Utshovঅধ্যায় 143
143.1
সংজয় উবাচ
শতানীকং শরৈস্তূর্ণং নির্দহন্তং চমূং তব
চিত্রসেনস্তব সুতো বারয়ামাস ভারত
143.2
নাকুলিশ্চিত্রসেনং তু নারাচেনার্দয়দ্ভৃশম্
স চ তং প্রতিবিব্যাধ দশভির্নিশিতৈঃ শরৈঃ
143.3
চিত্রসেনো মহারাজ শতানীকং পুনর্যুধি
নবভির্নিশিতৈর্বাণৈরাজঘান স্তনান্তরে
143.4
নাকুলিস্তস্য বিশিখৈর্বর্ম সংনতপর্বভিঃ
গাত্রাত্সংচ্যাবয়ামাস তদদ্ভুতমিবাভবৎ
143.5
সোঽপেতবর্মা পুত্রস্তে বিররাজ ভৃশং নৃপ
উত্সৃজ্য কালে রাজেন্দ্র নির্মোকমিব পন্নগঃ
143.6
ততোঽস্য নিশিতৈর্বাণৈর্ধ্বজং চিচ্ছেদ নাকুলিঃ
ধনুশ্চৈব মহারাজ যতমানস্য সংয়ুগে
143.7
স ছিন্নধন্বা সমরে বিবর্মা চ মহারথঃ
ধনুরন্যন্মহারাজ জগ্রাহারিবিদারণম্
143.8
ততস্তূর্ণং চিত্রসেনো নাকুলিং নবভিঃ শরৈঃ
বিব্যাধ সমরে ক্রুদ্ধো ভরতানাং মহারথঃ
143.9
শতানীকোঽথ সংক্রুদ্ধশ্চিত্রসেনস্য মারিষ
জঘান চতুরো বাহান্সারথিং চ নরোত্তমঃ
143.10
অবপ্লুত্য রথাত্তস্মাচ্চিত্রসেনো মহারথঃ
নাকুলিং পঞ্চবিংশত্যা শরাণামার্দয়দ্বলী
143.11
তস্য তত্কুর্বতঃ কর্ম নকুলস্য সুতো রণে
অর্ধচন্দ্রেণ চিচ্ছেদ চাপং রত্নবিভূষিতম্
143.12
স ছিন্নধন্বা বিরথো হতাশ্বো হতসারথিঃ
আরুরোহ রথং তূর্ণং হার্দিক্যস্য মহাত্মনঃ
143.13
দ্রুপদং তু সহানীকং দ্রোণপ্রেপ্সুং মহারথম্
বৃষসেনোঽভ্যয়াত্তূর্ণং কিরঞ্শরশতৈস্তদা
143.14
যজ্ঞসেনস্তু সমরে কর্ণপুত্রং মহারথম্
ষষ্ট্যা শরাণাং বিব্যাধ বাহ্বোরুরসি চানঘ
143.15
বৃষসেনস্তু সংক্রুদ্ধো যজ্ঞসেনং রথে স্থিতম্
বহুভিঃ সায়কৈস্তীক্ষ্ণৈরাজঘান স্তনান্তরে
143.16
তাবুভৌ শরনুন্নাঙ্গৌ শরকণ্টকিনৌ রণে
ব্যভ্রাজেতাং মহারাজ শ্বাবিধৌ শললৈরিব
143.17
রুক্মপুঙ্খৈরজিহ্মাগ্রৈঃ শরৈশ্ছিন্নতনুচ্ছদৌ
রুধিরৌঘপরিক্লিন্নৌ ব্যভ্রাজেতাং মহামৃধে
143.18
তপনীয়নিভৌ চিত্রৌ কল্পবৃক্ষাবিবাদ্ভুতৌ
কিংশুকাবিব চোত্ফুল্লৌ ব্যকাশেতাং রণাজিরে
143.19
বৃষসেনস্ততো রাজন্নবভির্দ্রুপদং শরৈঃ
বিদ্ধ্বা বিব্যাধ সপ্তত্যা পুনশ্চান্যৈস্ত্রিভিঃ শরৈঃ
143.20
ততঃ শরসহস্রাণি বিমুঞ্চন্বিবভৌ তদা
কর্ণপুত্রো মহারাজ বর্ষমাণ ইবাম্বুদঃ
143.21
ততস্তু দ্রুপদানীকং শরৈশ্ছিন্নতনুচ্ছদম্
সংপ্রাদ্রবদ্রণে রাজন্নিশীথে ভৈরবে সতি
