Utshovঅধ্যায় 140
140.1
সংজয় উবাচ
বর্তমানে তথা রৌদ্রে রাত্রিয়ুদ্ধে বিশাং পতে
সর্বভূতক্ষয়করে ধর্মপুত্রো যুধিষ্ঠিরঃ
140.2
অব্রবীত্পাণ্ডবাংশ্চৈব পাঞ্চালাংশ্চ সসোমকান্
অভ্যদ্রবত গচ্ছধ্বং দ্রোণমেব জিঘাংসয়া
140.3
রাজ্ঞস্তে বচনাদ্রাজন্পাঞ্চালাঃ সোমকাস্তথা
দ্রোণমেবাভ্যবর্তন্ত নদন্তো ভৈরবান্রবান্
140.4
তান্বয়ং প্রতিগর্জন্তঃ প্রত্যুদ্যাতাস্ত্বমর্ষিতাঃ
যথাশক্তি যথোত্সাহং যথাসত্ত্বং চ সংয়ুগে
140.5
কৃতবর্মা চ হার্দিক্যো যুধিষ্ঠিরমুপাদ্রবৎ
দ্রোণং প্রতি জিঘাংসন্তং মত্তো মত্তমিব দ্বিপম্
140.6
শৈনেয়ং শরবর্ষাণি বিকিরন্তং সমন্ততঃ
অভ্যয়াত্কৌরবো রাজন্ভূরিঃ সংগ্রামমূর্ধনি
140.7
সহদেবমথায়ান্তং দ্রোণপ্রেপ্সুং মহারথম্
কর্ণো বৈকর্তনো রাজন্বারয়ামাস পাণ্ডবম্
140.8
ভীমসেনমথায়ান্তং ব্যাদিতাস্যমিবান্তকম্
স্বয়ং দুর্যোধনো যুদ্ধে প্রতীপং মৃত্যুমাব্রজৎ
140.9
নকুলং চ যুধাং শ্রেষ্ঠং সর্বয়ুদ্ধবিশারদম্
শকুনিঃ সৌবলো রাজন্বারয়ামাস সত্বরঃ
140.10
শিখণ্ডিনমথায়ান্তং রথেন রথিনাং বরম্
কৃপো শারদ্বতো রাজন্বারয়ামাস সংয়ুগে
140.11
প্রতিবিন্ধ্যমথায়ান্তং ময়ূরসদৃশৈর্হয়ৈঃ
দুঃশাসনো মহারাজ যত্তো যত্তমবারয়ৎ
140.12
ভৈমসেনিমথায়ান্তং মায়াশতবিশারদম্
অশ্বত্থামা পিতুর্মানং কুর্বাণঃ প্রত্যষেধয়ৎ
140.13
দ্রুপদং বৃষসেনস্তু সসৈন্যং সপদানুগম্
বারয়ামাস সমরে দ্রোণপ্রেপ্সুং মহারথম্
140.14
বিরাটং দ্রুতমায়ান্তং দ্রোণস্য নিধনং প্রতি
মদ্ররাজঃ সুসংক্রুদ্ধো বারয়ামাস ভারত
140.15
শতানীকমথায়ান্তং নাকুলিং রভসং রণে
চিত্রসেনো রুরোধাশু শরৈর্দ্রোণবধেপ্সয়া
140.16
অর্জুনং চ যুধাং শ্রেষ্ঠং প্রাদ্রবন্তং মহারথম্
অলম্বুসো মহারাজ রাক্ষসেন্দ্রো ন্যবারয়ৎ
140.17
তথা দ্রোণং মহেষ্বাসং নিঘ্নন্তং শাত্রবান্রণে
ধৃষ্টদ্যুম্নোঽথ পাঞ্চাল্যো হৃষ্টরূপমবারয়ৎ
140.18
তথান্যান্পাণ্ডুপুত্রাণাং সমায়াতান্মহারথান্
তাবকা রথিনো রাজন্বারয়ামাসুরোজসা
140.19
গজারোহা গজৈস্তূর্ণং সংনিপত্য মহামৃধে
যোধয়ন্তঃ স্ম দৃশ্যন্তে শতশোঽথ সহস্রশঃ
140.20
নিশীথে তুরগা রাজন্নাদ্রবন্তঃ পরস্পরম্
সমদৃশ্যন্ত বেগেন পক্ষবন্ত ইবাদ্রয়ঃ
140.21
সাদিনঃ সাদিভিঃ সার্ধং প্রাসশক্ত্যৃষ্টিপাণয়ঃ
