Sukta 89

89.1

10 gotamo rahuganah, vishvedevah, (1-2, 8-9 devah, 10 aditih), jagati, 6 virat-sthana, 8-10 trishtup

आ नो॑ भ॒द्राः क्रत॑वो यन्तु वि॒श्वतो ऽद॑ब्धासो॒ अप॑रीतास उ॒द्भिद॑ः ।
दे॒वा नो॒ यथा॒ सद॒मिद् वृ॒धे अस॒न्नप्रा॑युवो रक्षि॒तारो॑ दि॒वेदि॑वे ॥१॥

A no bhadrah kratavo yantu vishvato dabdhaso aparitasa udbhidah
Deva no yatha sadamid vridhe asannaprayuvo rakshitaro divedive

89.2

दे॒वानां॑ भ॒द्रा सु॑म॒तिर्ऋ॑जूय॒तां दे॒वानां॑ रा॒तिर॒भि नो॒ नि व॑र्तताम् ।
दे॒वानां॑ स॒ख्यमुप॑ सेदिमा व॒यं दे॒वा न॒ आयु॒ः प्र ति॑रन्तु जी॒वसे॑ ॥२॥

Devanam bhadra sumatirrijuyatam devanam ratirabhi no ni vartatam
Devanam sakhyamupa sedima vayam deva na ayuh pra tirantu jivase

89.3

तान् पूर्व॑या नि॒विदा॑ हूमहे व॒यं भगं॑ मि॒त्रमदि॑तिं॒ दक्ष॑म॒स्रिध॑म् ।
अ॒र्य॒मणं॒ वरु॑णं॒ सोम॑म॒श्विना॒ सर॑स्वती नः सु॒भगा॒ मय॑स्करत् ॥३॥

Tan purvaya nivida humahe vayam bhagam mitramaditim dakshamasridham
Aryamanam varunam somamashvina sarasvati nah subhaga mayaskarat

89.4

तन्नो॒ वातो॑ मयो॒भु वा॑तु भेष॒जं तन्मा॒ता पृ॑थि॒वी तत् पि॒ता द्यौः ।
तद् ग्रावा॑णः सोम॒सुतो॑ मयो॒भुव॒स्तद॑श्विना शृणुतं धिष्ण्या यु॒वम् ॥४॥

Tanno vato mayobhu vatu bheshajam tanmata prithivi tat pita dyauh
Tad gravanah somasuto mayobhuvastadashvina shrinutam dhishnya yuvam

89.5

तमीशा॑नं॒ जग॑तस्त॒स्थुष॒स्पतिं॑ धियंजि॒न्वमव॑से हूमहे व॒यम् ।
पू॒षा नो॒ यथा॒ वेद॑सा॒मस॑द् वृ॒धे र॑क्षि॒ता पा॒युरद॑ब्धः स्व॒स्तये॑ ॥५॥

Tamishanam jagatastasthushaspatim dhiyanjinvamavase humahe vayam
Pusha no yatha vedasamasad vridhe rakshita payuradabdhah svastaye

89.6

स्व॒स्ति न॒ इन्द्रो॑ वृ॒द्धश्र॑वाः स्व॒स्ति न॑ः पू॒षा वि॒श्ववे॑दाः ।
स्व॒स्ति न॒स्तार्क्ष्यो॒ अरि॑ष्टनेमिः स्व॒स्ति नो॒ बृह॒स्पति॑र्दधातु ॥६॥

Svasti na indro vriddhashravah svasti nah pusha vishvavedah
Svasti nastarkshyo arishtanemih svasti no brihaspatirdadhatu

89.7

पृष॑दश्वा म॒रुत॒ः पृश्नि॑मातरः शुभं॒यावा॑नो वि॒दथे॑षु॒ जग्म॑यः ।
अ॒ग्नि॒जि॒ह्वा मन॑व॒ः सूर॑चक्षसो॒ विश्वे॑ नो दे॒वा अव॒सा ग॑मन्नि॒ह ॥७॥

Prishadashva marutah prishnimatarah shubhanyavano vidatheshu jagmayah
Agnijihva manavah surachakshaso vishve no deva avasa gamanniha

89.8

भ॒द्रं कर्णे॑भिः शृणुयाम देवा भ॒द्रं प॑श्येमा॒क्षभि॑र्यजत्राः ।
स्थि॒रैरङ्गै॑स्तुष्टु॒वांस॑स्त॒नूभि॒र्व्य॑शेम दे॒वहि॑तं॒ यदायु॑ः ॥८॥

Bhadram karnebhih shrinuyama deva bhadram pashyemakshabhiryajatrah
Sthirairangaistushtuvansastanubhirvyashema devahitam yadayuh

89.9

श॒तमिन्नु श॒रदो॒ अन्ति॑ देवा॒ यत्रा॑ नश्च॒क्रा ज॒रसं॑ त॒नूना॑म् ।
पु॒त्रासो॒ यत्र॑ पि॒तरो॒ भव॑न्ति॒ मा नो॑ म॒ध्या री॑रिष॒तायु॒र्गन्तो॑ः ॥९॥

Shataminnu sharado anti deva yatra nashchakra jarasam tanunam
Putraso yatra pitaro bhavanti ma no madhya ririshatayurgantoh

89.10

अदि॑ति॒र्द्यौरदि॑तिर॒न्तरि॑क्ष॒मदि॑तिर्मा॒ता स पि॒ता स पु॒त्रः ।
विश्वे॑ दे॒वा अदि॑ति॒ः पञ्च॒ जना॒ अदि॑तिर्जा॒तमदि॑ति॒र्जनि॑त्वम् ॥१०॥

Aditirdyauraditirantarikshamaditirmata sa pita sa putrah
Vishve deva aditih pancha jana aditirjatamaditirjanitvam