সূক্ত 87

87.1

৬ গোতমো রাহূগণঃ। মরুতঃ। জগতী।

প্রত্বক্ষসঃ প্রতবসো বিরপ্শিনো ঽনানতা অবিথুরা ঋজীষিণঃ ।
জুষ্টতমাসো নৃতমাসো অঞ্জিভির্ব্যানজ্রে কে চিদুস্রা ইব স্তৃভিঃ ॥১॥

87.2

উপহ্বরেষু যদচিধ্বং যয়িং বয় ইব মরুতঃ কেন চিৎ পথা ।
শ্চোতন্তি কোশা উপ বো রথেষ্বা ঘৃতমুক্ষতা মধুবর্ণমর্চতে ॥২॥

87.3

প্রৈষামজ্মেষু বিথুরেব রেজতে ভূমির্যামেষু যদ্ধ যুঞ্জতে শুভে ।
তে ক্রীলয়ো ধুনয়ো ভ্রাজদৃষ্টয়ঃ স্বয়ং মহিত্বং পনয়ন্ত ধূতয়ঃ ॥৩॥

87.4

স হি স্বসৃৎ পৃষদশ্বো যুবা গণো ৩ ঽয়া ঈশানস্তবিষীভিরাবৃতঃ ।
অসি সত্য ঋণয়াবানেদ্যো ঽস্যা ধিয়ঃ প্রাবিতাথা বৃষা গণঃ ॥৪॥

87.5

পিতুঃ প্রত্নস্য জন্মনা বদামসি সোমস্য জিহ্বা প্র জিগাতি চক্ষসা ।
যদীমিন্দ্রং শম্যৃক্বাণ আশতাদিন্নামানি যজ্ঞিয়ানি দধিরে ॥৫॥

87.6

শ্রিয়সে কং ভানুভিঃ সং মিমিক্ষিরে তে রশ্মিভিস্ত ঋক্বভিঃ সুখাদয়ঃ ।
তে বাশীমন্ত ইষ্মিণো অভীরবো বিদ্রে প্রিয়স্য মারুতস্য ধাম্নঃ ॥৬॥