143.22
প্রদীপৈর্হি পরিত্যক্তৈর্জ্বলদ্ভিস্তৈঃ সমন্ততঃ
ব্যরাজত মহী রাজন্বীতাভ্রা দ্যৌরিব গ্রহৈঃ
143.23
তথাঙ্গদৈর্নিপতিতৈর্ব্যরাজত বসুংধরা
প্রাবৃট্কালে মহারাজ বিদ্যুদ্ভিরিব তোয়দঃ
143.24
ততঃ কর্ণসুতত্রস্তাঃ সোমকা বিপ্রদুদ্রুবুঃ
যথেন্দ্রভয়বিত্রস্তা দানবাস্তারকাময়ে
143.25
তেনার্দ্যমানাঃ সমরে দ্রবমাণাশ্চ সোমকাঃ
ব্যরাজন্ত মহারাজ প্রদীপৈরবভাসিতাঃ
143.26
তাংস্তু নির্জিত্য সমরে কর্ণপুত্রো ব্যরোচত
মধ্যংদিনমনুপ্রাপ্তো ঘর্মাংশুরিব ভারত
143.27
তেষু রাজসহস্রেষু তাবকেষু পরেষু চ
এক এব জ্বলংস্তস্থৌ বৃষসেনঃ প্রতাপবান্
143.28
স বিজিত্য রণে শূরান্সোমকানাং মহারথান্
জগাম ত্বরিতস্তত্র যত্র রাজা যুধিষ্ঠিরঃ
143.29
প্রতিবিন্ধ্যমথ ক্রুদ্ধং প্রদহন্তং রণে রিপূন্
দুঃশাসনস্তব সুতঃ প্রত্যুদ্গচ্ছন্মহারথঃ
143.30
তয়োঃ সমাগমো রাজংশ্চিত্ররূপো বভূব হ
ব্যপেতজলদে ব্যোম্নি বুধভার্গবয়োরিব
143.31
প্রতিবিন্ধ্যং তু সমরে কুর্বাণং কর্ম দুষ্করম্
দুঃশাসনস্ত্রিভির্বাণৈর্ললাটে সমবিধ্যত
143.32
সোঽতিবিদ্ধো বলবতা পুত্রেণ তব ধন্বিনা
বিররাজ মহাবাহুঃ সশৃঙ্গ ইব পর্বতঃ
143.33
দুঃশাসনং তু সমরে প্রতিবিন্ধ্যো মহারথঃ
নবভিঃ সায়কৈর্বিদ্ধ্বা পুনর্বিব্যাধ সপ্তভিঃ
143.34
তত্র ভারত পুত্রস্তে কৃতবান্কর্ম দুষ্করম্
প্রতিবিন্ধ্যহয়ানুগ্রৈঃ পাতয়ামাস যচ্ছরৈঃ
143.35
সারথিং চাস্য ভল্লেন ধ্বজং চ সমপাতয়ৎ
রথং চ শতশো রাজন্ব্যধমত্তস্য ধন্বিনঃ
143.36
পতাকাশ্চ স তূণীরান্রশ্মীন্যোক্ত্রাণি চাভিভো
চিচ্ছেদ তিলশঃ ক্রুদ্ধঃ শরৈঃ সংনতপর্বভিঃ
143.37
বিরথঃ স তু ধর্মাত্মা ধনুষ্পাণিরবস্থিতঃ
অয়োধয়ত্তব সুতং কিরঞ্শরশতান্বহূন্
143.38
ক্ষুরপ্রেণ ধনুস্তস্য চিচ্ছেদ কৃতহস্তবৎ
অথৈনং দশভির্ভল্লৈশ্ছিন্নধন্বানমার্দয়ৎ
143.39
তং দৃষ্ট্বা বিরথং তত্র ভ্রাতরোঽস্য মহারথাঃ
অন্ববর্তন্ত বেগেন মহত্যা সেনয়া সহ
143.40
আপ্লুতঃ স ততো যানং সুতসোমস্য ভাস্বরম্
ধনুর্গৃহ্য মহারাজ বিব্যাধ তনয়ং তব
143.41
ততস্তু তাবকাঃ সর্বে পরিবার্য সুতং তব
অভ্যবর্তন্ত সংগ্রামে মহত্যা সেনয়া বৃতাঃ
143.42
ততঃ প্রববৃতে যুদ্ধং তব তেষাং চ ভারত
নিশীথে দারুণে কালে যমরাষ্ট্রবিবর্ধনম্