Sukta 88

88.1

6 gotamo rahuganah, marutah, trishtup, 1, 6 prastarapanktih, 5 virad rupa

आ वि॒द्युन्म॑द्भिर्मरुतः स्व॒र्कै रथे॑भिर्यात ऋष्टि॒मद्भि॒रश्व॑पर्णैः ।
आ वर्षि॑ष्ठया न इ॒षा वयो॒ न प॑प्तता सुमायाः ॥१॥

A vidyunmadbhirmarutah svarkai rathebhiryata rishtimadbhirashvaparnaih
A varshishthaya na isha vayo na paptata sumayah

ते॑ऽरु॒णेभि॒र्वर॒मा पि॒शङ्गै॑ः शु॒भे कं या॑न्ति रथ॒तूर्भि॒रश्वै॑ः ।
रु॒क्मो न चि॒त्रः स्वधि॑तीवान् प॒व्या रथ॑स्य जङ्घनन्त॒ भूम॑ ॥२॥

Terunebhirvarama pishangaih shubhe kam yanti rathaturbhirashvaih
Rukmo na chitrah svadhitivan pavya rathasya janghananta bhuma

श्रि॒ये कं वो॒ अधि॑ त॒नूषु॒ वाशी॑र्मे॒धा वना॒ न कृ॑णवन्त ऊ॒र्ध्वा ।
यु॒ष्मभ्यं॒ कं म॑रुतः सुजातास्तुविद्यु॒म्नासो॑ धनयन्ते॒ अद्रि॑म् ॥३॥

Shriye kam vo adhi tanushu vashirmedha vana na krinavanta urdhva
Yushmabhyam kam marutah sujatastuvidyumnaso dhanayante adrim

अहा॑नि॒ गृध्रा॒ः पर्या व॒ आगु॑रि॒मां धियं॑ वार्का॒र्यां च॑ दे॒वीम् ।
ब्रह्म॑ कृ॒ण्वन्तो॒ गोत॑मासो अ॒र्कैरू॒र्ध्वं नु॑नुद्र उत्स॒धिं पिब॑ध्यै ॥४॥

Ahani gridhrah parya va agurimam dhiyam varkaryam cha devim
Brahma krinvanto gotamaso arkairurdhvam nunudra utsadhim pibadhyai

ए॒तत् त्यन्न योज॑नमचेति स॒स्वर्ह॒ यन्म॑रुतो॒ गोत॑मो वः ।
पश्य॒न् हिर॑ण्यचक्रा॒नयो॑दंष्ट्रान् वि॒धाव॑तो व॒राहू॑न् ॥५॥

Etat tyanna yojanamacheti sasvarha yanmaruto gotamo vah
Pashyan hiranyachakranayodanshtran vidhavato varahun

ए॒षा स्या वो॑ मरुतोऽनुभ॒र्त्री प्रति॑ ष्टोभति वा॒घतो॒ न वाणी॑ ।
अस्तो॑भय॒द् वृथा॑सा॒मनु॑ स्व॒धां गभ॑स्त्योः ॥६॥

Esha sya vo marutonubhartri prati shtobhati vaghato na vani
Astobhayad vrithasamanu svadham gabhastyoh