Utshovঅধ্যায় 141
141.1
সংজয় উবাচ
ভূরিস্তু সমরে রাজঞ্শৈনেয়ং রথিনাং বরম্
আপতন্তমপাসেধত্প্রপানাদিব কুঞ্জরম্
141.2
অথৈনং সাত্যকিঃ ক্রুদ্ধঃ পঞ্চভির্নিশিতৈঃ শরৈঃ
বিব্যাধ হৃদয়ে তূর্ণং প্রাস্রবত্তস্য শোণিতম্
141.3
তথৈব কৌরবো যুদ্ধে শৈনেয়ং যুদ্ধদুর্মদম্
দশভির্বিশিখৈস্তীক্ষ্ণৈরবিধ্যত ভুজান্তরে
141.4
তাবন্যোন্যং মহারাজ ততক্ষাতে শরৈর্ভৃশম্
ক্রোধসংরক্তনয়নৌ ক্রোধাদ্বিস্ফার্য কার্মুকে
141.5
তয়োরাসীন্মহারাজ শস্ত্রবৃষ্টিঃ সুদারুণা
ক্রুদ্ধয়োঃ সায়কমুচোর্যমান্তকনিকাশয়োঃ
141.6
তাবন্যোন্যং শরৈ রাজন্প্রচ্ছাদ্য সমরে স্থিতৌ
মুহূর্তং চৈব তদ্যুদ্ধং সমরূপমিবাভবৎ
141.7
ততঃ ক্রুদ্ধো মহারাজ শৈনেয়ঃ প্রহসন্নিব
ধনুশ্চিচ্ছেদ সমরে কৌরব্যস্য মহাত্মনঃ
141.8
অথৈনং ছিন্নধন্বানং নবভির্নিশিতৈঃ শরৈঃ
বিব্যাধ হৃদয়ে তূর্ণং তিষ্ঠ তিষ্ঠেতি চাব্রবীৎ
141.9
সোঽতিবিদ্ধো বলবতা শত্রুণা শত্রুতাপনঃ
ধনুরন্যত্সমাদায় সাত্বতং প্রত্যবিধ্যত
141.10
স বিদ্ধ্বা সাত্বতং বাণৈস্ত্রিভিরেব বিশাং পতে
ধনুশ্চিচ্ছেদ ভল্লেন সুতীক্ষ্ণেন হসন্নিব
141.11
ছিন্নধন্বা মহারাজ সাত্যকিঃ ক্রোধমূর্ছিতঃ
প্রজহার মহাবেগাং শক্তিং তস্য মহোরসি
141.12
স তু শক্ত্যা বিভিন্নাঙ্গো নিপপাত রথোত্তমাৎ
লোহিতাঙ্গ ইবাকাশাদ্দীপ্তরশ্মির্যদৃচ্ছয়া
141.13
তং তু দৃষ্ট্বা হতং শূরমশ্বত্থামা মহারথঃ
অভ্যধাবত বেগেন শৈনেয়ং প্রতি সংয়ুগে
অভ্যবর্ষচ্ছরৌঘেণ মেরুং বৃষ্ট্যা যথাম্বুদঃ
141.14
তমাপতন্তং সংরব্ধং শৈনেয়স্য রথং প্রতি
ঘটোত্কচোঽব্রবীদ্রাজন্নাদং মুক্ত্বা মহারথঃ
141.15
তিষ্ঠ তিষ্ঠ ন মে জীবন্দ্রোণপুত্র গমিষ্যসি
এষ ত্বাদ্য হনিষ্যামি মহিষং স্কন্দরাডিব
যুদ্ধশ্রদ্ধামহং তেঽদ্য বিনেষ্যামি রণাজিরে
141.16
ইত্যুক্ত্বা রোষতাম্রাক্ষো রাক্ষসঃ পরবীরহা
দ্রৌণিমভ্যদ্রবত্ক্রুদ্ধো গজেন্দ্রমিব কেসরী
141.17
রথাক্ষমাত্রৈরিষুভিরভ্যবর্ষদ্ঘটোত্কচঃ
রথিনামৃষভং দ্রৌণিং ধারাভিরিব তোয়দঃ
141.18
শরবৃষ্টিং তু তাং প্রাপ্তাং শরৈরাশীবিষোপমৈঃ
শাতয়ামাস সমরে তরসা দ্রৌণিরুত্স্ময়ন্
141.19
ততঃ শরশতৈস্তীক্ষ্ণৈর্মর্মভেদিভিরাশুগৈঃ
সমাচিনোদ্রাক্ষসেন্দ্রং ঘটোত্কচমরিংদম
141.20
স শরৈরাচিতস্তেন রাক্ষসো রণমূর্ধনি
