Utshovঅধ্যায় 138
138.1
সংজয় উবাচ
বর্তমানে তথা যুদ্ধে ঘোররূপে ভয়াবহে
তমসা সংবৃতে লোকে রজসা চ মহীপতে
নাপশ্যন্ত রণে যোধাঃ পরস্পরমবস্থিতাঃ
138.2
অনুমানেন সংজ্ঞাভির্যুদ্ধং তদ্ববৃতে মহৎ
নরনাগাশ্বমথনং পরমং লোমহর্ষণম্
138.3
দ্রোণকর্ণকৃপা বীরা ভীমপার্ষতসাত্যকাঃ
অন্যোন্যং ক্ষোভয়ামাসুঃ সৈন্যানি নৃপসত্তম
138.4
বধ্যমানানি সৈন্যানি সমন্তাত্তৈর্মহারথৈঃ
তমসা রজসা চৈব সমন্তাদ্বিপ্রদুদ্রুবুঃ
138.5
তে সর্বতো বিদ্রবন্তো যোধা বিত্রস্তচেতসঃ
অহন্যন্ত মহারাজ ধাবমানাশ্চ সংয়ুগে
138.6
মহারথসহস্রাণি জঘ্নুরন্যোন্যমাহবে
অন্ধে তমসি মূঢানি পুত্রস্য তব মন্ত্রিতে
138.7
ততঃ সর্বাণি সৈন্যানি সেনাগোপাশ্চ ভারত
ব্যমুহ্যন্ত রণে তত্র তমসা সংবৃতে সতি
138.8
ধৃতরাষ্ট্র উবাচ
তেষাং সংলোড্যমানানাং পাণ্ডবৈর্নিহতৌজসাম্
অন্ধে তমসি মগ্নানামাসীত্কা বো মতিস্তদা
138.9
কথং প্রকাশস্তেষাং বা মম সৈন্যেষু বা পুনঃ
বভূব লোকে তমসা তথা সংজয় সংবৃতে
138.10
সংজয় উবাচ
ততঃ সর্বাণি সৈন্যানি হতশিষ্টানি যানি বৈ
সেনাগোপ্তৄনথাদিশ্য পুনর্ব্যূহমকল্পয়ৎ
138.11
দ্রোণঃ পুরস্তাজ্জঘনে তু শল্য;স্তথা দ্রৌণিঃ পার্শ্বতঃ সৌবলশ্চ
স্বয়ং তু সর্বাণি বলানি রাজ;ন্রাজাভ্যয়াদ্গোপয়ন্বৈ নিশায়াম্
138.12
উবাচ সর্বাংশ্চ পদাতিসংঘা;ন্দুর্যোধনঃ পার্থিব সান্ত্বপূর্বম্
উত্সৃজ্য সর্বে পরমায়ুধানি; গৃহ্ণীত হস্তৈর্জ্বলিতান্প্রদীপান্
138.13
তে চোদিতাঃ পার্থিবসত্তমেন; ততঃ প্রহৃষ্টা জগৃহুঃ প্রদীপান্
সা ভূয় এব ধ্বজিনী বিভক্তা; ব্যরোচতাগ্নিপ্রভয়া নিশায়াম্
138.14
মহাধনৈরাভরণৈশ্চ দিব্যৈঃ; শস্ত্রৈঃ প্রদীপ্তৈরভিসংপতদ্ভিঃ
ক্ষণেন সর্বে বিহিতাঃ প্রদীপা; ব্যদীপয়ংশ্চ ধ্বজিনীং তদাশু
138.15
সর্বাস্তু সেনা ব্যতিসেব্যমানাঃ; পদাতিভিঃ পাবকতৈলহস্তৈঃ
প্রকাশ্যমানা দদৃশুর্নিশায়াং; যথান্তরিক্ষে জলদাস্তডিদ্ভিঃ
138.16
প্রকাশিতায়াং তু তথা ধ্বজিন্যাং; দ্রোণোঽগ্নিকল্পঃ প্রতপন্সমন্তাৎ
ররাজ রাজেন্দ্র সুবর্ণবর্মা; মধ্যং গতঃ সূর্য ইবাংশুমালী
138.17
জাম্বূনদেষ্বাভরণেষু চৈব; নিষ্কেষু শুদ্ধেষু শরাবরেষু
পীতেষু শস্ত্রেষু চ পাবকস্য; প্রতিপ্রভাস্তত্র ততো বভূবুঃ
138.18
গদাশ্চ শৈক্যাঃ পরিঘাশ্চ শুভ্রা; রথেষু শক্ত্যশ্চ বিবর্তমানাঃ
প্রতিপ্রভা রশ্মিভিরাজমীঢ; পুনঃ পুনঃ সংজনয়ন্তি দীপ্তাঃ