সমাগচ্ছন্মহারাজ বিনদন্তঃ পৃথক্পৃথক্
140.22
নরাস্তু বহবস্তত্র সমাজগ্মুঃ পরস্পরম্
গদাভির্মুসলৈশ্চৈব নানাশস্ত্রৈশ্চ সংঘশঃ
140.23
কৃতবর্মা তু হার্দিক্যো ধর্মপুত্রং যুধিষ্ঠিরম্
বারয়ামাস সংক্রুদ্ধো বেলেবোদ্বৃত্তমর্ণবম্
140.24
যুধিষ্ঠিরস্তু হার্দিক্যং বিদ্ধ্বা পঞ্চভিরাশুগৈঃ
পুনর্বিব্যাধ বিংশত্যা তিষ্ঠ তিষ্ঠেতি চাব্রবীৎ
140.25
কৃতবর্মা তু সংক্রুদ্ধো ধর্মপুত্রস্য মারিষ
ধনুশ্চিচ্ছেদ ভল্লেন তং চ বিব্যাধ সপ্তভিঃ
140.26
অথান্যদ্ধনুরাদায় ধর্মপুত্রো যুধিষ্ঠিরঃ
হার্দিক্যং দশভির্বাণৈর্বাহ্বোরুরসি চার্পয়ৎ
140.27
মাধবস্তু রণে বিদ্ধো ধর্মপুত্রেণ মারিষ
প্রাকম্পত চ রোষেণ সপ্তভিশ্চার্দয়চ্ছরৈঃ
140.28
তস্য পার্থো ধনুশ্ছিত্ত্বা হস্তাবাপং নিকৃত্য চ
প্রাহিণোন্নিশিতান্বাণান্পঞ্চ রাজঞ্শিলাশিতান্
140.29
তে তস্য কবচং ভিত্ত্বা হেমচিত্রং মহাধনম্
প্রাবিশন্ধরণীমুগ্রা বল্মীকমিব পন্নগাঃ
140.30
অক্ষ্ণোর্নিমেষমাত্রেণ সোঽন্যদাদায় কার্মুকম্
বিব্যাধ পাণ্ডবং ষষ্ট্যা সূতং চ নবভিঃ শরৈঃ
140.31
তস্য শক্তিমমেয়াত্মা পাণ্ডবো ভুজগোপমাম্
চিক্ষেপ ভরতশ্রেষ্ঠ রথে ন্যস্য মহদ্ধনুঃ
140.32
সা হেমচিত্রা মহতী পাণ্ডবেন প্রবেরিতা
নির্ভিদ্য দক্ষিণং বাহুং প্রাবিশদ্ধরণীতলম্
140.33
এতস্মিন্নেব কালে তু গৃহ্য পার্থঃ পুনর্ধনুঃ
হার্দিক্যং ছাদয়ামাস শরৈঃ সংনতপর্বভিঃ
140.34
ততস্তু সমরে শূরো বৃষ্ণীনাং প্রবরো রথী
ব্যশ্বসূতরথং চক্রে নিমেষার্ধাদ্যুধিষ্ঠিরম্
140.35
ততস্তু পাণ্ডবো জ্যেষ্ঠঃ খড্গচর্ম সমাদদে
তদস্য নিশিতৈর্বাণৈর্ব্যধমন্মাধবো রণে
140.36
তোমরং তু ততো গৃহ্য স্বর্ণদণ্ডং দুরাসদম্
প্রেষয়ত্সমরে তূর্ণং হার্দিক্যস্য যুধিষ্ঠিরঃ
140.37
তমাপতন্তং সহসা ধর্মরাজভুজচ্যুতম্
দ্বিধা চিচ্ছেদ হার্দিক্যঃ কৃতহস্তঃ স্ময়ন্নিব
140.38
ততঃ শরশতেনাজৌ ধর্মপুত্রমবাকিরৎ
কবচং চাস্য সংক্রুদ্ধঃ শরৈস্তীক্ষ্ণৈরদারয়ৎ
140.39
হার্দিক্যশরসংছিন্নং কবচং তন্মহাত্মনঃ
ব্যশীর্যত রণে রাজংস্তারাজালমিবাম্বরাৎ
140.40
স ছিন্নধন্বা বিরথঃ শীর্ণবর্মা শরার্দিতঃ
অপায়াসীদ্রণাত্তূর্ণং ধর্মপুত্রো যুধিষ্ঠিরঃ
140.41
কৃতবর্মা তু নির্জিত্য ধর্মপুত্রং যুধিষ্ঠিরম্
পুনর্দ্রোণস্য জুগুপে চক্রমেব মহাবলঃ