ব্যকাশত মহারাজ শ্বাবিচ্ছললিতো যথা
141.21
ততঃ ক্রোধসমাবিষ্টো ভৈমসেনিঃ প্রতাপবান্
শরৈরবচকর্তোগ্রৈর্দ্রৌণিং বজ্রাশনিস্বনৈঃ
141.22
ক্ষুরপ্রৈরর্ধচন্দ্রৈশ্চ নারাচৈঃ সশিলীমুখৈঃ
বরাহকর্ণৈর্নালীকৈস্তীক্ষ্ণৈশ্চাপি বিকর্ণিভিঃ
141.23
তাং শস্ত্রবৃষ্টিমতুলাং বজ্রাশনিসমস্বনাম্
পতন্তীমুপরি ক্রুদ্ধো দ্রৌণিরব্যথিতেন্দ্রিয়ঃ
141.24
সুদুঃসহাং শরৈর্ঘোরৈর্দিব্যাস্ত্রপ্রতিমন্ত্রিতৈঃ
ব্যধমত্স মহাতেজা মহাভ্রাণীব মারুতঃ
141.25
ততোঽন্তরিক্ষে বাণানাং সংগ্রামোঽন্য ইবাভবৎ
ঘোররূপো মহারাজ যোধানাং হর্ষবর্ধনঃ
141.26
ততোঽস্ত্রসংঘর্ষকৃতৈর্বিস্ফুলিঙ্গৈঃ সমন্ততঃ
বভৌ নিশামুখে ব্যোম খদ্যোতৈরিব সংবৃতম্
141.27
স মার্গণগণৈর্দ্রৌণির্দিশঃ প্রচ্ছাদ্য সর্বতঃ
প্রিয়ার্থং তব পুত্রাণাং রাক্ষসং সমবাকিরৎ
141.28
ততঃ প্রববৃতে যুদ্ধং দ্রৌণিরাক্ষসয়োর্মৃধে
বিগাঢে রজনীমধ্যে শক্রপ্রহ্রাদয়োরিব
141.29
ততো ঘটোত্কচো বাণৈর্দশভির্দ্রৌণিমাহবে
জঘানোরসি সংক্রুদ্ধঃ কালজ্বলনসংনিভৈঃ
141.30
স তৈরভ্যায়তৈর্বিদ্ধো রাক্ষসেন মহাবলঃ
চচাল সমরে দ্রৌণির্বাতনুন্ন ইব দ্রুমঃ
স মোহমনুসংপ্রাপ্তো ধ্বজয়ষ্টিং সমাশ্রিতঃ
141.31
ততো হাহাকৃতং সৈন্যং তব সর্বং জনাধিপ
হতং স্ম মেনিরে সর্বে তাবকাস্তং বিশাং পতে
141.32
তং তু দৃষ্ট্বা তথাবস্থমশ্বত্থামানমাহবে
পাঞ্চালাঃ সৃঞ্জয়াশ্চৈব সিংহনাদং প্রচক্রিরে
141.33
প্রতিলভ্য ততঃ সংজ্ঞামশ্বত্থামা মহাবলঃ
ধনুঃ প্রপীড্য বামেন করেণামিত্রকর্শনঃ
141.34
মুমোচাকর্ণপূর্ণেন ধনুষা শরমুত্তমম্
যমদণ্ডোপমং ঘোরমুদ্দিশ্যাশু ঘটোত্কচম্
141.35
স ভিত্ত্বা হৃদয়ং তস্য রাক্ষসস্য শরোত্তমঃ
বিবেশ বসুধামুগ্রঃ সুপুঙ্খঃ পৃথিবীপতে
141.36
সোঽতিবিদ্ধো মহারাজ রথোপস্থ উপাবিশৎ
রাক্ষসেন্দ্রঃ সুবলবান্দ্রৌণিনা রণমানিনা
141.37
দৃষ্ট্বা বিমূঢং হৈডিম্বং সারথিস্তং রণাজিরাৎ
দ্রৌণেঃ সকাশাত্সংভ্রান্তস্ত্বপনিন্যে ত্বরান্বিতঃ
141.38
তথা তু সমরে বিদ্ধ্বা রাক্ষসেন্দ্রং ঘটোত্কচম্
ননাদ সুমহানাদং দ্রোণপুত্রো মহাবলঃ
141.39
পূজিতস্তব পুত্রৈশ্চ সর্বয়োধৈশ্চ ভারত
বপুষা প্রতিজজ্বাল মধ্যাহ্ন ইব ভাস্করঃ
141.40
ভীমসেনং তু যুধ্যন্তং ভারদ্বাজরথং প্রতি
স্বয়ং দুর্যোধনো রাজা প্রত্যবিধ্যচ্ছিতৈঃ শরৈঃ
141.41
