Utshovঅধ্যায় 137
137.1
সংজয় উবাচ
সোমদত্তং তু সংপ্রেক্ষ্য বিধুন্বানং মহদ্ধনুঃ
সাত্যকিঃ প্রাহ যন্তারং সোমদত্তায় মাং বহ
137.2
ন হ্যহত্বা রণে শত্রুং বাহ্লীকং কৌরবাধমম্
নিবর্তিষ্যে রণাত্সূত সত্যমেতদ্বচো মম
137.3
ততঃ সংপ্রেষয়দ্যন্তা সৈন্ধবাংস্তান্মহাজবান্
তুরঙ্গমাঞ্শঙ্খবর্ণান্সর্বশব্দাতিগান্রণে
137.4
তেঽবহন্যুয়ুধানং তু মনোমারুতরংহসঃ
যথেন্দ্রং হরয়ো রাজন্পুরা দৈত্যবধোদ্যতম্
137.5
তমাপতন্তং সংপ্রেক্ষ্য সাত্বতং রভসং রণে
সোমদত্তো মহাবাহুরসংভ্রান্তোঽভ্যবর্তত
137.6
বিমুঞ্চঞ্শরবর্ষাণি পর্জন্য ইব বৃষ্টিমান্
ছাদয়ামাস শৈনেয়ং জলদো ভাস্করং যথা
137.7
অসংভ্রান্তশ্চ সমরে সাত্যকিঃ কুরুপুংগবম্
ছাদয়ামাস বাণৌঘৈঃ সমন্তাদ্ভরতর্ষভ
137.8
সোমদত্তস্তু তং ষষ্ট্যা বিব্যাধোরসি মাধবম্
সাত্যকিশ্চাপি তং রাজন্নবিধ্যত্সায়কৈঃ শিতৈঃ
137.9
তাবন্যোন্যং শরৈঃ কৃত্তৌ ব্যরাজেতাং নরর্ষভৌ
সুপুষ্পৌ পুষ্পসময়ে পুষ্পিতাবিব কিংশুকৌ
137.10
রুধিরোক্ষিতসর্বাঙ্গৌ কুরুবৃষ্ণিয়শস্করৌ
পরস্পরমবেক্ষেতাং দহন্তাবিব লোচনৈঃ
137.11
রথমণ্ডলমার্গেষু চরন্তাবরিমর্দনৌ
ঘোররূপৌ হি তাবাস্তাং বৃষ্টিমন্তাবিবাম্বুদৌ
137.12
শরসংভিন্নগাত্রৌ তৌ সর্বতঃ শকলীকৃতৌ
শ্বাবিধাবিব রাজেন্দ্র ব্যদৃশ্যেতাং শরক্ষতৌ
137.13
সুবর্ণপুঙ্খৈরিষুভিরাচিতৌ তৌ ব্যরোচতাম্
খদ্যোতৈরাবৃতৌ রাজন্প্রাবৃষীব বনস্পতী
137.14
সংপ্রদীপিতসর্বাঙ্গৌ সায়কৈস্তৌ মহারথৌ
অদৃশ্যেতাং রণে ক্রুদ্ধাবুল্কাভিরিব কুঞ্জরৌ
137.15
ততো যুধি মহারাজ সোমদত্তো মহারথঃ
অর্ধচন্দ্রেণ চিচ্ছেদ মাধবস্য মহদ্ধনুঃ
137.16
অথৈনং পঞ্চবিংশত্যা সায়কানাং সমার্পয়ৎ
ত্বরমাণস্ত্বরাকালে পুনশ্চ দশভিঃ শরৈঃ
137.17
অথান্যদ্ধনুরাদায় সাত্যকির্বেগবত্তরম্
পঞ্চভিঃ সায়কৈস্তূর্ণং সোমদত্তমবিধ্যত
137.18
ততোঽপরেণ ভল্লেন ধ্বজং চিচ্ছেদ কাঞ্চনম্
বাহ্লীকস্য রণে রাজন্সাত্যকিঃ প্রহসন্নিব
137.19
সোমদত্তস্ত্বসংভ্রান্তো দৃষ্ট্বা কেতুং নিপাতিতম্
শৈনেয়ং পঞ্চবিংশত্যা সায়কানাং সমাচিনোৎ
137.20
সাত্বতোঽপি রণে ক্রুদ্ধঃ সোমদত্তস্য ধন্বিনঃ
ধনুশ্চিচ্ছেদ সমরে ক্ষুরপ্রেণ শিতেন হ
137.21
অথৈনং রুক্মপুঙ্খানাং শতেন নতপর্বণাম্
আচিনোদ্বহুধা রাজন্ভগ্নদংষ্ট্রমিব দ্বিপম্
137.22
অথান্যদ্ধনুরাদায় সোমদত্তো মহারথঃ
সাত্যকিং ছাদয়ামাস শরবৃষ্ট্যা মহাবলঃ
137.23
সোমদত্তং তু সংক্রুদ্ধো রণে বিব্যাধ সাত্যকিঃ
সাত্যকিং চেষুজালেন সোমদত্তো অপীডয়ৎ
137.24
দশভিঃ সাত্বতস্যার্থে ভীমোঽহন্বাহ্লিকাত্মজম্
সোমদত্তোঽপ্যসংভ্রান্তঃ শৈনেয়মবধীচ্ছরৈঃ
137.25
ততস্তু সাত্বতস্যার্থে ভৈমসেনির্নবং দৃঢম্
মুমোচ পরিঘং ঘোরং সোমদত্তস্য বক্ষসি
137.26
তমাপতন্তং বেগেন পরিঘং ঘোরদর্শনম্
