Sukta 91

91.1

23 gotamo rahuganah, somah, trishtup, 5-16 gayatri, 17 ushnik

त्वं सो॑म॒ प्र चि॑कितो मनी॒षा त्वं रजि॑ष्ठ॒मनु॑ नेषि॒ पन्था॑म् ।
तव॒ प्रणी॑ती पि॒तरो॑ न इन्दो दे॒वेषु॒ रत्न॑मभजन्त॒ धीरा॑ः ॥१॥

Tvam soma pra chikito manisha tvam rajishthamanu neshi pantham
Tava praniti pitaro na indo deveshu ratnamabhajanta dhirah

91.2

त्वं सो॑म॒ क्रतु॑भिः सु॒क्रतु॑र्भू॒स्त्वं दक्षै॑ः सु॒दक्षो॑ वि॒श्ववे॑दाः ।
त्वं वृषा॑ वृष॒त्वेभि॑र्महि॒त्वा द्यु॒म्नेभि॑र्द्यु॒म्न्य॑भवो नृ॒चक्षा॑ः ॥२॥

Tvam soma kratubhih sukraturbhustvam dakshaih sudaksho vishvavedah
Tvam vrisha vrishatvebhirmahitva dyumnebhirdyumnyabhavo nrichakshah

91.3

राज्ञो॒ नु ते॒ वरु॑णस्य व्र॒तानि॑ बृ॒हद् ग॑भी॒रं तव॑ सोम॒ धाम॑ ।
शुचि॒ष्ट्वम॑सि प्रि॒यो न मि॒त्रो द॒क्षाय्यो॑ अर्य॒मेवा॑सि सोम ॥३॥

Ragyo nu te varunasya vratani brihad gabhiram tava soma dhama
Shuchishtvamasi priyo na mitro dakshayyo aryamevasi soma

91.4

या ते॒ धामा॑नि दि॒वि या पृ॑थि॒व्यां या पर्व॑ते॒ष्वोष॑धीष्व॒प्सु ।
तेभि॑र्नो॒ विश्वै॑ः सु॒मना॒ अहे॑ळ॒न् राज॑न्त्सोम॒ प्रति॑ ह॒व्या गृ॑भाय ॥४॥

Ya te dhamani divi ya prithivyam ya parvateshvoshadhishvapsu
Tebhirno vishvaih sumana ahelan rajantsoma prati havya gribhaya