138.19
ছত্রাণি বালব্যজনানুষঙ্গা; দীপ্তা মহোল্কাশ্চ তথৈব রাজন্
ব্যাঘূর্ণমানাশ্চ সুবর্ণমালা; ব্যায়চ্ছতাং তত্র তদা বিরেজুঃ
138.20
শস্ত্রপ্রভাভিশ্চ বিরাজমানং; দীপপ্রভাভিশ্চ তদা বলং তৎ
প্রকাশিতং চাভরণপ্রভাভি;র্ভৃশং প্রকাশং নৃপতে বভূব
138.21
পীতানি শস্ত্রাণ্যসৃগুক্ষিতানি; বীরাবধূতানি তনুদ্রুহাণি
দীপ্তাং প্রভাং প্রাজনয়ন্ত তত্র; তপাত্যয়ে বিদ্যুদিবান্তরিক্ষে
138.22
প্রকম্পিতানামভিঘাতবেগৈ;রভিঘ্নতাং চাপততাং জবেন
বক্ত্রাণ্যশোভন্ত তদা নরাণাং; বায্বীরিতানীব মহাম্বুজানি
138.23
মহাবনে দাব ইব প্রদীপ্তে; যথা প্রভা ভাস্করস্যাপি নশ্যেৎ
তথা তবাসীদ্ধ্বজিনী প্রদীপ্তা; মহাভয়ে ভারত ভীমরূপা
138.24
তত্সংপ্রদীপ্তং বলমস্মদীয়ং; নিশাম্য পার্থাস্ত্বরিতাস্তথৈব
সর্বেষু সৈন্যেষু পদাতিসংঘা;নচোদয়ংস্তেঽথ চক্রুঃ প্রদীপান্
138.25
গজে গজে সপ্ত কৃতাঃ প্রদীপা; রথে রথে চৈব দশ প্রদীপাঃ
দ্বাবশ্বপৃষ্ঠে পরিপার্শ্বতোঽন্যে; ধ্বজেষু চান্যে জঘনেষু চান্যে
138.26
সেনাসু সর্বাসু চ পার্শ্বতোঽন্যে; পশ্চাত্পুরস্তাচ্চ সমন্ততশ্চ
মধ্যে তথান্যে জ্বলিতাগ্নিহস্তাঃ; সেনাদ্বয়েঽপি স্ম নরা বিচেরুঃ
138.27
সর্বেষু সৈন্যেষু পদাতিসংঘা; ব্যামিশ্রিতা হস্তিরথাশ্ববৃন্দৈঃ
মধ্যে তথান্যে জ্বলিতাগ্নিহস্তা; ব্যদীপয়ন্পাণ্ডুসুতস্য সেনাম্
138.28
তেন প্রদীপ্তেন তথা প্রদীপ্তং; বলং তদাসীদ্বলবদ্বলেন
ভাঃ কুর্বতা ভানুমতা গ্রহেণ; দিবাকরেণাগ্নিরিবাভিতপ্তঃ
138.29
তয়োঃ প্রভাঃ পৃথিবীমন্তরিক্ষং; সর্বা ব্যতিক্রম্য দিশশ্চ বৃদ্ধাঃ
তেন প্রকাশেন ভৃশং প্রকাশং; বভূব তেষাং তব চৈব সৈন্যম্
138.30
তেন প্রকাশেন দিবংগমেন; সংবোধিতা দেবগণাশ্চ রাজন্
গন্ধর্বয়ক্ষাসুরসিদ্ধসংঘাঃ; সমাগমন্নপ্সরসশ্চ সর্বাঃ
138.31
তদ্দেবগন্ধর্বসমাকুলং চ; যক্ষাসুরেন্দ্রাপ্সরসাং গণৈশ্চ
হতৈশ্চ বীরৈর্দিবমারুহদ্ভি;রায়োধনং দিব্যকল্পং বভূব
138.32
রথাশ্বনাগাকুলদীপদীপ্তং; সংরব্ধয়োধাহতবিদ্রুতাশ্বম্
মহদ্বলং ব্যূঢরথাশ্বনাগং; সুরাসুরব্যূহসমং বভূব
138.33
তচ্ছক্তিসংঘাকুলচণ্ডবাতং; মহারথাভ্রং রথবাজিঘোষম্
শস্ত্রৌঘবর্ষং রুধিরাম্বুধারং; নিশি প্রবৃত্তং নরদেবয়ুদ্ধম্
138.34
তস্মিন্মহাগ্নিপ্রতিমো মহাত্মা; সংতাপয়ন্পাণ্ডবান্বিপ্রমুখ্যঃ
গভস্তিভির্মধ্যগতো যথার্কো; বর্ষাত্যয়ে তদ্বদভূন্নরেন্দ্র