দ্বিধা চিচ্ছেদ সমরে প্রহসন্নিব কৌরবঃ
137.27
স পপাত দ্বিধা ছিন্ন আয়সঃ পরিঘো মহান্
মহীধরস্যেব মহচ্ছিখরং বজ্রদারিতম্
137.28
ততস্তু সাত্যকী রাজন্সোমদত্তস্য সংয়ুগে
ধনুশ্চিচ্ছেদ ভল্লেন হস্তাবাপং চ পঞ্চভিঃ
137.29
চতুর্ভিস্তু শরৈস্তূর্ণং চতুরস্তুরগোত্তমান্
সমীপং প্রেষয়ামাস প্রেতরাজস্য ভারত
137.30
সারথেশ্চ শিরঃ কায়াদ্ভল্লেন নতপর্বণা
জহার রথশার্দূলঃ প্রহসঞ্শিনিপুংগবঃ
137.31
ততঃ শরং মহাঘোরং জ্বলন্তমিব পাবকম্
মুমোচ সাত্বতো রাজন্স্বর্ণপুঙ্খং শিলাশিতম্
137.32
স বিমুক্তো বলবতা শৈনেয়েন শরোত্তমঃ
ঘোরস্তস্যোরসি বিভো নিপপাতাশু ভারত
137.33
সোঽতিবিদ্ধো বলবতা সাত্বতেন মহারথঃ
সোমদত্তো মহাবাহুর্নিপপাত মমার চ
137.34
তং দৃষ্ট্বা নিহতং তত্র সোমদত্তং মহারথাঃ
মহতা শরবর্ষেণ যুয়ুধানমুপাদ্রবন্
137.35
ছাদ্যমানং শরৈর্দৃষ্ট্বা যুয়ুধানং যুধিষ্ঠিরঃ
মহত্যা সেনয়া সার্ধং দ্রোণানীকমুপাদ্রবৎ
137.36
ততো যুধিষ্ঠিরঃ ক্রুদ্ধস্তাবকানাং মহাবলম্
শরৈর্বিদ্রাবয়ামাস ভারদ্বাজস্য পশ্যতঃ
137.37
সৈন্যানি দ্রাবয়ন্তং তু দ্রোণো দৃষ্ট্বা যুধিষ্ঠিরম্
অভিদুদ্রাব বেগেন ক্রোধসংরক্তলোচনঃ
137.38
ততঃ সুনিশিতৈর্বাণৈঃ পার্থং বিব্যাধ সপ্তভিঃ
সোঽতিবিদ্ধো মহাবাহুঃ সৃক্কিণী পরিসংলিহন্
যুধিষ্ঠিরস্য চিচ্ছেদ ধ্বজং কার্মুকমেব চ
137.39
স ছিন্নধন্বা ত্বরিতস্ত্বরাকালে নৃপোত্তমঃ
অন্যদাদত্ত বেগেন কার্মুকং সমরে দৃঢম্
137.40
ততঃ শরসহস্রেণ দ্রোণং বিব্যাধ পার্থিবঃ
সাশ্বসূতধ্বজরথং তদদ্ভুতমিবাভবৎ
137.41
ততো মুহূর্তং ব্যথিতঃ শরঘাতপ্রপীডিতঃ
নিষসাদ রথোপস্থে দ্রোণো ভরতসত্তম
137.42
প্রতিলভ্য ততঃ সংজ্ঞাং মুহূর্তাদ্দ্বিজসত্তমঃ
ক্রোধেন মহতাবিষ্টো বায়ব্যাস্ত্রমবাসৃজৎ
137.43
অসংভ্রান্তস্ততঃ পার্থো ধনুরাকৃষ্য বীর্যবান্
তদস্ত্রমস্ত্রেণ রণে স্তম্ভয়ামাস ভারত
137.44
ততোঽব্রবীদ্বাসুদেবঃ কুন্তীপুত্রং যুধিষ্ঠিরম্
যুধিষ্ঠির মহাবাহো যত্ত্বা বক্ষ্যামি তচ্ছৃণু
137.45
উপারমস্ব যুদ্ধায় দ্রোণাদ্ভরতসত্তম
গৃধ্যতে হি সদা দ্রোণো গ্রহণে তব সংয়ুগে
137.46
নানুরূপমহং মন্যে যুদ্ধমস্য ত্বয়া সহ
যোঽস্য সৃষ্টো বিনাশায় স এনং শ্বো হনিষ্যতি
137.47
পরিবর্জ্য গুরুং যাহি যত্র রাজা সুয়োধনঃ
ভীমশ্চ রথশার্দূলো যুধ্যতে কৌরবৈঃ সহ
137.48
বাসুদেববচঃ শ্রুত্বা ধর্মরাজো যুধিষ্ঠিরঃ
মুহূর্তং চিন্তয়িত্বা তু ততো দারুণমাহবম্
137.49
প্রায়াদ্দ্রুতমমিত্রঘ্নো যত্র ভীমো ব্যবস্থিতঃ
বিনিঘ্নংস্তাবকান্যোধান্ব্যাদিতাস্য ইবান্তকঃ
137.50
রথঘোষেণ মহতা নাদয়ন্বসুধাতলম্
পর্জন্য ইব ঘর্মান্তে নাদয়ন্বৈ দিশো দশ
137.51
ভীমস্য নিঘ্নতঃ শত্রূন্পার্ষ্ণিং জগ্রাহ পাণ্ডবঃ
দ্রোণোঽপি পাণ্ডুপাঞ্চালান্ব্যধমদ্রজনীমুখে