সূক্ত 95

95.1

১১ কুত্স আঙ্গিরসঃ। অগ্নিঃ, ঔষসোঽগ্নির্বা । ত্রিষ্টুপ্

দ্বে বিরূপে চরতঃ স্বর্থে অন্যান্যা বত্সমুপ ধাপয়েতে ।
হরিরন্যস্যাং ভবতি স্বধাবাঞ্ ছুক্রো অন্যস্যাং দদৃশে সুবর্চাঃ ॥১॥

95.2

দশেমং ত্বষ্টুর্জনয়ন্ত গর্ভমতন্দ্রাসো যুবতয়ো বিভৃত্রম্ ।
তিগ্মানীকং স্বয়শসং জনেষু বিরোচমানং পরি ষীং নয়ন্তি ॥২॥

95.3

ত্রীণি জানা পরি ভূষন্ত্যস্য সমুদ্র একং দিব্যেকমপ্সু ।
পূর্বামনু প্র দিশং পার্থিবানামৃতূন্ প্রশাসদ্ বি দধাবনুষ্ঠু ॥৩॥

95.4

ক ইমং বো নিণ্যমা চিকেত বত্সো মাতৄর্জনয়ত স্বধাভিঃ ।
বহ্বীনাং গর্ভো অপসামুপস্থান্মহান্ কবির্নিশ্চরতি স্বধাবান্ ॥৪॥

95.5

আবিষ্ট্যো বর্ধতে চারুরাসু জিহ্মানামূর্ধ্বঃ স্বয়শা উপস্থে ।
উভে ত্বষ্টুর্বিভ্যতুর্জায়মানাৎ প্রতীচী সিংহং প্রতি জোষয়েতে ॥৫॥

95.6

উভে ভদ্রে জোষয়েতে ন মেনে গাবো ন বাশ্রা উপ তস্থুরেবৈঃ ।
স দক্ষাণাং দক্ষপতির্বভূবাঞ্জন্তি যং দক্ষিণতো হবির্ভিঃ ॥৬॥

95.7

উদ্ যংয়মীতি সবিতেব বাহূ উভে সিচৌ যততে ভীম ঋঞ্জন্ ।
উচ্ছুক্রমত্কমজতে সিমস্মান্নবা মাতৃভ্যো বসনা জহাতি ॥৭॥

95.8

ত্বেষং রূপং কৃণুত উত্তরং যৎ সংপৃঞ্চানঃ সদনে গোভিরদ্ভিঃ ।
কবির্বুধ্নং পরি মর্মৃজ্যতে ধীঃ সা দেবতাতা সমিতির্বভূব ॥৮॥

95.9

উরু তে জ্রয়ঃ পর্যেতি বুধ্নং বিরোচমানং মহিষস্য ধাম ।
বিশ্বেভিরগ্নে স্বয়শোভিরিদ্ধো ঽদব্ধেভিঃ পায়ুভিঃ পাহ্যস্মান্ ॥৯॥

95.10

ধন্বন্ত্স্রোতঃ কৃণুতে গাতুমূর্মিং শুক্রৈরূর্মিভিরভি নক্ষতি ক্ষাম্ ।
বিশ্বা সনানি জঠরেষু ধত্তে ঽন্তর্নবাসু চরতি প্রসূষু ॥১০॥

95.11

এবা নো অগ্নে সমিধা বৃধানো রেবৎ পাবক শ্রবসে বি ভাহি ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥১১॥