UtshovChapter 136
136.1
संजय उवाच
ततो युधिष्ठिरश्चैव भीमसेनश्च पाण्डवः
द्रोणपुत्रं महाराज समन्तात्पर्यवारयन्
Sanjaya uvacha
Tato yudhishthirashchaiva bhimasenashcha pandavah
Dronaputram maharaja samantatparyavarayan
136.2
ततो दुर्योधनो राजा भारद्वाजेन संवृतः
अभ्ययात्पाण्डवान्संख्ये ततो युद्धमवर्तत
घोररूपं महाराज भीरूणां भयवर्धनम्
Tato duryodhano raja bharadvajena sanvritah
Abhyayatpandavansankhye tato yuddhamavartata
Ghorarupam maharaja bhirunam bhayavardhanam
136.3
अम्बष्ठान्मालवान्वङ्गाञ्शिबींस्त्रैगर्तकानपि
प्राहिणोन्मृत्युलोकाय गणान्क्रुद्धो युधिष्ठिरः
Ambashthanmalavanvanganshibinstraigartakanapi
Prahinonmrityulokaya ganankruddho yudhishthirah
136.4
अभीषाहाञ्शूरसेनान्क्षत्रियान्युद्धदुर्मदान्
निकृत्य पृथिवीं चक्रे भीमः शोणितकर्दमाम्
Abhishahanshurasenankshatriyanyuddhadurmadan
Nikritya prithivim chakre bhimah shonitakardamam
136.5
यौधेयारट्टराजन्यान्मद्रकांश्च गणान्युधि
प्राहिणोन्मृत्युलोकाय किरीटी निशितैः शरैः
Yaudheyarattarajanyanmadrakanshcha gananyudhi
Prahinonmrityulokaya kiriti nishitaih sharaih
136.6
प्रगाढमञ्जोगतिभिर्नाराचैरभिपीडिताः
निपेतुर्द्विरदा भूमौ द्विशृङ्गा इव पर्वताः
Pragadhamanjogatibhirnarachairabhipiditah
Nipeturdvirada bhumau dvishringa iva parvatah
136.7
निकृत्तैर्हस्तिहस्तैश्च लुठमानैस्ततस्ततः
रराज वसुधा कीर्णा विसर्पद्भिरिवोरगैः
Nikrittairhastihastaishcha luthamanaistatastatah
Raraja vasudha kirna visarpadbhirivoragaih
136.8
क्षिप्तैः कनकचित्रैश्च नृपच्छत्रैः क्षितिर्बभौ
द्यौरिवादित्यचन्द्राद्यैर्ग्रहैः कीर्णा युगक्षये
Kshiptaih kanakachitraishcha nripachchhatraih kshitirbabhau
Dyaurivadityachandradyairgrahaih kirna yugakshaye
136.9
हत प्रहरताभीता विध्यत व्यवकृन्तत
इत्यासीत्तुमुलः शब्दः शोणाश्वस्य रथं प्रति
Hata praharatabhita vidhyata vyavakrintata
Ityasittumulah shabdah shonashvasya ratham prati
136.10
द्रोणस्तु परमक्रुद्धो वायव्यास्त्रेण संयुगे
व्यधमत्तान्यथा वायुर्मेघानिव दुरत्ययः
Dronastu paramakruddho vayavyastrena sanyuge
Vyadhamattanyatha vayurmeghaniva duratyayah
136.11
ते हन्यमाना द्रोणेन पाञ्चालाः प्राद्रवन्भयात्
पश्यतो भीमसेनस्य पार्थस्य च महात्मनः
Te hanyamana dronena panchalah pradravanbhayat
Pashyato bhimasenasya parthasya cha mahatmanah
136.12
ततः किरीटी भीमश्च सहसा संन्यवर्तताम्
महता रथवंशेन परिगृह्य बलं तव
Tatah kiriti bhimashcha sahasa sannyavartatam
Mahata rathavanshena parigrihya balam tava
136.13
बीभत्सुर्दक्षिणं पार्श्वमुत्तरं तु वृकोदरः
भारद्वाजं शरौघाभ्यां महद्भ्यामभ्यवर्षताम्
Bibhatsurdakshinam parshvamuttaram tu vrikodarah
Bharadvajam sharaughabhyam mahadbhyamabhyavarshatam
136.14
तौ तदा सृञ्जयाश्चैव पाञ्चालाश्च महारथाः
अन्वगच्छन्महाराज मत्स्याश्च सह सोमकैः
Tau tada srinjayashchaiva panchalashcha maharathah
Anvagachchhanmaharaja matsyashcha saha somakaih
136.15
तथैव तव पुत्रस्य रथोदाराः प्रहारिणः
महत्या सेनया सार्धं जग्मुर्द्रोणरथं प्रति
Tathaiva tava putrasya rathodarah praharinah
Mahatya senaya sardham jagmurdronaratham prati
136.16
ततः सा भारती सेना वध्यमाना किरीटिना
तमसा निद्रया चैव पुनरेव व्यदीर्यत
Tatah sa bharati sena vadhyamana kiritina
Tamasa nidraya chaiva punareva vyadiryata
136.17
द्रोणेन वार्यमाणास्ते स्वयं तव सुतेन च
न शक्यन्ते महाराज योधा वारयितुं तदा
Dronena varyamanaste svayam tava sutena cha
Na shakyante maharaja yodha varayitum tada
136.18
सा पाण्डुपुत्रस्य शरैर्दार्यमाणा महाचमूः
तमसा संवृते लोके व्यद्रवत्सर्वतोमुखी
Sa panduputrasya sharairdaryamana mahachamuh
Tamasa sanvrite loke vyadravatsarvatomukhi
136.19
उत्सृज्य शतशो वाहांस्तत्र केचिन्नराधिपाः
प्राद्रवन्त महाराज भयाविष्टाः समन्ततः
Utsrijya shatasho vahanstatra kechinnaradhipah
Pradravanta maharaja bhayavishtah samantatah