Utshovঅধ্যায় 144
144.1
সংজয় উবাচ
নকুলং রভসং যুদ্ধে নিঘ্নন্তং বাহিনীং তব
অভ্যয়াত্সৌবলঃ ক্রুদ্ধস্তিষ্ঠ তিষ্ঠেতি চাব্রবীৎ
144.2
কৃতবৈরৌ তু তৌ বীরাবন্যোন্যবধকাঙ্ক্ষিণৌ
শরৈঃ পূর্ণায়তোত্সৃষ্টৈরন্যোন্যমভিজঘ্নতুঃ
144.3
যথৈব সৌবলঃ ক্ষিপ্রং শরবর্ষাণি মুঞ্চতি
তথৈব নকুলো রাজঞ্শিক্ষাং সংদর্শয়ন্যুধি
144.4
তাবুভৌ সমরে শূরৌ শরকণ্টকিনৌ তদা
ব্যরাজেতাং মহারাজ কণ্টকৈরিব শাল্মলী
144.5
সুজিহ্মং প্রেক্ষমাণৌ চ রাজন্বিবৃতলোচনৌ
ক্রোধসংরক্তনয়নৌ নির্দহন্তৌ পরস্পরম্
144.6
স্যালস্তু তব সংক্রুদ্ধো মাদ্রীপুত্রং হসন্নিব
কর্ণিনৈকেন বিব্যাধ হৃদয়ে নিশিতেন হ
144.7
নকুলস্তু ভৃশং বিদ্ধঃ স্যালেন তব ধন্বিনা
নিষসাদ রথোপস্থে কশ্মলং চৈনমাবিশৎ
144.8
অত্যন্তবৈরিণং দৃপ্তং দৃষ্ট্বা শত্রুং তথাগতম্
ননাদ শকুনী রাজংস্তপান্তে জলদো যথা
144.9
প্রতিলভ্য ততঃ সংজ্ঞাং নকুলঃ পাণ্ডুনন্দনঃ
অভ্যয়াত্সৌবলং ভূয়ো ব্যাত্তানন ইবান্তকঃ
144.10
সংক্রুদ্ধঃ শকুনিং ষষ্ট্যা বিব্যাধ ভরতর্ষভ
পুনশ্চৈব শতেনৈব নারাচানাং স্তনান্তরে
144.11
ততোঽস্য সশরং চাপং মুষ্টিদেশে স চিচ্ছিদে
ধ্বজং চ ত্বরিতং ছিত্ত্বা রথাদ্ভূমাবপাতয়ৎ
144.12
সোঽতিবিদ্ধো মহারাজ রথোপস্থ উপাবিশৎ
তং বিসংজ্ঞং নিপতিতং দৃষ্ট্বা স্যালং তবানঘ
অপোবাহ রথেনাশু সারথির্ধ্বজিনীমুখাৎ
144.13
ততঃ সংচুক্রুশুঃ পার্থা যে চ তেষাং পদানুগাঃ
নির্জিত্য চ রণে শত্রূন্নকুলঃ শত্রুতাপনঃ
অব্রবীত্সারথিং ক্রুদ্ধো দ্রোণানীকায় মাং বহ
144.14
তস্য তদ্বচনং শ্রুত্বা মাদ্রীপুত্রস্য ধীমতঃ
প্রায়াত্তেন রণে রাজন্যেন দ্রোণোঽন্বয়ুধ্যত
144.15
শিখণ্ডিনং তু সমরে দ্রোণপ্রেপ্সুং বিশাং পতে
কৃপঃ শারদ্বতো যত্তঃ প্রত্যুদ্গচ্ছত্সুবেগিতঃ
144.16
গৌতমং দ্রুতমায়ান্তং দ্রোণান্তিকমরিংদমম্
বিব্যাধ নবভির্ভল্লৈঃ শিখণ্ডী প্রহসন্নিব
144.17
তমাচার্যো মহারাজ বিদ্ধ্বা পঞ্চভিরাশুগৈঃ
পুনর্বিব্যাধ বিংশত্যা পুত্রাণাং প্রিয়কৃত্তব
144.18
মহদ্যুদ্ধং তয়োরাসীদ্ঘোররূপং বিশাং পতে
যথা দেবাসুরে যুদ্ধে শম্বরামররাজয়োঃ
144.19
শরজালাবৃতং ব্যোম চক্রতুস্তৌ মহারথৌ
প্রকৃত্যা ঘোররূপং তদাসীদ্ঘোরতরং পুনঃ
144.20
রাত্রিশ্চ ভরতশ্রেষ্ঠ যোধানাং যুদ্ধশালিনাম্
কালরাত্রিনিভা হ্যাসীদ্ঘোররূপা ভয়াবহা
144.21