91.5

त्वं सो॑मासि॒ सत्प॑ति॒स्त्वं राजो॒त वृ॑त्र॒हा । त्वं भ॒द्रो अ॑सि॒ क्रतु॑ः ॥५॥

Tvam somasi satpatistvam rajota vritraha, tvam bhadro asi kratuh

91.6

त्वं च॑ सोम नो॒ वशो॑ जी॒वातुं॒ न म॑रामहे । प्रि॒यस्तो॑त्रो॒ वन॒स्पति॑ः ॥६॥

Tvam cha soma no vasho jivatum na maramahe, priyastotro vanaspatih

91.7

त्वं सो॑म म॒हे भगं॒ त्वं यून॑ ऋताय॒ते । दक्षं॑ दधासि जी॒वसे॑ ॥७॥

Tvam soma mahe bhagam tvam yuna ritayate, daksham dadhasi jivase

91.8

त्वं न॑ः सोम वि॒श्वतो॒ रक्षा॑ राजन्नघाय॒तः । न रि॑ष्ये॒त् त्वाव॑त॒ः सखा॑ ॥८॥

Tvam nah soma vishvato raksha rajannaghayatah, na rishyet tvavatah sakha

91.9

सोम॒ यास्ते॑ मयो॒भुव॑ ऊ॒तय॒ः सन्ति॑ दा॒शुषे॑ । ताभि॑र्नोऽवि॒ता भ॑व ॥९॥

Soma yaste mayobhuva utayah santi dashushe, tabhirnovita bhava

91.10

इ॒मं य॒ज्ञमि॒दं वचो॑ जुजुषा॒ण उ॒पाग॑हि । सोम॒ त्वं नो॑ वृ॒धे भ॑व ॥१०॥

Imam yagyamidam vacho jujushana upagahi, soma tvam no vridhe bhava

91.11

सोम॑ गी॒र्भिष्ट्वा॑ व॒यं व॒र्धया॑मो वचो॒विद॑ः । सु॒मृ॒ळी॒को न॒ आ वि॑श ॥११॥

Soma girbhishtva vayam vardhayamo vachovidah, sumriliko na a visha

91.12

ग॒य॒स्फानो॑ अमीव॒हा व॑सु॒वित् पु॑ष्टि॒वर्ध॑नः । सु॒मि॒त्रः सो॑म नो भव ॥१२॥

Gayasphano amivaha vasuvit pushtivardhanah, sumitrah soma no bhava

91.13

सोम॑ रार॒न्धि नो॑ हृ॒दि गावो॒ न यव॑से॒ष्वा । मर्य॑ इव॒ स्व ओ॒क्ये॑ ॥१३॥

Soma rarandhi no hridi gavo na yavaseshva, marya iva sva okye

91.14

यः सो॑म स॒ख्ये तव॑ रा॒रण॑द् देव॒ मर्त्य॑ः । तं दक्ष॑ः सचते क॒विः ॥१४॥

Yah soma sakhye tava raranad deva martyah, tam dakshah sachate kavih

91.15

उ॒रु॒ष्या णो॑ अ॒भिश॑स्ते॒ः सोम॒ नि पा॒ह्यंह॑सः । सखा॑ सु॒शेव॑ एधि नः ॥१५॥

Urushya no abhishasteh soma ni pahyanhasah, sakha susheva edhi nah

91.16

आ प्या॑यस्व॒ समे॑तु ते वि॒श्वत॑ः सोम॒ वृष्ण्य॑म् । भवा॒ वाज॑स्य संग॒थे ॥१६॥

A pyayasva sametu te vishvatah soma vrishnyam, bhava vajasya sangathe

91.17

आ प्या॑यस्व मदिन्तम॒ सोम॒ विश्वे॑भिरं॒शुभि॑ः । भवा॑ नः सु॒श्रव॑स्तम॒ः सखा॑ वृ॒धे ॥१७॥

A pyayasva madintama soma vishvebhiranshubhih, bhava nah sushravastamah sakha vridhe

91.18

सं ते॒ पयां॑सि॒ समु॑ यन्तु॒ वाजा॒ः सं वृष्ण्या॑न्यभिमाति॒षाह॑ः ।
आ॒प्याय॑मानो अ॒मृता॑य सोम दि॒वि श्रवां॑स्युत्त॒मानि॑ धिष्व ॥१८॥

Sam te payansi samu yantu vajah sam vrishnyanyabhimatishahah
Apyayamano amritaya soma divi shravansyuttamani dhishva

91.19

या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञम् ।
ग॒य॒स्फान॑ः प्र॒तर॑णः सु॒वीरो ऽवी॑रहा॒ प्र च॑रा सोम॒ दुर्या॑न् ॥१९॥

Ya te dhamani havisha yajanti ta te vishva paribhurastu yagyam
Gayasphanah prataranah suviro viraha pra chara soma duryan

91.20

सोमो॑ धे॒नुं सोमो॒ अर्व॑न्तमा॒शुं सोमो॑ वी॒रं क॑र्म॒ण्यं॑ ददाति ।
सा॒द॒न्यं॑ विद॒थ्यं॑ स॒भेयं॑ पितृ॒श्रव॑णं॒ यो ददा॑शदस्मै ॥२०॥

Somo dhenum somo arvantamashum somo viram karmanyam dadati
Sadanyam vidathyam sabheyam pitrishravanam yo dadashadasmai

91.21

अषा॑ह्लं यु॒त्सु पृत॑नासु॒ पप्रिं॑ स्व॒र्षाम॒प्सां वृ॒जन॑स्य गो॒पाम् ।
भ॒रे॒षु॒जां सु॑क्षि॒तिं सु॒श्रव॑सं॒ जय॑न्तं॒ त्वामनु॑ मदेम सोम ॥२१॥

Ashahlam yutsu pritanasu paprim svarshamapsam vrijanasya gopam
Bhareshujam sukshitim sushravasam jayantam tvamanu madema soma

91.22

त्वमि॒मा ओष॑धीः सोम॒ विश्वा॒स्त्वम॒पो अ॑जनय॒स्त्वं गाः ।
त्वमा त॑तन्थो॒र्व १ न्तरि॑क्षं॒ त्वं ज्योति॑षा॒ वि तमो॑ ववर्थ ॥२२॥

Tvamima oshadhih soma vishvastvamapo ajanayastvam gah
Tvama tatanthorva 1 ntariksham tvam jyotisha vi tamo vavartha

91.23

दे॒वेन॑ नो॒ मन॑सा देव सोम रा॒यो भा॒गं स॑हसावन्न॒भि यु॑ध्य ।
मा त्वा त॑न॒दीशि॑षे वी॒र्य॑स्यो॒भये॑भ्य॒ः प्र चि॑कित्सा॒ गवि॑ष्टौ ॥२३॥

Devena no manasa deva soma rayo bhagam sahasavannabhi yudhya
Ma tva tanadishishe viryasyobhayebhyah pra chikitsa gavishtau