Sukta 93

93.1

12 gotamo rahuganah, agnishomau, 1-3 anushtup, 4-7, 12 trishtup, 8 jagati trishtubva, 9-11 gayatri

अग्नी॑षोमावि॒मं सु मे॑ शृणु॒तं वृ॑षणा॒ हव॑म् ।
प्रति॑ सू॒क्तानि॑ हर्यतं॒ भव॑तं दा॒शुषे॒ मय॑ः ॥१॥

Agnishomavimam su me shrinutam vrishana havam
Prati suktani haryatam bhavatam dashushe mayah

अग्नी॑षोमा॒ यो अ॒द्य वा॑मि॒दं वच॑ः सप॒र्यति॑ ।
तस्मै॑ धत्तं सु॒वीर्यं॒ गवां॒ पोषं॒ स्वश्व्य॑म् ॥२॥

Agnishoma yo adya vamidam vachah saparyati
Tasmai dhattam suviryam gavam posham svashvyam

अग्नी॑षोमा॒ य आहु॑तिं॒ यो वां॒ दाशा॑द्ध॒विष्कृ॑तिम् ।
स प्र॒जया॑ सु॒वीर्यं॒ विश्व॒मायु॒र्व्य॑श्नवत् ॥३॥

Agnishoma ya ahutim yo vam dashaddhavishkritim
Sa prajaya suviryam vishvamayurvyashnavat

अग्नी॑षोमा॒ चेति॒ तद् वी॒र्यं॑ वां॒ यदमु॑ष्णीतमव॒सं प॒णिं गाः ।
अवा॑तिरतं॒ बृस॑यस्य॒ शेषो ऽवि॑न्दतं॒ ज्योति॒रेकं॑ ब॒हुभ्य॑ः ॥४॥

Agnishoma cheti tad viryam vam yadamushnitamavasam panim gah
Avatiratam brisayasya shesho vindatam jyotirekam bahubhyah

यु॒वमे॒तानि॑ दि॒वि रो॑च॒नान्य॒ग्निश्च॑ सोम॒ सक्र॑तू अधत्तम् ।
यु॒वं सिन्धूँ॑र॒भिश॑स्तेरव॒द्यादग्नी॑षोमा॒वमु॑ञ्चतं गृभी॒तान् ॥५॥

Yuvametani divi rochananyagnishcha soma sakratu adhattam
Yuvam sindhunrabhishasteravadyadagnishomavamunchatam gribhitan

आन्यं दि॒वो मा॑त॒रिश्वा॑ जभा॒राम॑थ्नाद॒न्यं परि॑ श्ये॒नो अद्रे॑ः ।
अग्नी॑षोमा॒ ब्रह्म॑णा वावृधा॒नोरुं य॒ज्ञाय॑ चक्रथुरु लो॒कम् ॥६॥

Anyam divo matarishva jabharamathnadanyam pari shyeno adreh
Agnishoma brahmana vavridhanorum yagyaya chakrathuru lokam

अग्नी॑षोमा ह॒विष॒ः प्रस्थि॑तस्य वी॒तं हर्य॑तं वृषणा जु॒षेथा॑म् ।
सु॒शर्मा॑णा॒ स्वव॑सा॒ हि भू॒तमथा॑ धत्तं॒ यज॑मानाय॒ शं योः ॥७॥

Agnishoma havishah prasthitasya vitam haryatam vrishana jushetham
Susharmana svavasa hi bhutamatha dhattam yajamanaya sham yoh

यो अ॒ग्नीषोमा॑ ह॒विषा॑ सप॒र्याद् दे॑व॒द्रीचा॒ मन॑सा॒ यो घृ॒तेन॑ ।
तस्य॑ व्र॒तं र॑क्षतं पा॒तमंह॑सो वि॒शे जना॑य॒ महि॒ शर्म॑ यच्छतम् ॥८॥

Yo agnishoma havisha saparyad devadricha manasa yo ghritena
Tasya vratam rakshatam patamanhaso vishe janaya mahi sharma yachchhatam

अग्नी॑षोमा॒ सवे॑दसा॒ सहू॑ती वनतं॒ गिर॑ः । सं दे॑व॒त्रा ब॑भूवथुः ॥९॥

Agnishoma savedasa sahuti vanatam girah, sam devatra babhuvathuh

अग्नी॑षोमाव॒नेन॑ वां॒ यो वां॑ घृ॒तेन॒ दाश॑ति । तस्मै॑ दीदयतं बृ॒हत् ॥१०॥

Agnishomavanena vam yo vam ghritena dashati, tasmai didayatam brihat

अग्नी॑षोमावि॒मानि॑ नो यु॒वं ह॒व्या जु॑जोषतम् । आ या॑त॒मुप॑ न॒ः सचा॑ ॥११॥

Agnishomavimani no yuvam havya jujoshatam, a yatamupa nah sacha

अग्नी॑षोमा पिपृ॒तमर्व॑तो न॒ आ प्या॑यन्तामु॒स्रिया॑ हव्य॒सूद॑ः ।
अ॒स्मे बला॑नि म॒घव॑त्सु धत्तं कृणु॒तं नो॑ अध्व॒रं श्रु॑ष्टि॒मन्त॑म् ॥१२॥

Agnishoma pipritamarvato na a pyayantamusriya havyasudah
Asme balani maghavatsu dhattam krinutam no adhvaram shrushtimantam