শিখণ্ডী তু মহারাজ গৌতমস্য মহদ্ধনুঃ
অর্ধচন্দ্রেণ চিচ্ছেদ সজ্যং সবিশিখং তদা
144.22
তস্য ক্রুদ্ধঃ কৃপো রাজঞ্শক্তিং চিক্ষেপ দারুণাম্
স্বর্ণদণ্ডামকুণ্ঠাগ্রাং কর্মারপরিমার্জিতাম্
144.23
তামাপতন্তীং চিচ্ছেদ শিখণ্ডী বহুভিঃ শরৈঃ
সাপতন্মেদিনীং দীপ্তা ভাসয়ন্তী মহাপ্রভা
144.24
অথান্যদ্ধনুরাদায় গৌতমো রথিনাং বরঃ
প্রাচ্ছাদয়চ্ছিতৈর্বাণৈর্মহারাজ শিখণ্ডিনম্
144.25
স ছাদ্যমানঃ সমরে গৌতমেন যশস্বিনা
ব্যষীদত রথোপস্থে শিখণ্ডী রথিনাং বরঃ
144.26
সীদন্তং চৈনমালোক্য কৃপঃ শারদ্বতো যুধি
আজঘ্নে বহুভির্বাণৈর্জিঘাংসন্নিব ভারত
144.27
বিমুখং তং রণে দৃষ্ট্বা যাজ্ঞসেনিং মহারথম্
পাঞ্চালাঃ সোমকাশ্চৈব পরিবব্রুঃ সমন্ততঃ
144.28
তথৈব তব পুত্রাশ্চ পরিবব্রুর্দ্বিজোত্তমম্
মহত্যা সেনয়া সার্ধং ততো যুদ্ধমভূত্পুনঃ
144.29
রথানাং চ রণে রাজন্নন্যোন্যমভিধাবতাম্
বভূব তুমুলঃ শব্দো মেঘানাং নদতামিব
144.30
দ্রবতাং সাদিনাং চৈব গজানাং চ বিশাং পতে
অন্যোন্যমভিতো রাজন্ক্রূরমায়োধনং বভৌ
144.31
পত্তীনাং দ্রবতাং চৈব পদশব্দেন মেদিনী
অকম্পত মহারাজ ভয়ত্রস্তেব চাঙ্গনা
144.32
রথা রথান্সমাসাদ্য প্রদ্রুতা বেগবত্তরম্
ন্যগৃহ্ণন্বহবো রাজঞ্শলভান্বায়সা ইব
144.33
তথা গজান্প্রভিন্নাংশ্চ সুপ্রভিন্না মহাগজাঃ
তস্মিন্নেব পদে যত্তা নিগৃহ্ণন্তি স্ম ভারত
144.34
সাদী সাদিনমাসাদ্য পদাতী চ পদাতিনম্
সমাসাদ্য রণেঽন্যোন্যং সংরব্ধা নাতিচক্রমুঃ
144.35
ধাবতাং দ্রবতাং চৈব পুনরাবর্ততামপি
বভূব তত্র সৈন্যানাং শব্দঃ সুতুমুলো নিশি
144.36
দীপ্যমানাঃ প্রদীপাশ্চ রথবারণবাজিষু
অদৃশ্যন্ত মহারাজ মহোল্কা ইব খাচ্চ্যুতাঃ
144.37
সা নিশা ভরতশ্রেষ্ঠ প্রদীপৈরবভাসিতা
দিবসপ্রতিমা রাজন্বভূব রণমূর্ধনি
144.38
আদিত্যেন যথা ব্যাপ্তং তমো লোকে প্রণশ্যতি
তথা নষ্টং তমো ঘোরং দীপৈর্দীপ্তৈরলংকৃতম্
144.39
শস্ত্রাণাং কবচানাং চ মণীনাং চ মহাত্মনাম্
অন্তর্দধুঃ প্রভাঃ সর্বা দীপৈস্তৈরবভাসিতাঃ
144.40
তস্মিন্কোলাহলে যুদ্ধে বর্তমানে নিশামুখে
অবধীত্সমরে পুত্রং পিতা ভরতসত্তম
144.41
পুত্রশ্চ পিতরং মোহাত্সখায়ং চ সখা তথা
সংবন্ধিনং চ সংবন্ধী স্বস্রীয়ং চাপি মাতুলঃ
144.42
স্বে স্বান্পরে পরাংশ্চাপি নিজঘ্নুরিতরেতরম্
নির্মর্যাদমভূদ্যুদ্ধং রাত্রৌ ঘোরং ভয়াবহম্