Utshovঅধ্যায় 139
139.1
সংজয় উবাচ
প্রকাশিতে তথা লোকে রজসা চ তমোবৃতে
সমাজগ্মুরথো বীরাঃ পরস্পরবধৈষিণঃ
139.2
তে সমেত্য রণে রাজঞ্শস্ত্রপ্রাসাসিধারিণঃ
পরস্পরমুদৈক্ষন্ত পরস্পরকৃতাগসঃ
139.3
প্রদীপানাং সহস্রৈশ্চ দীপ্যমানৈঃ সমন্ততঃ
বিররাজ তদা ভূমির্দ্যৌর্গ্রহৈরিব ভারত
139.4
উল্কাশতৈঃ প্রজ্বলিতৈ রণভূমির্ব্যরাজত
দহ্যমানেব লোকানামভাবে বৈ বসুংধরা
139.5
প্রাদীপ্যন্ত দিশঃ সর্বাঃ প্রদীপৈস্তৈঃ সমন্ততঃ
বর্ষাপ্রদোষে খদ্যোতৈর্বৃতা বৃক্ষা ইবাবভুঃ
139.6
অসজ্জন্ত ততো বীরা বীরেষ্বেব পৃথক্পৃথক্
নাগা নাগৈঃ সমাজগ্মুস্তুরগাঃ সহ বাজিভিঃ
139.7
রথা রথবরৈরেব সমাজগ্মুর্মুদান্বিতাঃ
তস্মিন্রাত্রিমুখে ঘোরে পুত্রস্য তব শাসনাৎ
139.8
ততোঽর্জুনো মহারাজ কৌরবাণামনীকিনীম্
ব্যধমত্ত্বরয়া যুক্তঃ ক্ষপয়ন্সর্বপার্থিবান্
139.9
ধৃতরাষ্ট্র উবাচ
তস্মিন্প্রবিষ্টে সংরব্ধে মম পুত্রস্য বাহিনীম্
অমৃষ্যমাণে দুর্ধর্ষে কিং ব আসীন্মনস্তদা
139.10
কিমমন্যন্ত সৈন্যানি প্রবিষ্টে শত্রুতাপনে
দুর্যোধনশ্চ কিং কৃত্যং প্রাপ্তকালমমন্যত
139.11
কে চৈনং সমরে বীরং প্রত্যুদ্যয়ুররিংদমম্
কেঽরক্ষন্দক্ষিণং চক্রং কে চ দ্রোণস্য সব্যতঃ
139.12
কে পৃষ্ঠতোঽস্য হ্যভবন্বীরা বীরস্য যুধ্যতঃ
কে পুরস্তাদগচ্ছন্ত নিঘ্নতঃ শাত্রবান্রণে
139.13
যত্প্রাবিশন্মহেষ্বাসঃ পাঞ্চালানপরাজিতঃ
নৃত্যন্নিব নরব্যাঘ্রো রথমার্গেষু বীর্যবান্
139.14
দদাহ চ শরৈর্দ্রোণঃ পাঞ্চালানাং রথব্রজান্
ধূমকেতুরিব ক্রুদ্ধঃ স কথং মৃত্যুমীয়িবান্
139.15
অব্যগ্রানেব হি পরান্কথয়স্যপরাজিতান্
হতাংশ্চৈব বিষণ্ণাংশ্চ বিপ্রকীর্ণাংশ্চ শংসসি
রথিনো বিরথাংশ্চৈব কৃতান্যুদ্ধেষু মামকান্
139.16
সংজয় উবাচ
দ্রোণস্য মতমাজ্ঞায় যোদ্ধুকামস্য তাং নিশাম্
দুর্যোধনো মহারাজ বশ্যান্ভ্রাতৄনভাষত
139.17
বিকর্ণং চিত্রসেনং চ মহাবাহুং চ কৌরবম্
দুর্ধর্ষং দীর্ঘবাহুং চ যে চ তেষাং পদানুগাঃ
139.18
দ্রোণং যত্তাঃ পরাক্রান্তাঃ সর্বে রক্ষত পৃষ্ঠতঃ
হার্দিক্যো দক্ষিণং চক্রং শল্যশ্চৈবোত্তরং তথা
139.19
ত্রিগর্তানাং চ যে শূরা হতশিষ্টা মহারথাঃ
তাংশ্চৈব সর্বান্পুত্রস্তে সমচোদয়দগ্রতঃ
139.20
আচার্যো হি সুসংয়ত্তো ভৃশং যত্তাশ্চ পাণ্ডবাঃ
তং রক্ষত সুসংয়ত্তা নিঘ্নন্তং শাত্রবান্রণে
139.21
দ্রোণো হি বলবান্যুদ্ধে ক্ষিপ্রহস্তঃ পরাক্রমী
নির্জয়েত্ত্রিদশান্যুদ্ধে কিমু পার্থান্সসোমকান্
139.22
তে যূয়ং সহিতাঃ সর্বে ভৃশং যত্তা মহারথাঃ
দ্রোণং রক্ষত পাঞ্চাল্যাদ্ধৃষ্টদ্যুম্নান্মহারথাৎ
139.23
পাণ্ডবেয়েষু সৈন্যেষু যোধং পশ্যাম্যহং ন তম্
যো জয়েত রণে দ্রোণং ধৃষ্টদ্যুম্নাদৃতে নৃপাঃ
139.24
তস্য সর্বাত্মনা মন্যে ভারদ্বাজস্য রক্ষণম্
স গুপ্তঃ সোমকান্হন্যাত্সৃঞ্জয়াংশ্চ সরাজকান্
139.25
সৃঞ্জয়েষ্বথ সর্বেষু নিহতেষু চমূমুখে
ধৃষ্টদ্যুম্নং রণে দ্রৌণির্নাশয়িষ্যত্যসংশয়ম্
139.26
তথার্জুনং রণে কর্ণো বিজেষ্যতি মহারথঃ
ভীমসেনমহং চাপি যুদ্ধে জেষ্যামি দংশিতঃ
139.27
সোঽয়ং মম জয়ো ব্যক্তং দীর্ঘকালং ভবিষ্যতি
তস্মাদ্রক্ষত সংগ্রামে দ্রোণমেব মহারথাঃ
139.28
ইত্যুক্ত্বা ভরতশ্রেষ্ঠ পুত্রো দুর্যোধনস্তব
ব্যাদিদেশ ততঃ সৈন্যং তস্মিংস্তমসি দারুণে
139.29
ততঃ প্রববৃতে যুদ্ধং রাত্রৌ তদ্ভরতর্ষভ
উভয়োঃ সেনয়োর্ঘোরং বিজয়ং প্রতি কাঙ্ক্ষিণোঃ
139.30
অর্জুনঃ কৌরবং সৈন্যমর্জুনং চাপি কৌরবাঃ
নানাশস্ত্রসমাবাপৈরন্যোন্যং পর্যপীডয়ন্
139.31
দ্রৌণিঃ পাঞ্চালরাজানং ভারদ্বাজশ্চ সৃঞ্জয়ান্
ছাদয়ামাসতুঃ সংখ্যে শরৈঃ সংনতপর্বভিঃ
139.32
পাণ্ডুপাঞ্চালসেনানাং কৌরবাণাং চ মারিষ
আসীন্নিষ্টানকো ঘোরো নিঘ্নতামিতরেতরম্
139.33
নৈবাস্মাভির্ন পূর্বৈর্নো দৃষ্টং পূর্বং তথাবিধম্
যুদ্ধং যাদৃশমেবাসীত্তাং রাত্রিং সুমহাভয়ম্