তং ভীমসেনো নবভিঃ শরৈর্বিব্যাধ মারিষ
দুর্যোধনোঽপি বিংশত্যা শরাণাং প্রত্যবিধ্যত
141.42
তৌ সায়কৈরবচ্ছন্নাবদৃশ্যেতাং রণাজিরে
মেঘজালসমাচ্ছন্নৌ নভসীবেন্দুভাস্করৌ
141.43
অথ দুর্যোধনো রাজা ভীমং বিব্যাধ পত্রিভিঃ
পঞ্চভির্ভরতশ্রেষ্ঠ তিষ্ঠ তিষ্ঠেতি চাব্রবীৎ
141.44
তস্য ভীমো ধনুশ্ছিত্ত্বা ধ্বজং চ নবভিঃ শরৈঃ
বিব্যাধ কৌরবশ্রেষ্ঠং নবত্যা নতপর্বণাম্
141.45
ততো দুর্যোধনঃ ক্রুদ্ধো ভীমসেনস্য মারিষ
চিক্ষেপ স শরান্রাজন্পশ্যতাং সর্বধন্বিনাম্
141.46
তান্নিহত্য শরান্ভীমো দুর্যোধনধনুশ্চ্যুতান্
কৌরবং পঞ্চবিংশত্যা ক্ষুদ্রকাণাং সমার্পয়ৎ
141.47
দুর্যোধনস্তু সংক্রুদ্ধো ভীমসেনস্য মারিষ
ক্ষুরপ্রেণ ধনুশ্ছিত্ত্বা দশভিঃ প্রত্যবিধ্যত
141.48
অথান্যদ্ধনুরাদায় ভীমসেনো মহাবলঃ
বিব্যাধ নৃপতিং তূর্ণং সপ্তভির্নিশিতৈঃ শরৈঃ
141.49
তদপ্যস্য ধনুঃ ক্ষিপ্রং চিচ্ছেদ লঘুহস্তবৎ
দ্বিতীয়ং চ তৃতীয়ং চ চতুর্থং পঞ্চমং তথা
141.50
আত্তমাত্তং মহারাজ ভীমস্য ধনুরাচ্ছিনৎ
তব পুত্রো মহারাজ জিতকাশী মদোত্কটঃ
141.51
স তদা ছিদ্যমানেষু কার্মুকেষু পুনঃ পুনঃ
শক্তিং চিক্ষেপ সমরে সর্বপারশবীং শুভাম্
141.52
অপ্রাপ্তামেব তাং শক্তিং ত্রিধা চিচ্ছেদ কৌরবঃ
পশ্যতঃ সর্বলোকস্য ভীমস্য চ মহাত্মনঃ
141.53
ততো ভীমো মহারাজ গদাং গুর্বীং মহাপ্রভাম্
চিক্ষেপাবিধ্য বেগেন দুর্যোধনরথং প্রতি
141.54
ততঃ সা সহসা বাহাংস্তব পুত্রস্য সংয়ুগে
সারথিং চ গদা গুর্বী মমর্দ ভরতর্ষভ
141.55
পুত্রস্তু তব রাজেন্দ্র রথাদ্ধেমপরিষ্কৃতাৎ
আপ্লুতঃ সহসা যানং নন্দকস্য মহাত্মনঃ
141.56
ততো ভীমো হতং মত্বা তব পুত্রং মহারথম্
সিংহনাদং মহচ্চক্রে তর্জয়ন্নিব কৌরবান্
141.57
তাবকাঃ সৈনিকাশ্চাপি মেনিরে নিহতং নৃপম্
ততো বিচুক্রুশুঃ সর্বে হা হেতি চ সমন্ততঃ
141.58
তেষাং তু নিনদং শ্রুত্বা ত্রস্তানাং সর্বয়োধিনাম্
ভীমসেনস্য নাদং চ শ্রুত্বা রাজন্মহাত্মনঃ
141.59
ততো যুধিষ্ঠিরো রাজা হতং মত্বা সুয়োধনম্
অভ্যবর্তত বেগেন যত্র পার্থো বৃকোদরঃ
141.60
পাঞ্চালাঃ কেকয়া মত্স্যাঃ সৃঞ্জয়াশ্চ বিশাং পতে
সর্বোদ্যোগেনাভিজগ্মুর্দ্রোণমেব যুয়ুত্সয়া
141.61
তত্রাসীত্সুমহদ্যুদ্ধং দ্রোণস্যাথ পরৈঃ সহ
ঘোরে তমসি মগ্নানাং নিঘ্নতামিতরেতরম্