Sukta 87

87.1

6 gotamo rahuganah, marutah, jagati

प्रत्व॑क्षस॒ः प्रत॑वसो विर॒प्शिनो ऽना॑नता॒ अवि॑थुरा ऋजी॒षिण॑ः ।
जुष्ट॑तमासो॒ नृत॑मासो अ॒ञ्जिभि॒र्व्या॑नज्रे॒ के चि॑दु॒स्रा इ॑व॒ स्तृभि॑ः ॥१॥

Pratvakshasah pratavaso virapshino nanata avithura rijishinah
Jushtatamaso nritamaso anjibhirvyanajre ke chidusra iva stribhih

87.2

उ॒प॒ह्व॒रेषु॒ यदचि॑ध्वं य॒यिं वय॑ इव मरुत॒ः केन॑ चित् प॒था ।
श्चोत॑न्ति॒ कोशा॒ उप॑ वो॒ रथे॒ष्वा घृ॒तमु॑क्षता॒ मधु॑वर्ण॒मर्च॑ते ॥२॥

Upahvareshu yadachidhvam yayim vaya iva marutah kena chit patha
Shchotanti kosha upa vo ratheshva ghritamukshata madhuvarnamarchate

87.3

प्रैषा॒मज्मे॑षु विथु॒रेव॑ रेजते॒ भूमि॒र्यामे॑षु॒ यद्ध॑ यु॒ञ्जते॑ शु॒भे ।
ते क्री॒ळयो॒ धुन॑यो॒ भ्राज॑दृष्टयः स्व॒यं म॑हि॒त्वं प॑नयन्त॒ धूत॑यः ॥३॥

Praishamajmeshu vithureva rejate bhumiryameshu yaddha yunjate shubhe
Te krilayo dhunayo bhrajadrishtayah svayam mahitvam panayanta dhutayah

87.4

स हि स्व॒सृत् पृष॑दश्वो॒ युवा॑ ग॒णो॒ ३ ऽया ई॑शा॒नस्तवि॑षीभि॒रावृ॑तः ।
असि॑ स॒त्य ऋ॑ण॒यावाने॑द्यो॒ ऽस्या धि॒यः प्रा॑वि॒ताथा॒ वृषा॑ ग॒णः ॥४॥

Sa hi svasrit prishadashvo yuva gano 3 ya ishanastavishibhiravritah
Asi satya rinayavanedyo sya dhiyah pravitatha vrisha ganah

87.5

पि॒तुः प्र॒त्नस्य॒ जन्म॑ना वदामसि॒ सोम॑स्य जि॒ह्वा प्र जि॑गाति॒ चक्ष॑सा ।
यदी॒मिन्द्रं॒ शम्यृक्वा॑ण॒ आश॒तादिन्नामा॑नि य॒ज्ञिया॑नि दधिरे ॥५॥

Pituh pratnasya janmana vadamasi somasya jihva pra jigati chakshasa
Yadimindram shamyrikvana ashatadinnamani yagyiyani dadhire

87.6

श्रि॒यसे॒ कं भा॒नुभि॒ः सं मि॑मिक्षिरे॒ ते र॒श्मिभि॒स्त ऋक्व॑भिः सुखा॒दय॑ः ।
ते वाशी॑मन्त इ॒ष्मिणो॒ अभी॑रवो वि॒द्रे प्रि॒यस्य॒ मारु॑तस्य॒ धाम्न॑ः ॥६॥

Shriyase kam bhanubhih sam mimikshire te rashmibhista rikvabhih sukhadayah
Te vashimanta ishmino abhiravo vidre priyasya marutasya dhamnah