Utshovঅধ্যায় 142
142.1
সংজয় উবাচ
সহদেবমথায়ান্তং দ্রোণপ্রেপ্সুং বিশাং পতে
কর্ণো বৈকর্তনো যুদ্ধে বারয়ামাস ভারত
142.2
সহদেবস্তু রাধেয়ং বিদ্ধ্বা নবভিরাশুগৈঃ
পুনর্বিব্যাধ দশভির্নিশিতৈর্নতপর্বভিঃ
142.3
তং কর্ণঃ প্রতিবিব্যাধ শতেন নতপর্বণাম্
সজ্যং চাস্য ধনুঃ শীঘ্রং চিচ্ছেদ লঘুহস্তবৎ
142.4
ততোঽন্যদ্ধনুরাদায় মাদ্রীপুত্রঃ প্রতাপবান্
কর্ণং বিব্যাধ বিংশত্যা তদদ্ভুতমিবাভবৎ
142.5
তস্য কর্ণো হয়ান্হত্বা শরৈঃ সংনতপর্বভিঃ
সারথিং চাস্য ভল্লেন দ্রুতং নিন্যে যমক্ষয়ম্
142.6
বিরথঃ সহদেবস্তু খড্গং চর্ম সমাদদে
তদপ্যস্য শরৈঃ কর্ণো ব্যধমত্প্রহসন্নিব
142.7
ততো গুর্বীং মহাঘোরাং হেমচিত্রাং মহাগদাম্
প্রেষয়ামাস সমরে বৈকর্তনরথং প্রতি
142.8
তামাপতন্তীং সহসা সহদেবপ্রবেরিতাম্
ব্যষ্টম্ভয়চ্ছরৈঃ কর্ণো ভূমৌ চৈনামপাতয়ৎ
142.9
গদাং বিনিহতাং দৃষ্ট্বা সহদেবস্ত্বরান্বিতঃ
শক্তিং চিক্ষেপ কর্ণায় তামপ্যস্যাচ্ছিনচ্ছরৈঃ
142.10
সসংভ্রমস্ততস্তূর্ণমবপ্লুত্য রথোত্তমাৎ
সহদেবো মহারাজ দৃষ্ট্বা কর্ণং ব্যবস্থিতম্
রথচক্রং ততো গৃহ্য মুমোচাধিরথিং প্রতি
142.11
তমাপতন্তং সহসা কালচক্রমিবোদ্যতম্
শরৈরনেকসাহস্রৈরচ্ছিনত্সূতনন্দনঃ
142.12
তস্মিংস্তু বিতথে চক্রে কৃতে তেন মহাত্মনা
বার্যমাণশ্চ বিশিখৈঃ সহদেবো রণং জহৌ
142.13
তমভিদ্রুত্য রাধেয়ো মুহূর্তাদ্ভরতর্ষভ
অব্রবীত্প্রহসন্বাক্যং সহদেবং বিশাং পতে
142.14
মা যুধ্যস্ব রণে বীর বিশিষ্টৈ রথিভিঃ সহ
সদৃশৈর্যুধ্য মাদ্রেয় বচো মে মা বিশঙ্কিথাঃ
142.15
অথৈনং ধনুষোঽগ্রেণ তুদন্ভূয়োঽব্রবীদ্বচঃ
এষোঽর্জুনো রণে যত্তো যুধ্যতে কুরুভিঃ সহ
তত্র গচ্ছস্ব মাদ্রেয় গৃহং বা যদি মন্যসে
142.16
এবমুক্ত্বা তু তং কর্ণো রথেন রথিনাং বরঃ
প্রায়াত্পাঞ্চালপাণ্ডূনাং সৈন্যানি প্রহসন্নিব
142.17
বধপ্রাপ্তং তু মাদ্রেয়ং নাবধীত্সমরেঽরিহা
কুন্ত্যাঃ স্মৃত্বা বচো রাজন্সত্যসংধো মহারথঃ
142.18
সহদেবস্ততো রাজন্বিমনাঃ শরপীডিতঃ
কর্ণবাক্শল্যতপ্তশ্চ জীবিতান্নিরবিদ্যত
142.19
আরুরোহ রথং চাপি পাঞ্চাল্যস্য মহাত্মনঃ
জনমেজয়স্য সমরে ত্বরায়ুক্তো মহারথঃ
142.20
বিরাটং সহসেনং তু দ্রোণার্থে দ্রুতমাগতম্
মদ্ররাজঃ শরৌঘেণ ছাদয়ামাস ধন্বিনম্
142.21
তয়োঃ সমভবদ্যুদ্ধং সমরে দৃঢধন্বিনোঃ
যাদৃশং হ্যভবদ্রাজঞ্জম্ভবাসবয়োঃ পুরা
142.22
মদ্ররাজো মহারাজ বিরাটং বাহিনীপতিম্
আজঘ্নে ত্বরিতং তীক্ষ্ণৈঃ শতেন নতপর্বণাম্
142.23
প্রতিবিব্যাধ তং রাজা নবভির্নিশিতৈঃ শরৈঃ
