Sukta 90

90.1

9 gotamo rahuganah, vishvedevah, , gayatri, 9 anushtup

ऋ॒जु॒नी॒ती नो॒ वरु॑णो मि॒त्रो न॑यतु वि॒द्वान् । अ॒र्य॒मा दे॒वैः स॒जोषा॑ः ॥१॥

Rijuniti no varuno mitro nayatu vidvan, aryama devaih sajoshah

ते हि वस्वो॒ वस॑वाना॒स्ते अप्र॑मूरा॒ महो॑भिः । व्र॒ता र॑क्षन्ते वि॒श्वाहा॑ ॥२॥

Te hi vasvo vasavanaste apramura mahobhih, vrata rakshante vishvaha

ते अ॒स्मभ्यं॒ शर्म॑ यंसन्न॒मृता॒ मर्त्ये॑भ्यः । बाध॑माना॒ अप॒ द्विष॑ः ॥३॥

Te asmabhyam sharma yansannamrita martyebhyah, badhamana apa dvishah

वि न॑ः प॒थः सु॑वि॒ताय॑ चि॒यन्त्विन्द्रो॑ म॒रुत॑ः । पू॒षा भगो॒ वन्द्या॑सः ॥४॥

Vi nah pathah suvitaya chiyantvindro marutah, pusha bhago vandyasah

उ॒त नो॒ धियो॒ गोअ॑ग्रा॒ः पूष॒न् विष्ण॒वेव॑यावः । कर्ता॑ नः स्वस्ति॒मत॑ः ॥५॥

Uta no dhiyo goagrah pushan vishnavevayavah, karta nah svastimatah

मधु॒ वाता॑ ऋताय॒ते मधु॑ क्षरन्ति॒ सिन्ध॑वः । माध्वी॑र्नः स॒न्त्वोष॑धीः ॥६॥

Madhu vata ritayate madhu ksharanti sindhavah, madhvirnah santvoshadhih

मधु॒ नक्त॑मु॒तोषसो॒ मधु॑म॒त् पार्थि॑वं॒ रज॑ः । मधु॒ द्यौर॑स्तु नः पि॒ता ॥७॥

Madhu naktamutoshaso madhumat parthivam rajah, madhu dyaurastu nah pita

मधु॑मान्नो॒ वन॒स्पति॒र्मधु॑माँ अस्तु॒ सूर्य॑ः । माध्वी॒र्गावो॑ भवन्तु नः ॥८॥

Madhumanno vanaspatirmadhumam astu suryah, madhvirgavo bhavantu nah

शं नो॑ मि॒त्रः शं वरु॑ण॒ः शं नो॑ भवत्वर्य॒मा । शं न॒ इन्द्रो॒ बृह॒स्पति॒ः शं नो॒ विष्णु॑रुरुक्र॒मः ॥९॥

Sham no mitrah sham varunah sham no bhavatvaryama, sham na indro brihaspatih sham no vishnururukramah