সূক্ত 94

94.1

১৬ কুত্স আঙ্গিরসঃ। অগ্নিঃ(জাতবেদাঃ), ৮ (ত্রয়ঃ পাদাঃ) দেবাঃ, ১৬ উত্তরার্ধস্য অগ্নিঃ, মিত্রবরুণাদিতিসিন্ধু পৃথিবীদ্যাবো বা। জগতী, ১৫-১৬ ত্রিষ্টুপ্ ।

ইমং স্তোমমর্হতে জাতবেদসে রথমিব সং মহেমা মনীষয়া ।
ভদ্রা হি নঃ প্রমতিরস্য সংসদ্যগ্নে সখ্যে মা রিষামা বয়ং তব ॥১॥

যস্মৈ ত্বমায়জসে স সাধত্যনর্বা ক্ষেতি দধতে সুবীর্যম্ ।
স তূতাব নৈনমশ্নোত্যংহতিরগ্নে সখ্যে মা রিষামা বয়ং তব ॥২॥

শকেম ত্বা সমিধং সাধয়া ধিয়স্ত্বে দেবা হবিরদন্ত্যাহুতম্ ।
ত্বমাদিত্যাঁ আ বহ তান্হ্যু ১ শ্মস্যগ্নে সখ্যে মা রিষামা বয়ং তব ॥৩॥

ভরামেধ্মং কৃণবামা হবীংষি তে চিতয়ন্তঃ পর্বণাপর্বণা বয়ম্ ।
জীবাতবে প্রতরং সাধয়া ধিয়ো ঽগ্নে সখ্যে মা রিষামা বয়ং তব ॥৪॥

বিশাং গোপা অস্য চরন্তি জন্তবো দ্বিপচ্চ যদুত চতুষ্পদক্তুভিঃ ।
চিত্রঃ প্রকেত উষসো মহাঁ অস্যগ্নে সখ্যে মা রিষামা বয়ং তব ॥৫॥

ত্বমধ্বর্যুরুত হোতাসি পূর্ব্যঃ প্রশাস্তা পোতা জনুষা পুরোহিতঃ ।
বিশ্বা বিদ্বাঁ আর্ত্বিজ্যা ধীর পুষ্যস্যগ্নে সখ্যে মা রিষামা বয়ং তব ॥৬॥

যো বিশ্বতঃ সুপ্রতীকঃ সদৃঙ্ঙসি দূরে চিত্সন্তলিদিবাতি রোচসে ।
রাত্র্যাশ্চিদন্ধো অতি দেব পশ্যস্যগ্নে সখ্যে মা রিষামা বয়ং তব ॥৭॥

পূর্বো দেবা ভবতু সুন্বতো রথো ঽস্মাকং শংসো অভ্যস্তু দূঢ্যঃ ।
তদা জানীতোত পুষ্যতা বচো ঽগ্নে সখ্যে মা রিষামা বয়ং তব ॥৮॥

বধৈর্দুঃশংসাঁ অপ দূঢ্যো জহি দূরে বা যে অন্তি বা কে চিদত্রিণঃ ।
অথা যজ্ঞায় গৃণতে সুগং কৃধ্যগ্নে সখ্যে মা রিষামা বয়ং তব ॥৯॥

যদয়ুক্থা অরুষা রোহিতা রথে বাতজূতা বৃষভস্যেব তে রবঃ ।
আদিন্বসি বনিনো ধূমকেতুনা ঽগ্নে সখ্যে মা রিষামা বয়ং তব ॥১০॥

অধ স্বনাদুত বিভ্যুঃ পতত্রিণো দ্রপ্সা যত্তে যবসাদো ব্যস্থিরন্ ।
সুগং তত্তে তাবকেভ্যো রথেভ্যো ঽগ্নে সখ্যে মা রিষামা বয়ং তব ॥১১॥

অয়ং মিত্রস্য বরুণস্য ধায়সে ঽবয়াতাং মরুতাং হেলো অদ্ভুতঃ ।
মৃলা সু নো ভূত্বেষাং মনঃ পুনরগ্নে সখ্যে মা রিষামা বয়ং তব ॥১২॥

দেবো দেবানামসি মিত্রো অদ্ভুতো বসুর্বসূনামসি চারুরধ্বরে ।
শর্মন্ত্স্যাম তব সপ্রথস্তমে ঽগ্নে সখ্যে মা রিষামা বয়ং তব ॥১৩॥

তত্তে ভদ্রং যৎ সমিদ্ধঃ স্বে দমে সোমাহুতো জরসে মৃলয়ত্তমঃ ।
দধাসি রত্নং দ্রবিণং চ দাশুষে ঽগ্নে সখ্যে মা রিষামা বয়ং তব ॥১৪॥

যস্মৈ ত্বং সুদ্রবিণো দদাশো ঽনাগাস্ত্বমদিতে সর্বতাতা ।
যং ভদ্রেণ শবসা চোদয়াসি প্রজাবতা রাধসা তে স্যাম ॥১৫॥

স ত্বমগ্নে সৌভগত্বস্য বিদ্বানস্মাকমায়ুঃ প্র তিরেহ দেব ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥১৬॥