পুনশ্চৈব ত্রিসপ্তত্যা ভূয়শ্চৈব শতেন হ
142.24
তস্য মদ্রাধিপো হত্বা চতুরো রথবাজিনঃ
সূতং ধ্বজং চ সমরে রথোপস্থাদপাতয়ৎ
142.25
হতাশ্বাত্তু রথাত্তূর্ণমবপ্লুত্য মহারথঃ
তস্থৌ বিস্ফারয়ংশ্চাপং বিমুঞ্চংশ্চ শিতাঞ্শরান্
142.26
শতানীকস্ততো দৃষ্ট্বা ভ্রাতরং হতবাহনম্
রথেনাভ্যপতত্তূর্ণং সর্বলোকস্য পশ্যতঃ
142.27
শতানীকমথায়ান্তং মদ্ররাজো মহামৃধে
বিশিখৈর্বহুভির্বিদ্ধ্বা ততো নিন্যে যমক্ষয়ম্
142.28
তস্মিংস্তু নিহতে বীরে বিরাটো রথসত্তমঃ
আরুরোহ রথং তূর্ণং তমেব ধ্বজমালিনম্
142.29
ততো বিস্ফার্য নয়নে ক্রোধাদ্দ্বিগুণবিক্রমঃ
মদ্ররাজরথং তূর্ণং ছাদয়ামাস পত্রিভিঃ
142.30
ততো মদ্রাধিপঃ ক্রুদ্ধঃ শতেন নতপর্বণাম্
আজঘানোরসি দৃঢং বিরাটং বাহিনীপতিম্
142.31
সোঽতিবিদ্ধো মহারাজ রথোপস্থ উপাবিশৎ
কশ্মলং চাবিশত্তীব্রং বিরাটো ভরতর্ষভ
সারথিস্তমপোবাহ সমরে শরবিক্ষতম্
142.32
ততঃ সা মহতী সেনা প্রাদ্রবন্নিশি ভারত
বধ্যমানা শরশতৈঃ শল্যেনাহবশোভিনা
142.33
তাং দৃষ্ট্বা বিদ্রুতাং সেনাং বাসুদেবধনংজয়ৌ
প্রায়াতাং তত্র রাজেন্দ্র যত্র শল্যো ব্যবস্থিতঃ
142.34
তৌ তু প্রত্যুদ্যয়ৌ রাজন্রাক্ষসেন্দ্রো হ্যলম্বুসঃ
অষ্টচক্রসমায়ুক্তমাস্থায় প্রবরং রথম্
142.35
তুরংগমমুখৈর্যুক্তং পিশাচৈর্ঘোরদর্শনৈঃ
লোহিতার্দ্রপতাকং তং রক্তমাল্যবিভূষিতম্
কার্ষ্ণায়সময়ং ঘোরমৃক্ষচর্মাবৃতং মহৎ
142.36
রৌদ্রেণ চিত্রপক্ষেণ বিবৃতাক্ষেণ কূজতা
ধ্বজেনোচ্ছ্রিততুণ্ডেন গৃধ্ররাজেন রাজতা
142.37
স বভৌ রাক্ষসো রাজন্ভিন্নাঞ্জনচয়োপমঃ
রুরোধার্জুনমায়ান্তং প্রভঞ্জনমিবাদ্রিরাট্
কিরন্বাণগণান্রাজঞ্শতশোঽর্জুনমূর্ধনি
142.38
অতিতীব্রমভূদ্যুদ্ধং নররাক্ষসয়োর্মৃধে
দ্রষ্টৄণাং প্রীতিজননং সর্বেষাং ভরতর্ষভ
142.39
তমর্জুনঃ শতেনৈব পত্রিণামভ্যতাডয়ৎ
নবভিশ্চ শিতৈর্বাণৈশ্চিচ্ছেদ ধ্বজমুচ্ছ্রিতম্
142.40
সারথিং চ ত্রিভির্বাণৈস্ত্রিভিরেব ত্রিবেণুকম্
ধনুরেকেন চিচ্ছেদ চতুর্ভিশ্চতুরো হয়ান্
বিরথস্যোদ্যতং খড্গং শরেণাস্য দ্বিধাচ্ছিনৎ
142.41
অথৈনং নিশিতৈর্বাণৈশ্চতুর্ভির্ভরতর্ষভ
পার্থোঽর্দয়দ্রাক্ষসেন্দ্রং স বিদ্ধঃ প্রাদ্রবদ্ভয়াৎ
142.42
তং বিজিত্যার্জুনস্তূর্ণং দ্রোণান্তিকমুপায়য়ৌ
কিরঞ্শরগণান্রাজন্নরবারণবাজিষু
142.43
বধ্যমানা মহারাজ পাণ্ডবেন যশস্বিনা
সৈনিকা ন্যপতন্নুর্ব্যাং বাতনুন্না ইব দ্রুমাঃ
142.44
তেষু তূত্সাদ্যমানেষু ফল্গুনেন মহাত্মনা
সংপ্রাদ্রবদ্বলং সর্বং পুত্রাণাং তে বিশাং পতে