অধ্যায় 136

136.1

সংজয় উবাচ
ততো যুধিষ্ঠিরশ্চৈব ভীমসেনশ্চ পাণ্ডবঃ
দ্রোণপুত্রং মহারাজ সমন্তাত্পর্যবারয়ন্

ততো দুর্যোধনো রাজা ভারদ্বাজেন সংবৃতঃ
অভ্যয়াত্পাণ্ডবান্সংখ্যে ততো যুদ্ধমবর্তত
ঘোররূপং মহারাজ ভীরূণাং ভয়বর্ধনম্

অম্বষ্ঠান্মালবান্বঙ্গাঞ্শিবীংস্ত্রৈগর্তকানপি
প্রাহিণোন্মৃত্যুলোকায় গণান্ক্রুদ্ধো যুধিষ্ঠিরঃ

অভীষাহাঞ্শূরসেনান্ক্ষত্রিয়ান্যুদ্ধদুর্মদান্
নিকৃত্য পৃথিবীং চক্রে ভীমঃ শোণিতকর্দমাম্

যৌধেয়ারট্টরাজন্যান্মদ্রকাংশ্চ গণান্যুধি
প্রাহিণোন্মৃত্যুলোকায় কিরীটী নিশিতৈঃ শরৈঃ

প্রগাঢমঞ্জোগতিভির্নারাচৈরভিপীডিতাঃ
নিপেতুর্দ্বিরদা ভূমৌ দ্বিশৃঙ্গা ইব পর্বতাঃ

নিকৃত্তৈর্হস্তিহস্তৈশ্চ লুঠমানৈস্ততস্ততঃ
ররাজ বসুধা কীর্ণা বিসর্পদ্ভিরিবোরগৈঃ

ক্ষিপ্তৈঃ কনকচিত্রৈশ্চ নৃপচ্ছত্রৈঃ ক্ষিতির্বভৌ
দ্যৌরিবাদিত্যচন্দ্রাদ্যৈর্গ্রহৈঃ কীর্ণা যুগক্ষয়ে

হত প্রহরতাভীতা বিধ্যত ব্যবকৃন্তত
ইত্যাসীত্তুমুলঃ শব্দঃ শোণাশ্বস্য রথং প্রতি

দ্রোণস্তু পরমক্রুদ্ধো বায়ব্যাস্ত্রেণ সংয়ুগে
ব্যধমত্তান্যথা বায়ুর্মেঘানিব দুরত্যয়ঃ

তে হন্যমানা দ্রোণেন পাঞ্চালাঃ প্রাদ্রবন্ভয়াৎ
পশ্যতো ভীমসেনস্য পার্থস্য চ মহাত্মনঃ

ততঃ কিরীটী ভীমশ্চ সহসা সংন্যবর্ততাম্
মহতা রথবংশেন পরিগৃহ্য বলং তব

বীভত্সুর্দক্ষিণং পার্শ্বমুত্তরং তু বৃকোদরঃ
ভারদ্বাজং শরৌঘাভ্যাং মহদ্ভ্যামভ্যবর্ষতাম্

তৌ তদা সৃঞ্জয়াশ্চৈব পাঞ্চালাশ্চ মহারথাঃ
অন্বগচ্ছন্মহারাজ মত্স্যাশ্চ সহ সোমকৈঃ

তথৈব তব পুত্রস্য রথোদারাঃ প্রহারিণঃ
মহত্যা সেনয়া সার্ধং জগ্মুর্দ্রোণরথং প্রতি

ততঃ সা ভারতী সেনা বধ্যমানা কিরীটিনা
তমসা নিদ্রয়া চৈব পুনরেব ব্যদীর্যত

দ্রোণেন বার্যমাণাস্তে স্বয়ং তব সুতেন চ
ন শক্যন্তে মহারাজ যোধা বারয়িতুং তদা

সা পাণ্ডুপুত্রস্য শরৈর্দার্যমাণা মহাচমূঃ
তমসা সংবৃতে লোকে ব্যদ্রবত্সর্বতোমুখী

উত্সৃজ্য শতশো বাহাংস্তত্র কেচিন্নরাধিপাঃ
প্রাদ্রবন্ত মহারাজ ভয়াবিষ্টাঃ সমন্ততঃ