহসাবন্নভি যুধ্য ।
মা ত্বা তনদীশিষে বীর্যস্যোভয়েভ্যঃ প্র চিকিত্সা গবিষ্টৌ ॥২৩॥